Read Alur 2 Ubimo 17 Bible Online

2 Ubimo 17 - Alur bible

2 Ubimo 17

¹I rundi apar wi arionde pa Ahaz m’ubimo mi Yuda, Hoceya ma wod Ela maku camu ker i Samaria wi Israel, man ecamu ker rundi abung’wen.

²Man etimo gin ma rac i wang’ Yehova, ento calu ubimo mir Israel m’ular ubedo ire ngo.

³Calmaneser m’ubimo mir Ascur ubino malu i kume; man Hoceya doko jatic pare, man ekelo ajok ire.

⁴Man ubimo mir Ascur unwang’u porolembe ma rac i Hoceya; kum eoro jukwenda ba So m’ubimo mi Misiri, man ethiero ajok ungo ni ubimo mir Ascur, calu naka ebedetimo ku ba rundi ku ba rundi: ka kumeno ubimo mir Ascur uciko bang’e, man etwie i odkol.

⁵Ubimo mir Ascur ulund ubino i ng’om ceke mba mba, man eidho malu ba Samaria, e etieke kud ali rundi adek.

⁶I rundi mir abung’wende pa Hoceya m’ubimo mir Ascur umaku Samaria, man eyaku Israel etero i Ascur, man ekethogi i Hala, man wi Habor, ma kulo mi Gozan, man i adhura mi Jumedi.

⁷Man ebedo kumeno, kum nyithindho mir Israel udubo ni Yehova Mungu migi, m’ukelogi malu kud i ng’om Misiri ku the cing’ Farao m’ubimo mi Misiri, man gilworo mungu mange,

⁸man giwotho i cik mi thek, ma Yehova bayu woko kud i wang’ nyithindho mir Israel, man mir ubimo mir Israel, ma giketho.

⁹Man nyithindho mir Israel gitimo mung’ mung’ gin m’ubedo atira ngo kum Yehova Mungu migi: e gigomo igi ka ma malu i adhura migi ceke, ugambre i ka ma malu mi jukur cil kum adhura ma tek;

¹⁰e giketho igi mbegi ku mungu m’araga wi ungulu gudi ma wiu kubang’e kubang’e, man the yen ceke m’uluk kubang’e kubang’e;

¹¹e giwang’u udok ma ng’wice ng’ar i ka ma malu ceke ma kuca, calu thek ma Yehova riemo woko i wang’gi timo; e gitimo gin mi dubo kara unyai ng’ecwiny i Yehova;

¹²e gitimo ni mungu m’araga ma Yehova wacu igi pire kumae, Kud wutim gin maeni.

¹³Ento Yehova tuco ni Israel, man ni Yuda, ku jubila ceke kubang’gi kubang’gi, man ku jueulembe ceke kubang’gi kubang’gi, ewacu kumae, Wulokru kud i yo mu ma rac, man wuwor lembang’ola para ku cik para, calku cik ceke m’ang’olo ni kwaruwu, man m’aoro i beng’wu ku jutic para man jubila.

¹⁴Ku maeni ceke, gikwero winjo, e gidwoko ng’utgi tek, calu ng’ut kwaru migi, m’uyio Yehova Mungu migi ngo.

¹⁵E gikwero cik pare, ku lembariba pare m’etimo ku kwarugi, ku lembatuca pare m’etuco igi; man gilubo lembe ma kite mbe, man gidoko ju ma kitgi mbe, man gilubo tok thek m’utiekogi gbur, ma Yehova ng’olo igi pigi nia ku gitim calu joca.

¹⁶E giweko lembang’ola ceke pa Yehova Mungu migi, man gitimo igi ayi gin m’acwia m’atwaga, en e nyithi dhiang’ ario, e gitimo mungu m’araga, man girwo ni udul ceke m’i polo, man gitimo ni Bal.

¹⁷Man giketho wotgi ku nyiggi ukadh kud i mac, man gilamu bila kud ajoga, e ging’ieuri gigi kara gitim gin ma rac i wang’ Yehova, kara ginyai ng’ecwiny i ie.

¹⁸Ka kumeno ng’ecwiny ma dit unego Yehova kum Israel, man ekabugi woko kud i wang’e: moko mbe m’udong’ ndhu suru pa Yuda kende.

¹⁹Yuda bende woro lembang’ola pa Yehova Mungu migi ngo, ento giwotho i cik mir Israel ma gitimo gin.

²⁰E Yehova kwero kodhi ceke mir Israel, man esendogi, e emiogi i cing’ junyoth, cil m’ebayugi ko kud i wang’e.

