Read Alur 2 Ubimo 25 Bible Online

2 Ubimo 25 - Alur bible

2 Ubimo 25

¹Man Zedekia jai ni ubimo mi Babeli. Man etimbre i rundi mir abung’wende mi camuker pare, i dwi mir apaje, i ceng’ mir apaje mi dwije, nia Nebukadnezar m’ubimo mi Babeli bino, en ku njuru asikari pare ceke, kum Yerusalem, e egonjo i kume; man gigomo ot ma tek i kume utieke gbur.

²Kum kumeno jutieko adhurane kud ali cil i rundi apar wi acende p’ubimo Zedekia.

³I ceng’ mir abung’wende mi dwi mir ang’wende ndru bedo tek dit i adhurane, ketho nia kwen moko mbe ni dhanu m’i ng’ombe.

⁴Gilund gimoro adhurane, man dhanu mir ali ceke giringo ku diewor ku yo dhugang’ i kind gang’kidi ario, ma ni i ng’et podho p’ubimo (nwang’u Jukaldayo gibedo kum adhurane gbur); man ubimo cidho yo ba Araba.

⁵Ento njuru asikari mi Jukaldayo gilubo tok ubimo, man girube i pambu mi Yeriko; e njuru asikari pare ceke gilal i kume.

⁶Gilund gimaku ubimo, man gitere malu bang’ ubimo mi Babeli i Ribla; e gipoko lembe i wie.

⁷Man ginego wot Zedekia i wang’e, man giloyo wang’ Zedekia, gitwie de ku nyoro, man gitere i Babeli.

⁸Nie i dwi mir abije, i ceng’ mir abirone mi dwije, ma en e rundi apar wi abung’wende p’ubimo Nebukadnezar, m’ubimo mi Babeli, Nebuzaradan ma jego mi jukur, ma jatic p’ubimo mi Babeli, ubino Yerusalem.

⁹Man ewang’u ot pa Yehova ku ot p’ubimo; ku udi ceke mi Yerusalem, en e udi ceke ma dongo kubang’e kubang’e, ewang’u ku mac.

¹⁰Man njuru asikari ceke mi Jukaldayo, ma ni karacelo ku jego mi jukur, girwombo gang’kidi mi Yerusalem m’utieke gbur piny.

¹¹Man dong’ dhanu m’udong’ i adhura, ku ju m’upiei, m’umondo ni ubimo mi Babeli, ku dong udul dhanu, Nebuzaradan ma jego mi jukur uterogi ni ng’eca.

¹²Ento jego mi jukur uweko dhanu ma sai m’i ng’om kara ubed ni juyik kum ulok man ni juti podho.

¹³Man mbegi mi mola ma ni i ot pa Yehova, man thepiny ku nam mi mola ma ni i ot pa Yehova, Jukaldayo gituro nziki nziki, man gitero molane i Babeli.

¹⁴Man agulu, kud upal kwer, man makasi, ku lupau, kud agulu ceke mi mola ma gitimo kudo, giyaku.

¹⁵Man tabumac, ku tabu, gin ma mi mola ma kwar, i mola ma kwar, man gin ma mi mola ma tar, i mola ma tar, jego mi jukur uyaku.

¹⁶Mbegi ario, nam acel, ku there, ma Suleman utimo mi ot pa Yehova, mola mir agulu maeni ceke bedo ma kaporne mbe.

¹⁷Kabor mi mbegi acel bot apar wi abora, kud uthac mi mola ma ni i wie: man kabor mir uthacne bot adek, ku voi man nyingulemo wi uthacne gbur, ceke mi mola: man calu maeni mbegi mir arionde bedo ku jamtic mi voi.

¹⁸Man jego mi jukur ugamu Seraya ma jalam ma dit, ku Zefania ma jalam mir arionde, man juadek ma jugwokdhugola;

¹⁹man egamu jego kud i adhura ma juketho wi dhanu mir ali; man dhanu abic ma kind ju ma neno wang’ ubimo, ma junwang’ugi i adhura; man jagorcik, ma jego mir udul, ma coko dhanu m’i ng’ombe; ku dhanu pier abusiel mi dhanu m’i ng’ombe, ma junwang’u i adhura.

²⁰Man Nebuzaradan ma jego mi jukur ugamugi, man ekelogi bang’ ubimo mi Babeli i Ribla.

²¹Man ubimo mi Babeli ugoyogi, man enegogi i Ribla i ng’om mi Hamath. Kum kumeno juyaku Yuda ni ng’eca kud i ng’om pare.

²²Man pi dhanu m’udong’ i ng’om Yuda, ma Nebukadnezar m’ubimo mi Babeli weko, eketho Gedalia ma wod Ahikam, ma wod Cafan, ni jabim i wigi.

²³Nie kinde ma jego ceke mir udul asikari, gin ku dhanu migi, giwinjo nia ubimo mi Babeli ketho Gedalia ni jabim, gibino ba Gedalia i Mizpa, en e Icmael ma wod Nethania, man Yohanan ma wod Kareya, man Seraya ma wod Tanhumeth ma Janetofathi, ku Yazania ma wod Jamakathi, gin ku dhanu migi.

²⁴Man Gedalia kwong’o igi man ni dhanu migi, ewacu igi kumae, Lworo kud unegwu kum jutic mi Jukaldayo: wubed i ng’ombuni, man wutim ni ubimo mi Babeli, e lembe mu bibedo ber.

²⁵Ento etimbre i dwi mir abirone, nia Icmael ma wod Nethania, ma wod Elicama mi kodhi ker, ubino, giku dhanu apar, man gigoyo Gedalia, ketho nia etho, man Juyahudi ku Jukaldayo ma gini kude i Mizpa.

²⁶Man dhanu ceke, ma thindho ku ma dongo de, ku jego mi njuru asikari, giai, man gibino Misiri; kum lworo negogi kum Jukaldayo.

²⁷Man etimbre i rundi pier adek wi abirone mi ng’eca pa Yehoiakin m’ubimo mi Yuda, i dwi apar wi arionde, i ceng’ pier ario wi abirone mi dwije, nia Evilmerodak m’ubimo mi Babeli, i rundi m’emaku camu ie ker, eting’o wi Yehoiakin m’ubimo mi Yuda kud i odkol;

²⁸man giweco ber gikude, man eketho komker pare malu ma sagu komker mir ubimo ma gini kude i Babeli,

²⁹man eloko kendi pare mi odkol. Man Yehoiakin ucamu kwen i wang’e thiri thiri i nindo ceke m’ebedo ie kwo:

³⁰man pir ajok pare, ubimo mio ire ajok ma thiri thiri, ku ba ceng’ ajok acel ku ba ceng’ ajok acel, i nindo ceke m’ebedo ie kwo.