Read Alur I Lemkei 11 Bible Online

I Lemkei 11 - Alur bible

I Lemkei 11

¹Israel ceke lund ucokri gigi karacelo ba Daudi i Hebron, giwacu kumae, Nen, wan wa cogo peri man ring’kumi.

²I nindo m’ukadhu, cil ka Saul ubedo ubimo, en e in m’utelo wi Israel man m’udwokogi de; man Yehova Mungu peri wacu iri kumae, Ibibedo jakwac mi dhanu para Israel, man ibibedo jatelwic wi dhanu para Israel.

³Ka kumeno judongo mir Israel ceke gibino bang’ ubimo i Hebron; man Daudi timo lembariba kugi i Hebron i wang’ Yehova; e gikonjo mo wi Daudi gikethe ko ni ubimo wi Israel, calku lembe pa Yehova ku dhu Samwil.

⁴Man Daudi kud Israel ceke gicidho Yerusalem (en e Yebus); man Juyebusi, dhanu m’ubedo i ng’om, gini keca.

⁵Man dhanu m’ubedo i Yebus giwacu ni Daudi kumae, Ibimondo kakeni ngo. Ento Daudi umaku kamatek mi Sayuni; en e adhura pa Daudi.

⁶Man Daudi wacu kumae, Ng’atu ma tek bilar goyo Juyebusi ebibedo jadit man jego. Man Yoab ma wod Zeruia ular uidho malu, man jukethe ni jadit.

⁷E Daudi bedo i kamatekne; ka kumeno gilwong’e adhura pa Daudi.

⁸Man egomo adhura i ng’ete gbur, ugambre Milo cil i ng’ete gbur; man Yoab uyiko dong adhurane.

⁹Man Daudi doko dit ma sagu; kum Yehova mir udul ni kude.

¹⁰Nie maeni gi judongo kind dhanu ma tek ma Daudi bedo ko, ma ginyuthri gigi tek karacelo kude i ker pare, karacelo kud Israel ceke, kara gikethe ni ubimo, calku lembe pa Yehova pir Israel.

¹¹Man maeni wel mi dhanu ma tek ma Daudi bedo ko: Yacobeam, ma wod Jahakmoni, ma jadit mi pier adek; eting’o tong’ pare kum dhanu dak adek man enegogi wang’ acel.

¹²Man yo ng’eye Eleazar ma wod Dodo, ma Jaahohi, ma en e acel ma kind dhanu ma tek adek.

¹³Enuti ku Daudi i Pasdamim, man Jufilisti gicokri karacelo keca ni lwiny, ka ma podho nuti i ie ma pong’ ku nganu; e dhanu ringo i wang’ Jufilisti.

¹⁴Man gicungo i die podhone, e gikiedo, man ginego Jufilisti; man Yehova larugi kud aloci ma dit.

¹⁵Man juadek ma kind dhanu pier adek ma judongo giloro piny ba cana ba Daudi, i odng’om mir Adulam; man udul Jufilisti gigonjo i poga mi Refaim.

¹⁶E i kinde maeni Daudi ni i kamatek, man njuru asikari mi Jufilisti ni i Beth-lehem.

¹⁷E ava pi nego Daudi, man ewacu kumae, A tek ng’atu moko mio ira pi m’amadhi kud i kulo m’atong’a mi Beth-lehem, ma ni ba dhugang’!

¹⁸E juadek maeni ging’enyo ku i udul mi Jufilisti, man gitwomo pi kud i kulo m’atong’a mi Beth-lehem, ma ni ba dhugang’, e giting’e, man gikele ba Daudi: ento Daudi yio ngo emadhi, ento ekonje woko ni Yehova,

¹⁹man ewacu kumae, Mungu para kwer ira, nia atim maeni: abimadhu rimo mi dhanu maeni ma gikuno kwo migi? kum gikele ku kuno kwo migi. Ka kumeno eyio ngo emadhi. Gin maeni juadek ma tek gitimo.

²⁰Man Abicai, m’umin Yoab, en e jadit mi juadekne; kum eting’o tong’ pare kum dhanu dak adek man enegogi, e ebedo ku nying’ kind juadek.

²¹Mi juadekne, ebedo ku yung ma sagu juario, e judwoke ni jego migi: ento etundo ngo kum juadek ma kwong’a.

²²Benaya ma wod Yehoiada, ma wod dhanu ma jakero ma Kabzel, m’utimo tic ma tek, enego wot ario pa Ariel ma Moab: eloro piny bende man enego umvor i die vur i nindo mi pei.

²³Man enego Jamisiri, ma en e ng’atu m’udongo bor, kaborne bot abic; man i cing’ Jamisirine tong’ nuti calu yen pa jabodho ma cwio bongu; e eloro piny i bang’e kud uluth, man emayu tong’ kud i cing’ Jamisiri, e enege ku tong’ pare gire.

²⁴Benaya ma wod Yehoiada timo gin maeni, man ebedo ku nyinge kind juadek ma tek.

²⁵Nen, ebedo ku yung ma sagu dhanu pier adek, ento etundo kum juadek ma kwong’a ngo: e Daudi kethe wi jukur pare.

²⁶Dhanu ma tek mi njuru asikari bende gi eni: Asahel m’umin Yoab, man Elhanan ma wod Dodo ma Beth-lehem,

²⁷Camoth ma Jaharori, man Helez ma Japeloni,

²⁸man Ira ma wod Ikec ma Jatekoi, man Abiezer ma Jaanathothi,

²⁹man Sebekai ma Jahucathi, man Ilai ma Jahohi,

³⁰man Maharai ma Janetofathi, man Heled ma wod Bana ma Janetofathi,

³¹man Ithai ma wod Ribai ma Gibea mi nyithindho pa Benyamin, man Benaya ma Japirathoni,

³²man Hurai mi kulo mi Gac, man Abiel ma Jarabathi,

³³man Azmaveth ma Jabaharumi, man Eliaba ma Jacalboni,

³⁴man wot Hacem ma Jagizoni, man Yonathan ma wod Cage ma Jaharari,

³⁵man Ahiam ma wod Sakar ma Jaharari, man Elifal ma wod Ur,

³⁶man Hefer ma Jamekerathi, man Ahija ma Japeloni,

³⁷man Hezro ma Jakarmeli, man Narai ma wod Ezbai,

³⁸man Yoel m’umin Nathan, man Mibhar ma wod Hagri,

³⁹man Zelek ma Jaamoni, man Naharai ma Jaberothi, ma en e jang’abban pa Yoab ma wod Zeruia,

⁴⁰man Ira ma Jaithri, man Gareb ma Jaithri,

⁴¹man Uria ma Jahiti, man Zabad ma wod Alai,

⁴²man Adina ma wod Ciza ma Jarubeni, ma jadit mi Jurubeni, man dhanu pier adek ni kude,

⁴³man Hanan ma wod Maka, man Yocafat ma Jamithni,

⁴⁴Uzia ma Jaacterathi, man Cama ku Yeiel ma wot Hotham ma Jaaroeri,

⁴⁵man Yediayel ma wod Cimri, man Yoha m’umin mire, ma Jatizi,

⁴⁶man Eliel ma Jamahavi, man Yeribai, man Yocavia ma wot Elnam, man Ithma ma Jamoabi,

⁴⁷man Eliel, man Obed, man Yasiel ma Jamezobai.