Read Alur 2 Ubimo 7 Bible Online

2 Ubimo 7 - Alur bible

2 Ubimo 7

¹E Elica wacu kumae, Wuwinj lembe pa Yehova: Yehova wacu kumae, Urwo calu unyoni mukero mi mogo ma yom jubing’iewo ku cekel acel, man mukero ario mi nganu jubing’iewo ku cekel acel, i dhugang’ mi Samaria.

²Jego m’ubimo jeng’ i cinge ulund uloko lembe ni dhanu pa Mungu, man ewacu kumae, Nen, tek Yehova timo wang’ot i polo, e maeni copo bedo? Man ewacu kumae, Nen, ibinene ku weng’i, ento ibicamu kume ngo.

³Nwang’u dhanu ang’wen ma weg joi gini kamondo mi dhugang’: e giwecri i kindgi kumae, Nedi wabedo keni maram watho ko?

⁴Tek wawacu kumae, Wabimondo i adhura, ndru lund ubedo i adhura, e wabitho kuca; man tek wabedo asu keni, de wabitho. Ka kumeno kawono wubin, e wek wapodhu bang’ udul mi Jucami: tek gibodhowa ma kwo, wabibedo kwo; man tek ginegowa, de wabitho.

⁵E giai malu ma fodi piny col col, kara gicidh ba kagonjo mi Jucami; e kinde ma giwok i ng’et kagonjo mi Jucami ma yo woko, nen, ng’atu moko mbe kuca.

⁶Kum Rwoth uketho udul Jucami uwinjo ba magali, man ba riuni, en e bang’ udul ma dit: e giwecri gigi kumae, Nen, ubimo mir Israel umio agama ni ubimo mi Juhiti, kud ubimo mi Jumisiri i kumwa, kara gibin i wiwa.

⁷Kum kumeno giai man giringo ma fodi piny col col, e giweko hema migi, ku riuni migi, man kana migi, cil kagonjo calu ebedo, e giringo pi kwo migi.

⁸E kinde ma weg joi maeni gibino ba ng’et kagonjo ma yo woko, gimondo i hema acel, e gicamu gimadhu de, man gicoko mola ma tar, ku mola ma kwar keca, ku kendi, e gicidho gikane; man gidwogo gimondo i hema mange de, e gicoko ma keca bende, man gicidho gikane.

⁹E gilund giwecri gigi kumae, Watimo dre ngo; ceng’ maeni en e ceng’ mi rwonglembe ma ber, man wabedo ling’: tek wagalu cil ma piny uru ko, e lembe bipodho i wiwa; ka kumeno kawono wubin, wek wacidhu wayer ni juot p’ubimo.

¹⁰Kum kumeno gibino man gilwong’o ba jakur dhugola mir adhurane; e giyero igi, giwacu kumae, Wabino ba kagonjo mi Jucami, man nen, ng’atu moko mbe ma ni kuca, kadok dwand dhanu, ento riuni m’ubedo atwia, ku kana de m’atwia, ku hema calu gibedo.

¹¹E elwong’o jukur dhugola; e giyero maeni ba juot p’ubimo ma yor i ie.

¹²E ubimo ai malu ku diewor, man ewacu ni jutic pare kumae, Abinyutho iwu kawono gin ma Jucami gitimo i bang’wa. Ging’eyo nia kec ubenegowa; ka kumeno giai kud i kagonjo kara gipond i thim, giwacu kumae, Kinde ma giwok woko kud i adhura, e wabimakugi ma kwo, e wabimondo i adhurane.

¹³Man ng’atu acel ma kind jutic pare loko lembe man ewacu kumae, Akwei, wek jumoko gam riuni abic m’udong’, ma juweko i adhura (nen, gibedo calu udul ceke mir Israel m’udong’ i ie; nen, gibedo calu udul ceke mir Israel m’uthum); e wek waor wanen de.

¹⁴Ka kumeno gigamu magali ario ku riuni; e ubimo oro tok udul Jucami, ewacu kumae, Wucidh wunen.

¹⁵E gilubo tokgi cil kum Yordan; man, nen, yo ceke pong’ ku kendi man agulu, ma Jucami bayu i ng’wec migi. E jukwenda gidwogo, man giyero ni ubimo.

¹⁶E dhanu giwok woko, man giyaku kagonjo mi Jucami. Kum kumeno mukero mi mogo ma yom jung’iewo ku cekel acel man mukero ario mi nganu jung’iewo ku cekel acel calku lembe pa Yehova.

¹⁷Man ubimo goyo wi jego m’ejeng’ i cinge ugwok dhugang’; man dhanu ginyone i dhugang’, e etho calu dhanu pa Mungu wacu, m’uyero kinde m’ubimo loro piny i bang’e.

¹⁸Man etimbre, calu dhanu pa Mungu yero ni ubimo, m’ewacu kumae, Mukero ario mi nganu jubing’iewo ku cekel acel man mukero mi mogo ma yom jubing’iewo ku cekel acel urwo ceng’ni i kinde maeni i dhugang’ mi Samaria;

¹⁹e jego maeno loko lembe ni dhanu pa Mungu, man ewacu kumae, Kawono, nen, tek Yehova bitimo wang’ot i polo, wadi gin maeni copre? e ewacu kumae, Nen, ibineno maeni ku weng’i, ento ibicamu kume moko ngo:

²⁰etimbre cil kumeca i kume; kum dhanu ginyone i dhugang’, man etho.