Read Alur 2 Ubimo 20 Bible Online

2 Ubimo 20 - Alur bible

2 Ubimo 20

¹I ceng’ maeca kum Hezekia lith cil mi tho. E Isaya ma jabila ma wod Amoz ubino i bang’e, man ewacu ire kumae, Yehova wacu kumae, Ng’ol lembe mi ot peri; kum ibitho, man ibibedo kwo ngo.

²Elund eloko wang’e yor i kor ot, man erwo ni Yehova, ewacu kumae,

³Kawono poi, E Yehova, akwei, maram awotho ko i weng’i i lemandha man kud adunde ma ndhu cu, man atimo gin m’ubedo ber i weng’i. E Hezekia ywak dit.

⁴E etimbre, ma fodi Isaya kucidho i dier adhura ngo, nia lembe pa Yehova bino i bang’e, m’uwacu kumae,

⁵Lokri, man iwac ni Hezekia ma jatelwic mi dhanu para kumae, Yehova, ma Mungu pa Daudi ma kwaru, wacu kumae, Awinjo rwo peri, aneno piweng’i: nen, abicengi; i ceng’ mir adege ibiidho malu ba ot pa Yehova.

⁶E abimedo rundi apar wi abic kum nindo peri; man abibodhi kud adhura maeni kud i cing ubimo mir Ascur; man abigwoko adhura maeni pira, man pi jatic para ma Daudi.

⁷E Isaya wacu kumae, Ting’ kwendubolo. E giting’e man gikethe wi vur, e ecangu.

⁸Man Hezekia wacu ni Isaya kumae, Giranyutha ang’o m’unyutho nia Yehova bikeyo kuma, man nia abiidho malu ba ot pa Yehova i ceng’ mir adege?

⁹Man Isaya wacu kumae, Maeni bibedo ni giranyutha iri m’uai ba Yehova, nia Yehova bitimo gin m’eyero pire: tipo bicidho acidha dakutielo apar, kadi ebidok cen dakutielo apari?

¹⁰E Hezekia loko lembe kumae, En e gin ma yot ni tipo tek ecidho acidha dakutielo apar: ungo, ento wek tipo dok cen dakutielo apar.

¹¹E Isaya ma jabila lwong’o Yehova; man edwoko tipo cen dakutielo apar, m’eloro ko piny wi jampor pa Ahaz.

¹²I nindo maeca Berodak-baladan ma wod Baladan, m’ubimo mi Babeli, uoro waraga ku giramia ni Hezekia; kum ewinjo nia naka kum Hezekia lith.

¹³E Hezekia winjo dwandgi, man enyutho igi ot ceke mi gin pare ma pire tek, mola ma tar, ku mola ma kwar, ku yath ma jwa jwa, man mo ma pire tek, ku ot mi jambali pare, ku gin ceke ma junwang’u i piny m’akana pare: gin moko mbe m’udong’ i ot pare, kadi i ker pare ceke, ma Hezekia kunyutho igi ngo.

¹⁴Isaya ma jabila lund ubino bang’ ubimo ma Hezekia, man ewacu ire kumae, Dhanu maeni giwacu ang’o? gibino i beng’i ku kani? Man Hezekia wacu kumae, Giai i ng’om ma bor, cil i Babeli.

¹⁵Man ewacu kumae, Gineno ang’o i ot peri? E Hezekia loko lembe kumae, Gineno gin ceke ma ni i ot para: gin moko mbe i kind piny m’akana para ma k’anyutho igi ngo.

¹⁶Man Isaya wacu ni Hezekia kumae, Winj lembe pa Yehova.

¹⁷Nen, ceng’ ubino, nia gin ceke ma ni i ot peri, ku gin ma kwaru gikanu cil i ceng’ maeni, jubiyaku cidho i Babeli: gin moko mbe ma bidong’, Yehova wacu.

¹⁸Man woti ma biai i beng’i, m’ibinyolo, gibiyakugi; e gibibedo jumusuma i odker p’ubimo mi Babeli.

¹⁹Hezekia lund uwacu ni Isaya kumae, Lembe pa Yehova m’iyero e dre. Ewacu mange kumae, Kumeno ngo, tek kwiocwiny ku lemandha bibedo nuti i ceng’ para?

²⁰Nie dong’ tic pa Hezekia, ku tego pare ceke, man maram etimo ko kut, ku soro mi pi, man maram ekelo ko pi i adhura, gigore i kitabu mi lemkei p’ubimo mi Yuda ngo?

²¹Man Hezekia nindo ku kwaru pare; man Manase ma wode camu ker kakare.