Read Alur I Lemkei 10 Bible Online

I Lemkei 10 - Alur bible

I Lemkei 10

¹Nwang’u Jufilisti gikiedokum Israel: man dhanu mir Israel giringo i wang’ Jufilisti, man gipodho piny ma junegogi i got Gilboa.

²Man Jufilisti giriemo Saul ma tek ku wote: man Jufilisti ginego Yonathan, man Abinadab, ku Malkicua, ma wot Saul.

³Man lwiny ubedo tek kum Saul, main weg atum gitundo i bang’e; man cwinye ng’abre kum weg atumne.

⁴E Saul ulund uwacu ni jang’abban pare kumae, Wodh palamularu peri, man idhuya ko, kara ju maeni ma jukutimo yaa i kumgi ngo ku gibin gisenda. Ento jang’abban pare kwero; kum lworo nege dit. Ka klumeno Saul umaku palamularu pare, man epodho i wie.

⁵Ka jang’abban pare neno nia Saul utho, epodho wi palamularu pare kumeca, e etho.

⁶Ka kumeno Saul utho, ku wote adek; man juot pare ceke githo karacelo.

⁷E ka dhanu ceke mir Israel ma gini i poga gineno maeno giringo, man nia Saul ku wote githo, giweko adhura migi, e giringo: man Jufilisti gibino gibedo i igi de.

⁸Man etimbre urwone, ka Jufilisti gibino yaku ju ma junego, nia ginwang’u Saul ku wote ma gipodho wi got Gilboa.

⁹E giwodho jambkume, man giting’o wie, ku jamtho pare, man giore i ng’om mi Jufilisti mi ng’ete, kara giter lembe ba mungu migi m’araga, man ni dhanu.

¹⁰Man giketho jamtho pare i ot pa mungu migi m’acwia, man ging’abu wie i ot pa Dagon.

¹¹Man ka Yabec-gilead ceke giwinjo pi gin ceke ma Jufilisti gitimo kum Saul,

¹²dhanu ceke ma jukero giai, man gikabu kum Saul woko, ku kum wote, e gikelogi Yabec, man giyiko cogogi the bongu i Yabec, e giweko cam ceng’ abiro.

¹³Kum kumeno Saul utho kum dubo pare m’edubo ni Yehova, kum lembe pa Yehova, m’eworo ngo: man kum ekwayu lembapora bende ba ng’atu ma won tipo, kara epenje,

¹⁴man epenjo ba Yehova ngo; ka kumeno enege, man eloko ker ni Daudi ma wod Yese.