Read Alur 2 Ubimo 21 Bible Online

2 Ubimo 21 - Alur bible

2 Ubimo 21

¹Manase rundi pare apar wi ario kinde m’emaku camu ker; man ecamu ker rundi pier abic wi abic i Yerusalem: man nying’ min mire Hefziba.

²E etimo gin m’ubedo rac i wang’ Yehova, calku ginmajudagu mi thek ma Yehova bayu woko kud i wang’ nyithindho mir Israel.

³Kum egomo ka ma malu kendo ma Hezekia ma won unyotho; man eting’o pemblam ni Bal, man etimo mungu m’araga, calu Ahab m’ubimo mir Israel utimo, man erwo ni udul m’i polo ceke, etimo igi de.

⁴Man eguro pemblam i ot pa Yehova, ma Yehova yero pire kumae, Abiketho nyinga i Yerusalem.

⁵Man eguro pemblam ni udul m’i polo ceke i lelagang’ ario mi ot pa Yehova.

⁶Man eketho wode kadh kud i mac, etimo ajoga de, man elamu bila, man etimo ku ju ma gi weg tipo, ku weg ajoga de: e etimo dubo ma dit i wang’ Yehova, kara unyai ng’ecwiny i ie.

⁷Man eketho ayi mungu m’araga m’acwia m’ang’ika, m’etimo, i ot ma Yehova wacu ni Daudi man ni Suleman ma wode kumae, I ot maeni, man i Yerusalem, m’agoyo wie kud i suru mir Israel ceke, abiketho nyinga mi nja;

⁸kadok tiend Israel de abiketho wi woth kendo ngo kud i ng’om m’amio ni kwaru migi, tek gibiketho cwinygi kum timo calku gin ceke m’ang’olo igi kende, man calku cik ceke ma jatic para ma Musa ng’olo igi.

⁹Ento giwinjo ngo: man Manase bidhogi kum timo gin m’ubedo rac ma sagu ma thek utimo ma Yehova nyotho i wang’ nyithindho mir Israel.

¹⁰Man Yehova yero ku dhu jutic pare ma jubila, ewacu kumae,

¹¹Kum Manase m’ubimo mi Yuda timo ginmajudagu maeni, man edubo ma sagu gin ceke ma Juamori timo, ma gilar giwok ire, man eketho Yuda bende dubo ku mungu m’araga pare;

¹²ka kumeno Yehova, Mungu mir Israel, uwacu kumae, Nen, akelo lem ma rac ma kumeni wi Yerusalem ku Yuda, ma ng’atu ma tek uwinjo pire, ithe ario biwoi.

¹³E abirieyo uno mi Samaria wi Yerusalem, man lelo m’i ot pa Ahab; man abiyweyo Yerusalem calu ng’atu m’uyweyo sani, m’uyweyo ie man eloko there malu.

¹⁴Man abibayu dong aba para, man abimiogi i cing’ judegi migi; e gibidoko ni amaci man ayeki ni judegi migi ceke;

¹⁵kum gitimo gin ma rac i wang’a, man ginyayu ng’ecwiny i ia, ugambre i ceng’ ma kwaru migi wok ie woko kud i Misiri, cil i ceng’ ma tin.

¹⁶Mange de Manase cwiro rimo dit hai ma dubone mbe, maram epong’o ko Yerusalem kun ku kun; umedo dubo pare m’eketho Yuda dubo kudo, kutimo maeno m’ubedo rac i wang’ Yehova.

¹⁷Nie dong’ tic pa Manase, ku gin ceke m’etimo, ku dubo pare m’edubo, gigore i kitabu mi lemkei mir ubimo mi Yuda ngo?

¹⁸E Manase nindo ku kwaru pare, man juyike i podho mi ot pare gire, i podho pa Uza: e Amon ma wode camu ker kakare.

¹⁹Amon rundi pare pier ario wi ario kinde m’emaku camu ker; man ecamu ker rundi ario i Yerusalem: man nying’ min mire Meculemeth ma nya Haruz ma Yotba.

²⁰E etimo gin ma rac i wang’ Yehova, calu Manase ma won utimo.

²¹Man ewotho i yo ceke ma won mire wotho i ie, man etimo ni mungu m’araga ma won utimo igi, erwo i bang’gi de:

²²e eweko Yehova, Mungu pa kwaru pare, man ewotho ngo i yo pa Yehova.

²³E jutic pa Amon giporo lembe i kume, man ginego ubimo i ot pare ma dhe.

²⁴Ento dhanu m’i ng’om ginego dhanu ceke m’uporo lembe i kum ubimo ma Amon; man dhanu m’i ng’om giketho Yosia ma wode ni ubimo kakare.

²⁵Nie dong’ tic pa Amon m’etimo, gigore ngo i kitabu mi lemkei mir ubimo mi Yuda?

²⁶Man juyike i odliel pare i podho pa Uza: man Yosia ma wode camu ker kakare.