Read Alur 2 Ubimo 5 Bible Online

2 Ubimo 5 - Alur bible

2 Ubimo 5

¹Nie Naman, ma jego mir udul p’ubimo mi Cami, en e ng’atu ma dit i wang’ rwoth pare, man mi yung, kum Yehova mio aloci ni Cami ni kume: en e ng’atu ma tek ma jarukara bende, ento en e won joi.

²Man Jucami gicidho ni udul udul, man giyaku nyathi nyaku kud i ng’om Israel ni ng’eca; e etimo ni dhaku pa Naman.

³Man ewacu ni mege pagi kumae, A dok ande rwoth para ni ba jabila ma ni i Samaria! kuno di ecangu joi pare.

⁴Man ng’atu acel umondo, eyero de ni rwoth pare, ewacu kumae, Nyaku m’uai i ng’om mir Israel uwacu kuman kuman.

⁵Ubimo mi Cami uwacu kumae, Kawono cidhi, man abioro waraga ni ubimo mir Israel. E etugo woth, man eting’o talanto mi mola ma tar apar ecidho ko, ku cekel mi mola ma kwar rubanga abusiel, man kendi m’alawa apar.

⁶E ekelo waragane ni ubimo mir Israel, ewacu kumae, Man kawono kinde ma waraga maeni tundo i beng’i, nen, aoro Naman ma jatic para i beng’i, kara icang joi pare.

⁷E etimbre, kinde m’ubimo mir Israel usomo waragane, nia eyeco kendi pare, man ewacu kumae, An a Mungu, ma nia anego man aketho bedo kwo, m’uketho ng’atuni oro lembe i bang’a ya acang joi mi kum dhanu? ento akwayuwu, iwu pid man wunen maram eyenyo ko lembe i kuma.

⁸Man ebedo, kinde ma Elica ma dhanu pa Mungu uwinjo nia ubimo mir Israel uyeco kendi pare, nia eoro kwenda bang’ ubimone, ewacu kumae, Nedi iyeco kendi peri? wek ebin kawono i bang’a, man ebing’eyo nia jabila nuti i kind Israel.

⁹Kum kumeno Naman ubino ku riuni pare man ku magali pare, man ecungo dhugola mi ot pa Elica.

¹⁰E Elica uoro jakwenda i bang’e, ewacu kumae, Cidh ilog i Yordan wang’ abiro, e ring’kumi bidwogo kendo i beng’i, man ibibedo leng’.

¹¹Ento kwinyo nego Naman, man ecidho cen, ewacu kumae, Nen, ia wacu kumae, Ebiwok woko i bang’a andha, e ebicungo, man ebilwong’o nying’ Yehova Mungu pare, ebiwiro cinge de wi katho, man ebicangu won joi.

¹²Abana ku Farpar, ma kulo mi Dameski, gi ber ma sagu kulo mir Israel ceke ngo? acopo logo i igi ngo, man abed leng’i? Kum kumeno elokre man ecidho cen ma kwinyo nege.

¹³E jutic pare eoro ceng’ni, man giweco i bang’e, giwacu de kumae, Vwa, tek jabila wacu iri itim gin moko ma dit, itime ngo? ma sagu dit ungo, kan ewacu iri kumae, Logi, man ibed leng’i?

¹⁴Elund eloro piny, man erony gire wang’ abiro i Yordan, calku lembe ma dhanu pa Mungu wacu; man ring’kume dwogo kendo calu ring’kum nyathin ma nok e ebedo leng’.

¹⁵E edwogo ba dhanu pa Mungu, en kud udul pare ceke, e ebino, man ecungo i wang’e; ewacu de kumae, Nen, kawono ang’eyo nia Mungu moko mbe i ng’om ceke, ndhu i kind Israel: ka kumeno kawono, akwei, gam giramia ba jatic peri.

¹⁶Ento ewacu kumae, Calu Yehova bedo kwo, m’acungo i wang’e, abigamu moko ngo. E ecung’e ya egam; ento ekwero.

¹⁷E Naman uwacu kumae, Tek ungo, ento, akwei, wek jumi ng’om ter ario ma romo kana ni jatic peri; kum ugambre kawono jatic peri bithiero kadok lam m’awang’a kadi lam de ngo ni mungu mange, ndhu ni Yehova.

¹⁸I lembe maeni Yehova wek kier pa jatic peri: kinde ma rwoth para mondo i ot pa Rimon kara erwo kuca, man ejeng i cinga, man arum gira i ot pa Rimon, kinde m’arum gira i ot pa Rimon, Yehova wek kier pa jatic peri i gin maeni.

¹⁹Man ewacu ire kumae, Cidh ma cwinyi kwio. Kum kumeno eai kud i bang’e nyanok.

²⁰Ento Gehazi, ma jatic pa Elica ma dhanu pa Mungu, wacu kumae, Nen, rwoth para weko Naman ma Jacami maeni, kum gamu gin m’ekelo i cinge ngo: calu Yehova bedo kwo, abiringo i toke, man abigamu gin moko i bang’e.

²¹Kum kumeno Gehazi lubo tok Naman. Man ka Naman uneno ng’atu acel ubering’ni i toke, eloro piny ku wi magali pare kara eromb kude, man ewacu kumae, Lembe ceke bedo beri?

²²Man ewacu kumae, Lembe ceke bedo ber. Rwoth para ora, ewacu kumae, Nen, kawono nini awobi ario ma wot jubila giwok i bang’a kud i ng’om gudi pa Efraim; akwei, mi igi talanto mi mola ma tar, ku kendi m’alawa ario.

²³Man Naman uwacu kumae, Gam talanto ario ku mutoro. E ecung’e, man etwio talanto ario mi mola ma tar i usau ario, ku kendi ario m’alawa, man ekethogi wi jutic pare ario; e giyeyogi i wang’e.

²⁴E kan etundo ba got, egamugi kud i cing’gi, man ekethogi i ot; e eweko dhanu cidho, man gidok.

²⁵Ento emondo, man ecungo i wang’ jadit pare. E Elica wacu ire kumae, Iai kani, Gehazi? Man ewacu kumae, Jatic peri cidho kamoko ngo.

²⁶Man ewacu ire kumae, Adundena cidho kudi ngo, kinde ma ng’atuca lokre ku i magali pare kara eromb kudi? En e nindo ma jugamu ie sente, ma jugamu ie kendi de, ku podho ulam man podho mir ulok, ku rombe man koni dhiang’ ku jumiru man bong’i?

²⁷Ka kumeno joi pa Naman bimoko i kumi, man kum kodhini mi nja. Man eai kud i vute m’e won joi ma tar calu pei.