Read Alur 2 Ubimo 6 Bible Online

2 Ubimo 6 - Alur bible

2 Ubimo 6

¹Man wot jubila giwacu ni Elica kumae, Kawono nen, ka ma wabedo ie i weng’i e diny ma sagu iwa.

²Wakwei, dong’ wacidhu i Yordan, man wagam kuca ku ba dhanu ceke ng’atuman yen acel, man wek watim iwa kabedo keca, ka ma wacopo bedo i ie. Man eloko lembe kumae, Wucidhi.

³Man ng’atu acel uwacu kumae, Akwei, bed ku mutoro m’icidh ko ku jutic peri. Man eloko lembe kumae, Abicidho.

⁴Kum kumeno gicidho gikugi. Man ka gibino ba Yordan, ging’olo yen.

⁵Ento ka ng’atu acel ubeng’olo yen, wi lei upodho i pi; man ekok, ewacu de kumae, Akayo, rwoth para! kum jugame ni banja.

⁶E dhanu pa Mungu wacu kumae, Epodho kani? Man enyutho ire kakare. E etong’o yen, ebole keca, man eketho umbune liero ku wi pi.

⁷E ewacu kumae, Game i beng’i. Kum kumeno erieyo cinge, man egame.

⁸Nie ubimo mi Cami ubetimo ali kum Israel; man giporo lembe giku jutic pare, ewacu kumae, Kagonjo para bibedo i ka ma nyo ku ka ma nyo.

⁹E dhanu pa Mungu oro lembe bang’ ubimo mir Israel, ewacu kumae, Bed ku weng’i nia kud ikadh ka ma nyo; kum Jucami beloro piny keca.

¹⁰E ubimo mir Israel uoro kwenda i ka ma dhanu pa Mungu yero ire pire m’etwong’e ko pire; e ebodhre gire kuca, wang’ acel kende ngo kadi wang’ ario de ngo.

¹¹E adunde ubimo mi Cami udieng’ dit kum gin maeni; man elwong’o jutic pare, ewacu igi de kumae, Wubinyutho ira ngo nia ng’a m’i kindwa ma en e jabang’ ubimo mir Israeli?

¹²E ng’atu acel ma kind jutic pare wacu kumae, Ungo, rwoth para, E ubimo; ento Elica, jabila ma ni i kind Israel, eyero ni ubimo mir Israel lembe m’iweco ku i kusika mi kavuto peri.

¹³E ewacu kumae, Cidhi man inen ka m’ebedo i ie, kara aor kwenda man agame. E juyero ire, juwacu kumae, Nen, eni i Dothan.

¹⁴Ka kumeno eoro riuni kuca ku magali, man udul ma dit: e gibino ku diewor, man gitieko adhura gbur.

¹⁵E kinde ma jatic pa dhanu pa Mungu uai pir kugweno, man ewok woko, nen, udul utieko adhurane ku riuni man magali, E jatic pare wacu ire kumae, Aka, rwoth para! wabitimo nenedi?

¹⁶E eloko lembe kumae, Lworo kud unegi; kum ju ma gini i bang’wa sagu ju ma ni kugi.

¹⁷E Elica rwo, man ewacu kumae, Yehova, akwei, yab wang’e, kara enen. E Yehova yabu wang’ jalawobine; e eneno: man, nen, got upong’ ku riuni ku magali mi mac m’utieko Elica gbur.

¹⁸E kinde ma giloro piny i bang’e, Elica rwo ni Yehova, man ewacu kumae, Akwei, goi dhanu maeni ku coro wang’. E egoyogi ku corowang’ calku lembe pa Elica.

¹⁹E Elica wacu igi kumae, Maeni yo ngo, kadok adhura de eni ngo; wulub ng’eya, man abiterowu ba ng’atu ma wuyenyo. E eterogi Samaria.

²⁰Man etimbre, kinde ma gibino Samaria, nia Elica wacu kumae, Yehova, yab wang’ dhanu maeni, kara ginen. Man Yehova yabu wang’gi, e gineno; man, nen, gini i die Samaria.

²¹E ubimo mir Israel uwacu ni Elica kumae, kinde m’enenogi, Vwa, abigoyogi? abigoyogi?

²²E eloko lembe kumae, Ibigoyogi ngo: igoyo ju m’imaku ni ng’eca ku palamularu peri man kud atum peri? keth kwen ku pi i wang’gi, kara gicam gimadh de, man gidok ba rwoth migi.

²³E eyiko cemo ma dit igi; e kinde ma gicamu gimadhu de, eorogi gicidho, e gidok ba rwoth migi. E udul mi Cami bino kendo ngo i ng’om mir Israel.

²⁴Man etimbre yo ng’ei maeni, nia Ben-hadad m’ubimo mi Cami ucoko udul pare ceke, man eidho malu, e etieko Samaria.

²⁵E ndru ma dit ni i Samaria: man, nen, gitieke kud ali, maram jumaku ng’iewo ko wi kana ku cekel mi mola ma tar pier abora, man ng’et mukero mir ang’wende mi weyo mir akuru mi cekel mi mola ma tar abic.

²⁶Man kinde m’ubimo mir Israel ubekadhu ku wi gang’lddi, dhaku acel uywak i bang’e, ewacu kumae, Kony, rwoth para, E ubimo.

²⁷Man ewacu kumae, Tek Yehova konyi ngo, e ka an ke abikonyi nenedi? kud i lelacam, kadi kud i pany mi pigukki?

²⁸E ubimo wacu ire kumae, Gin moko betimi? Man eloko lembe kumae, Dhaku maeni wacu ira kumae, Mi wodi, kara wacame tin, man wabicamu woda urwo.

²⁹Kum kumeno watedo woda, man wacame: e awacu ire urwone kumae, Mi wodi, kara wacame; e ekanu wode.

³⁰E etimbre, kinde m’ubimo winjo lembe pa dhakune, nia eyeco kendi pare (nwang’u ebekadhu ku wi gang’); e dhanu gineno, man, nen, ebedo ku gonia yor i ie wi ring’kume.

³¹Elund ewacu kumae, Mungu tim kumeni i kuma, man mange bende, tek wi Elica ma wod Cafat ucungo i kume tin.

³²Ento Elica bedo i ot pare, man judongo gibedo karacelo kude; e ubimo oro ng’atu acel kud i wang’e: ento ka fodi jakwenda tundo i bang’e ngo, ewacu ni judongo kumae, Wunen maram wod jakwor maeni oro ko kwenda kara ukab wia woko? nen, ka jakwendane bino, cik dhugola, man wutiel dhugola ki ire: batiend rwoth pare ni i ng’eye ngo?

³³E kinde ma fodi ebeweco i bang’gi, nen, jakwendane loro piny i bang’e: e ewacu kumae, Nen, gin ma rac maeni ai ba Yehova; nedi akur Yehova asu?