Read Alur 2 Ubimo 15 Bible Online

2 Ubimo 15 - Alur bible

2 Ubimo 15

¹I rundi pier ario wi abirone pa Yeroboam m’ubimo mir Israel, Azaria ma wod Amazia m’ubimo mi Yuda maku camu ker.

²Rundi pare apar wi abusiel kinde m’emaku camu ker; man ecamu ker rundi pier abic wi ario i Yerusalem: man nying’ min mire Yekolia ma Yerusalem.

³Man etimo gin m’ubedo atira i wang’ Yehova, calku gin ceke ma Amazia ma won utimo.

⁴Ento jukabu ka ma malu woko ngo: dhanu lamu lam man giwang’u udok ma ng’wice ng’ar i ka ma malu asu.

⁵Man Yehova goyo ubimo, ketho nia ebedo won joi cil i ceng’ mi tho pare, man ebedo i ot m’ukoc. Man Yotham ma wod ubimo en e wi juot, m’ebepoko ko lembe mi dhanu m’i ng’om.

⁶Nie dong’ tic pa Azaria, ku gin ceke m’etimo, gigore i kitabu mi lemkei mir ubimo mi Yuda ngo?

⁷E Azaria nindo ku kwaru pare; man giyike ku kwaru pare i adhura pa Daudi: e Yotham ma wode ucamu ker kakare.

⁸I rundi pier adek wi aborane pa Azaria m’ubimo mi Yuda, Zekaria ma wod Yeroboam ucamu ker wi Israel i Samaria dwi abusiel.

⁹Man etimo gin ma rac i wang’ Yehova, calu kwaru pare timo: man eweko dubo pa Yeroboam ma wod Nebat ungo, m’eketho Israel udubo kudo.

¹⁰Man Calum ma wod Yabec uporo lembe i kume, e egoye i wang’ dhanu, man enege, ecamu ker de kakare.

¹¹Nie dong’ tic pa Zekaria, nen, gigore i kitabu mi lemkei p’ubimo mir Israel.

¹²Maeni lembe pa Yehova m’eyero ku Yehu, ewacu kumae, Woti bijany wi komker mir Israel cil kum dhanum’utuk mir ang’wende. E etimbre kumeca.

¹³Calum ma wod Yabec umaku camu ker i rundi pier adek wi abung’wende pa Uzia m’ubimo mi Yuda; man ecamu ker i kinde mi dwi acel i Samaria.

¹⁴Man Menahem ma wod Gadi idho malu ku ba Tirza, man ebino Samaria, e egoyo Calum ma wod Yabec i Samaria, enege de, man ecamu ker kakare.

¹⁵Nie dong’ tic pa Calum, ku lembapora pare m’etimo, nen, gigore i kitabu mi lemkei p’ubimo mir Israel.

¹⁶Menahem ulund ugoyo Tifsa, ku dhanu ceke ma ni i ie, ku kieune de, ugambre Tirza: kum giyabri ire ngo, ka kumeno egoye; man mon ceke ma ni i ie ma igi nuti ekaku igi.

¹⁷I rundi pier adek wi abung’wende pa Azaria m’ubimo mi Yuda, Menahem ma wod Gadi maku camu ker wi Israel, e ecamu ker rundi apar i Samaria.

¹⁸Man etimo gin ma rac i wang’ Yehova: ku ba ceng’ pare ceke eweko dubo pa Yeroboam ungo ma wod Nebat, m’eketho Israel udubo kudo.

¹⁹Pul m’ubimo mir Ascur ubino kum ng’ombe; man Menahem umio talanto mi mola ma tar rubanga acel ni Pul, kara cinge bed kude m’uketh ker udok tek i cinge.

²⁰E Menahem ujoko sentene bang’ Israel, en e ba dhanu ceke ma tek ma julonyo, ku ba dhanu ku ba dhanu cekel mi mola ma tar pier abic, kara emi ni ubimo mir Ascur. Kum kumeno ubimo mir Ascur ulokre cen, man ebedo kuca ngo i ng’ombe.

²¹Nie dong’ tic pa Menahem, ku gin ceke m’etimo, gigore i kitabu mi lemkei p’ubimo mir Israel ungo?

²²E Menahem unindo ku kwaru pare; man Pekahia ma wode camu ker kakare.

²³I rundi pier abije pa Azaria m’ubimo mi Yuda, Pekahia ma wod Menahem umaku camu ker wi Israel i Samaria, man ecamu ker rundi ario.

²⁴E etimo gin m’ubedo rac i wang’ Yehova: eweko dubo pa Yeroboam ma wod Nebat ungo, m’eketho Israel udubo kudo.

²⁵Man Peka ma wod Remalia, ma jego pare, uporo lembe i kume, man egoye i Samaria, i ot ma tek m’i ot p’ubimo, gikud Argob man Arie; e dhanu pier abic mi Jugileadi gini kude: e enege, man ecamu ker kakare.

²⁶Nie dong’ tic pa Pekahia, ku gin ceke m’etimo, nen, gigore i kitabu mi lemkei mir ubimo mir Israel.

²⁷I rundi pier abic wi arionde pa Azaria m’ubimo mi Yuda, Peka ma wod Remalia maku camu ker wi Israel i Samaria, man ecamu ker rundi pier ario.

²⁸E etimo gin ma rac i wang’ Yehova: eweko dubo pa Yeroboam ma wod Nebat ungo, m’eketho Israel udubo kudo.

²⁹I nindo pa Peka m’ubimo mir Israel, Tiglat-pileser m’ubimo mir Ascur ubino, man emaku Ijon, kud Abelbeth-maka, man Yanoa, man Kedec, ku Hazor, man Gilead ku Galilaya, man ng’om ceke pa Naftali; e eyakugi ni ng’eca i Ascur.

³⁰Man Hocea ma wod Ela giporo lembe kum Peka ma wod Remalia, e egoye, enege de, man ecamu ker kakare i rundi pier arionde pa Yotham ma wod Uzia.

³¹Nie dong’ tic pa Peka, ku gin ceke m’etimo, nen, gigore i kitabu mi lemkei mir ubimo mir Israel.

³²I rundi mir arionde pa Peka ma wod Remalia m’ubimo mir Israel, Yotham ma wod Uzia m’ubimo mi Yuda maku camu ker.

³³Rundi pare pier ario wi abic kinde m’emaku camu ker; man ecamu ker rundi apar wi abusiel i Yerusalem: man nying’ min mire Yeruca ma nya Zadok.

³⁴Man etimo gin m’atira i wang’ Yehova; etimo calku gin ceke ma won mire ma Uzia timo.

³⁵Ento jukabu ka ma malu woko ngo: dhanu gilamu lam, man giwang’u udok ma ng’wice ng’ar i ka ma malu asu. Eguro dhugang’ ma malu mi ot pa Yehova.

³⁶Nie dong’ tic pa Yotham, ku gin ceke m’etimo, gigore i kitabu mi lemkei mir ubimo mi Yuda ngo?

³⁷I ceng’ maeca Yehova maku oro Rezin m’ubimo mi Cami, man Peka ma wod Remalia kum Yuda.

³⁸E Yotham unindo ku kwaru pare, man juyike ku kwaru pare i adhura pa Daudi ma kwaru mire: man Ahaz ma wode camu ker kakare.