²¹Kum eng’enyo Israel kud i ot pa Daudi; e giketho Yeroboam ma wod Nebat ni ubimo: man Yeroboam unyebo Israel kum weko lubo Yehova, man eketho gidubo dubo ma dit.

²²Man nyithindho mir Israel uwotho i dubo ceke pa Yeroboam m’etimo; giwekogi ngo;

²³cil ma Yehova kabu ko Israel kud i wang’e, calu eyero ku dhu jutic pare ceke ma jubila. Kum kumeno juyaku Israel kud i ng’om migi ma dhe juterogi i Ascur cil i ceng’ ma tin.

²⁴Man ubimo mir Ascur ugamu dhanu kud i Babeli, man kud i Kutha, man kud i Ava, man kud i Hamath ku Sefarvaim, man ekethogi i adhura mi Samaria, kaka nyithindho mir Israel; e gimwonyo Samaria, man gibedo i adhurane.

²⁵E ebedo kumeno, i thekri mi bedo migi ma kuca, nia gilworo Yehova ngo: ka kumeno Yehova oro umvor i kindgi, m’unego kindgi moko.

²⁶Kum kumeno giyero ni ubimo mir Ascur, giwacu kumae, Thek m’iyaku, man iketho i adhura mi Samaria, ging’eyo cik mi mungu m’i ng’ombe ngo: ka kumeno eoro umvor i kindgi, man, nen, ginegogi, kum ging’eyo cik pa mungu m’i ng’ombe ngo.

²⁷Ubimo mir Ascur ulund ung’olo, ewacu kumae, Wudwok kind julam acel kuca ma wuyaku ku kuca; e wuwek gicidh gibed kuca, man wek eponjgi ku cik pa mungu m’i ng’ombe.

²⁸Kum kumeno ng’atu acel ma kind julam ma giyaku kud i Samaria ebino man ebedo i Beth-el, man eponjogi maram guwor ko Yehova.

²⁹Karacelo ku maeni thek ceke kubang’e kubang’e gitimo mungu migi ma dhe, man gikethogi i udi mi ka ma malu ma Jusamaria timo, ku ba thek i adhura migi ma gibedo i ie.

³⁰E dhanu mi Babeli gitimo Sukoth benoth, man dhanu mi Kuth gitimo Nergal, dhanu mi Hamath de gitimo Acima,

³¹man Juavi gitimo Nibhaz ku Tartak; man Jusefarvi giwang’u nyithindho migi ku mac ni Adramelek kud Anamalek, ma mungu mi Jusefarvi.

³²Kum kumeno gilworo Yehova, man gitimo igi julam kud i kindgi gigi mi ka ma malu, m’ulamu pigi i udi mi ka ma malu.

³³Gilworo Yehova, man gitimo ni mungu migi gigi, calu kura thek ma juyakugi kud i kindgi.

³⁴Cil i ceng’ ma tin gitimo calu kura ma kwong’a: gilworo Yehova ngo, kadok atima de gitimo ngo calku cik migi, kadi calku lembapoka migi, kadi calu cik kadi calu lembang’ola ma Yehova ng’olo ni nyithindho pa Yakobo, m’elwong’o ko nyinge Israel;

³⁵ma Yehova timo lembariba kugi, man eng’olo igi, ewacu kumae, Kud wulwor mungu mange, kadi kud wurum giwu igi, kadi kud wutim igi, kadi lam de kud wulam igi:

³⁶ento Yehova, m’ukelowu malu kud i ng’om mi Misiri ku tego ma dit man ku bote m’urieire, wulwore, man wurum giwu ire, man wulam lam ire:

³⁷man cik ku lembapoka, man cik ku lembang’ola, m’egoro iwu, wubiketho cwinywu i kumgi kara wutim mi nja; man kud wulwor mungu mange:

³⁸man lembariba ma watimo wakudu wiwu kud uwil pire; kadi mungu mange de kud wulwor:

³⁹ento wulwor Yehova Mungu mu; e ebibodhowu kud i cing’ judegi mu ceke.

⁴⁰Ento giwinjo ngo, ere gitimo calku kura migi ma kwong’a.

⁴¹Kum kumeno thek maeni lworo Yehova, man gitimo ni ayi m’acwia migi m’ang’ika; nyithindho migi bende kumeca, ku nyithindho mi nyithindhgi bende, calu kwaru migi timo, e gitimo kumeca cil i ceng’ ma tin.