Read Alur 2 Ubimo 14 Bible Online

2 Ubimo 14 - Alur bible

2 Ubimo 14

¹I rundi mir arionde pa Yoac ma wod Yoahaz m’ubimo mir Israel Amazia ma wod Yoac m’ubimo mi Yuda maku camu ker.

²Rundi pare pier ario wi abic kinde m’emaku camu ker; man ecamu ker rundi pier ario wi abung’wen i Yerusalem: man nying’ min mire Yehoadin ma Yerusalem.

³E etimo gin m’ubedo atira i wang’ Yehova, ento calu Daudi ma kwaru mire ngo: etimo calku gin ceke ma Yoac ma won utimo.

⁴Ento ka ma malu fodi jukabu woko ngo: fodi dhanu gilamu lam man giwang’u udok ma ng’wice ng’ar i ka ma malu asu.

⁵Man etimbre, kinde ma ker ucungo i cinge, nia enego jutic pare m’unego ubimo ma won mire:

⁶ento nyithindho mi jukwoje enego gi ngo; calku lembe m’ugore i kitabu mi cik pa Musa, calu Yehova ng’olo, ewacu kumae, Jubiketho wego tho ngo pi nyithindho, kadi nyithindho de jubiketho tho ngo pi wego; ento dhanu ceke kubang’gi kubang’gi ng’atuman bitho pi dubo pare ma dhe.

⁷Enego dhanu mir Edom rubanga apar i Poga mi Kadu, man emaku Sela kud ali, man elwong’o nyinge Yokthel, cil i ceng’ ma tin.

⁸Amazia lund uoro jukwenda ba Yehoac, ma wod Yehoahaz ma wod Yehu, ubimo mir Israel, ewacu kumae, Wubin, wek wanendra ku wang’wa.

⁹Man Yehoac m’ubimo mir Israel uoro kwenda ba Amazia m’ubimo mi Yuda, ewacu kumae, Ucok ma ni i Lebanon oro kwenda ba musonge ma ni i Lebanon, ewacu kumae, Mi nyeri ni woda ni dhaku: e yedi m’i thim ma ni i Lebanon ukadhu, man enyono ucokne.

¹⁰Igoyo Edom andha, man adundeni ting’i malu: luli giri, man ibed thu; kum nedi iyenyo lembe ma bitimi rac, kara ipodhi, en e in, ku Yuda de?

¹¹Ento Amazia yenyo ngo ewinji. Kum kumeno Yehoac m’ubimo mir Israel eidho malu; en ku Amazia m’ubimo mi Yuda ginendri ku wang’gi i Beth-cemec, ma en e pa Yuda.

¹²Man juvoyo Yuda i wang’ Israel; e giringo ku ba dhanu ceke ng’atuman ba hema pare.

¹³Man Yehoac m’ubimo mir Israel umaku Amazia m’ubimo mi Yuda, ma wod Yehoac ma wod Ahazia, i Beth-cemec, man ebino Yerusalem, e erwombo gang’kidi mi Yerusalem piny ugambre kum dhugang’ mir Efraim cil kum dhugang’ mi gui, bot dak ang’wen.

¹⁴E eyaku mola ma kwar ku mola ma tar ceke, kud agulu ma junwang’u i ot pa Yehova ceke, man i kakanpiny mi ot p’ubimo, ku dhanu ma mi mukwatu bende, e edok i Samaria.

¹⁵Nie dong’ tic pa Yehoac m’etimo, ku tego pare, man maram ekiedo ko kud Amazia m’ubimo mi Yuda, gigore i kitabu mi lemkei mir ubimo mir Israel ungo?

¹⁶Man Yehoac unindo ku kwaru pare, man juyike karacelo kud ubimo mir Israel; man Yeroboam ma wode camu ker kakare.

¹⁷Man Amazia ma wod Yoac m’ubimo mi Yuda ucamu ng’om yo ng’ei tho pa Yehoac ma wod Yehoahaz m’ubimo mir Israel rundi apar wi abic.

¹⁸Nie dong’ tic pa Amazia, gigore i kitabu mi lemkei mir ubimo mi Yuda ngo?

¹⁹Man giporo lembe i kume i Yerusalem; e eringo i Lakic: ento gioro kwenda i toke i Lakic, man ginege kuca.

²⁰E gikele ku wi riuni; man juyike i Yerusalem ku kwaru pare i adhura pa Daudi.

²¹E dhanu ceke pa Yuda gigamu Azaria, ma rundi pare apar wi abusiel, man gidwoke ni ubimo ka pa won mire ma Amazia.

²²Egomo Elath, man edwoke ni Yuda, yo ng’ei maeno ubimo nindo ku kwaru pare.

²³I rundi apar wi abije pa Amazia ma wod Yoac m’ubimo mi Yuda, Yeroboam ma wod Yoac m’ubimo mir Israel umaku camu ker i Samaria, man ecamu ker rundi pier ang’wen wi acel.

²⁴Man etimo gin m’ubedo rac i wang’ Yehova: eweko dubo ceke pa Yeroboam ma wod Nebat ungo, m’eketho Israel udubo kudo.

²⁵Edwoko kieu mir Israel ugambre i kamondo mi Hamath utundo cil kum nam mir Araba, calku lembe pa Yehova, Mungu mir Israel, m’eyero ku jatic pare Yona ma wod Amitai, ma jabila, ma en e pa Gath-hefer.

²⁶Kum Yehova neno masendi mir Israel, nia e kec dit; kum ng’atu moko mbe ma jutwio kadi ma juweko bedo agonya, kadok jakony de mbe i kind Israel.

²⁷E Yehova wacu ngo nia ebikabu nying Israel woko ku the polo; ento elarugi ku cing’ Yeroboam ma wod Yoac.

²⁸Nie dong’ tic pa Yeroboam, ku gin ceke m’etimo, man tego pare, maram etimo ko ali, man maram egamu ko Dameski kendo, ku Hamath, ma naka pa Yuda, pir Israel, gigore i kitabu mi lemkei mir ubimo mir Israel ungo?

²⁹E Yeroboam unindo ku kwaru pare, gikud ubimo mir Israel; man Zekaria ma wode camu ker kakare.