Read Alur 2 Ubimo 2 Bible Online

2 Ubimo 2 - Alur bible

2 Ubimo 2

¹Man etimbre, kinde ma Yehova yenyo eting’ Elia malu ku vira i polo, nia Elia gicidho gikud Elica kud i Gilgal.

²Man Elia wacu ni Elica kumae, Akwei, dong’ keni: kum Yehova ora cik i Beth-el. Man Elica wacu kumae, Calu Yehova bedo kwo, man calu ng’eyong’ec peri bedo kwo, abiweki ngo. Kum kumeno giloro piny i Beth-el.

³E wot jubila ma ni i Beth-el giwok woko bang’ Elica, e giwacu ire kumae, Ing’eyo nia Yehova bigamu rwoth peri kud i wii tini? Man ewacu kumae, Eyo, ang’eyo; wuling’.

⁴Man Elia wacu ire kumae, Elica, akwei, dong’ keni; kum Yehova ora ba Yeriko. Man ewacu kumae, Calu Yehova bedo kwo, man calu ng’eyong’ec peri bedo kwo, abiweki ngo. Kum kumeno gibino Yeriko.

⁵Man wot jubila ma gini Yeriko gibino ceng’ni bang’ Elica, man giwacu ire kumae, Ing’eyo nia Yehova bigamu rwoth peri kud i wii tini? Man eloko lembe kumae, Eyo, ang’eyo; wuling’.

⁶Man Elia wacu ire kumae, Akwei, dong’ keni; kum Yehova ora i Yordan. Man ewacu kumae, Calu Yehova bedo kwo, man calu ng’eyong’ec peri bedo kwo, abiweki ngo. Man gin ario gicikucidho.

⁷Man dhanu pier abic ma kind wot jubila gicidho, e gicungo yor i bang’gi ku cen: man gin arione gicungo dhu Yordan.

⁸E Elia ting’o kanzu pare, man edole, egoyo ko pi, man gipokri kun ku kun, ketho nia gin ario gikadhu ku wi ng’om m’uthwo.

⁹Man etimbre, kinde ma gikadhu, nia Elia wacu ni Elica kumae, Penj gin m’atim iri, ma fodi jukugama ngo kud i beng’i. Man Elica wacu kumae, Akwei, wek maka tiponi bed i wia wang’ ario.

¹⁰Man ewacu kumae, Ipenjo gin ma tek: ento, tek inena kinde ma jugama kud i beng’i, ebibedo kumeno iri; ento tek ungo, ebibedo kumeno ngo.

¹¹Man etimbre, ka gibecikucidho, man giweco, nia, nen, magali mi mac uwok, ku riuni mi mac, m’upoko kindgi; e Elia idho malu ku vira i polo.

¹²Man Elica neno maeni, ekok de kumae, Vwa, vwa, magali mir Israel ku weg riuni de! Man enene kendo ngo: e emaku kendi pare ma dhe, man eyeco ie bwa.

¹³Eting’o kanzu pa Elia bende m’upodho ire, e edok, man ecungo dhu Yordan.

¹⁴Man eting’o kanzu pa Elia m’upodho ire, egoyo ko pi, man ewacu kumae, Yehova ni kani, Mungu pa Elia? man kinde ma en bende egoyo pi, gipokri kun ku kun; e Elica kadhu lokani.

¹⁵Man kinde ma wot jubila ma gini i Yeriko ma yor i bang’e ginene, giwacu kumae, Tipo pa Elia udong’ wi Elica. E gibino rombo kude, man girum i wang’e arieba wang’gi.

¹⁶E giwacu ire kumae, kawono nen, dhanu ma jutego pier abic gini ku jutic peri; Wakwei, wek gicidhi, man giyeny rwoth peri, kuno nyo Tipo Yehova ting’e, man ebole wi got moko, kadi i poga moko. Man ewacu kumae, Wubioro ngo.

¹⁷Man ka gicuke maram lewic umake ko, ewacu kumae, Wuor. Ka kumeno gioro dhanu pier abic; e giyenyo ceng’ adek, ento ginwang’e ngo.

¹⁸E gidwogo i bang’e, kinde m’erio i Yeriko; man ewacu igi kumae, Awacu iwu ngo kumae, Kud wucidhi?

¹⁹Man dhanu mir adhura giwacu ni Elica kumae, Nen, wakwei, kar adhura maeni bedo ber, calu rwoth para neno: ento pi rac man ng’om unyothre.

²⁰E ewacu kumae, Wukel cupa ma nyen i bang’a, man wuketh kadu i ie. E gikele i bang’e.

²¹Man ecidho dhu kulo mi pi, e ekonjo kadu i ie, man ewacu kumae, Yehova wacu kumae, Acangu pi maeni; tho biwok kendo ngo ku i maeni kadi nyothre.

²²Kum kumeno pi cangu cil i ceng’ maeni, calku lembe pa Elica m’eyero.

²³Man eai ku keca ecidho Beth-el; man kinde m’ebeidho malu kud i yo, awia ma co giai i adhurane, man ging’iere e giwacu ire kumae, Idh malu, in ma wii wang’; idh malu, in ma wii wang’.

²⁴E eneno yor i ng’eye man enenogi, e elamugi i nying’ Yehova. Man rnegi wai ario uai i luli, e giyeco kind awia ma cone pier ang’wen wi ario.

²⁵E eai keca ecidho kum got Karmel, man ku keca edwogo Samaria.