Read Alur I Lemkei 12 Bible Online

I Lemkei 12 - Alur bible

I Lemkei 12

¹Nie maeni gi ju m’ubino ba Daudi i Ziklag, e kinde m’ecere gire ki ni Saul ma wod Kuc; man gini i kind dhanu ma tek, ma jukony pare i ali.

²Gibedo ku jamtho migi mir atum, man gicopo timo ku cing’ ma yor acwic ku ma yor acam de ku canyu kidi man ku kilo athero bende ku i atum: gi dhanu ma kind utumin Saul pa Benyamin.

³Jaditne en e Ahiezer; m’ulube Yoac, wot Cema ma Jagibeathi, man Yeziel, man Pelet, wot Azmaveth, man Beraka, man Yehu ma Jaanathothi,

⁴man Icmaya ma Jagibeoni, ma ng’atu ma tek i kind pier adek, man en e wi dhanu pier adekne, man Yeremia, man Yahaziel, man Yohanan, man Yozabad ma Jagederathi,

⁵man Eluzai, man Yerimoth, man Bealia, man Cemaria, man Cefathia ma Jaharufi,

⁶man Elkana, man Iscia, man Azarel, man Yoezer, man Yacobeam, man Jukorahi,

⁷man Yoela, man Zebadia, ma wot Yeroham pa Gedor.

⁸Man kind Jugadi gipokri gigi ni Daudi ba ka ma tek i yamba, dhanu ma tek mi kero, dhanu ma juponjogi mir ali, ma copo uc ku ban ku tong’; ma wang’gi pami wang’ umvor, man giringo pio pami ruda wi gudi:

⁹Ezer jaditne, Obadia mir arionde, Eliab mir adege,

¹⁰Micmana mir ang’wende, Yeremia mir abije,

¹¹Atai mir abusiende, Eliel mir abirone,

¹²Yohanan mir aborane, Elzabad mir abung’wende,

¹³Yeremia mir apaje, Makbanai mir apar wi acende.

¹⁴Maeni ma kind wot Gad gi jego mir udul: ng’atu ma nok ni juwagi ebedo wi dhanu dak, man ng’atu ma dit ni juwagi ebedo wi dhanu rubanga.

¹⁵Maeni gi ju ma gikadhu Yordan i dwi ma kwong’ane, kinde m’epong’ i ng’ete ceke; man giriemo ju m’i poga ceke, yo nyangu ku yo reto de.

¹⁶Man ju ma kind nyithindho pa Benyamin ku Yuda gibino ba ka ma tek ba Daudi.

¹⁷Man Daudi wok ning’ologi, e eloko lembe ewacu igi kumae, Tek wubino i bang’a ku kwiocwiny nikonya, adundena biripo kudu; ento tek wubino niciba ni judegina, kum dubo mbe i cinga, Mungu pa kwaruwa unen wie, man ejuke.

¹⁸Tipo lund ubino wi Amasai, ma jadit mi dhanu pier adek, man ewacu kumae, Wan wa peri, Daudi, man wa jubeng’i, in i wod Yese: kwiocwiny, kwiocwiny ubed iri, man kwiocwiny ubed ni ju m’ukonyi; kum Mungu peri bekonyi. E Daudi lund ujologi, man ekethogi ni jego mir udul.

¹⁹Pa Manase bende jumoko dok ba Daudi, kinde m’ebino ku Jufilisti kum Saul i lwiny; ento gikonyogi ngo; kum judongo mi Jufilisti giporo lembe ma girieme ko, giwacu kumae, Ebidok ba rwoth pare ma Saul man jumaru thumo wiwa.

²⁰Kan ecidho Ziklag, dhanu pa Manase, gidok i bang’e, gin gi Adna, man Yozabad, man Yediayel, man Mikayel, man Yozabad, man Elihu, man Zilethai, ma gi jego mi rubanga ma pa Manase.

²¹E gikonyo Daudi kum udul weg ayeki: kum gin ceke gi dhanu ma tek ma jurukara, man gi jego mir udul.

²²Kum ku ba ceng’ dhanu bino ba Daudi nikonye, cil ma udul ma dit uwok ko, calu udul pa Mungu.

²³Man maeni wel mi wi ju ma weg jamtho mir ali, m’ubino ba Daudi i Hebron, kara gilok ire ker pa Saul, calku lembe pa Yehova.

²⁴Nyithindho pa Yuda m’uyeyo ban ku tong’ gi rubanga abusiel ku dak abora, ma gikendo jamtho mir ali.

²⁵Mi nyithindho pa Simeon, dhanu ma tek ma jukero mir ali, rubanga abiro ku dak acel.

²⁶Mi nyithindho pa Lawi rubanga ang’wen ku dak abusiel.

²⁷Man Yehoiada en e jatelwi juot pa Harun; man karacelo kude rubanga adek ku dak abiro,

²⁸man Zadok, jalawobi ma tek ma jakero, man mi ot pa won jego pier ario wi ario.

²⁹Man mi nyithindho pa Benyamin, utumin Saul, rubanga adek; kum cu i nindo maeni ng’etgi kucel ma dit gimoko kum ot pa Saul.

³⁰Man mi nyithindho pa Efraim rubanga pier ario ku dak abora, dhanu ma tek ma jurukara, dhanu ma pigi yik i udi pa weggi.

³¹Man mi ng’et suru pa Manase rubanga apar wi abora, ma juwacu pigi ku nying’gi kara gibin giketh Daudi ni ubimo.

³²Man nyithindho pa Isakar, dhanu ma gi weg ng’eyong’ec mi nindo, kara ging’ei gin ma maku Israel gitim, wel wi jone dak ario; man uturneggi ceke gini the lembang’ola migi.

³³Mi Zebulun, wagi ju ma copo cidho kind udul, ma copo thero lwiny, ku jamtho mir ali ma kwonde tung’ tung’ ceke, gi rubanga pier abic, ma copo poro lwiny, man adundegi ario ngo.

³⁴Man mi Naftali jego rubanga acel, man karacelo kugi weg ban ku tong’ rubanga pier adek wi abiro.

³⁵Man mi Judani ma copo thero lwiny, gi rubanga pier ario wi abora ku dak abusiel.

³⁶Man mir Acer, wagi ju ma copo cidho kud udul, ma copo thero lwiny, gi rubanga pier ang’wen.

³⁷Man loka Yordan, mi Jurubeni, man mi Jugadi, man mi ng’et suru pa Manase, ku weg jamtho mir ali ma kwonde tung’ tung’ ceke, rubanga dak acel ku pier ario.

³⁸Maeni ceke, ma dhanu mir ali, ma copo thero lwiny, gibino kud adundegi ma cu i Hebron, kara giketh Daudi ni ubimo wi Israel ceke: man dong Israel ceke bende gibedo kud adundegi acel mi ketho Daudi ni ubimo.

³⁹E gibedo keca ku Daudi ceng’ adek, ma gicamu gimadhu de; kum uturneggi timo girayika igi.

⁴⁰M’umedo maeni ju ma gini ceng’ni kugi, cil ju ma gini bor calu Isakar man Zebulun man Naftali, gikelo kwen wi kana, man wi ngamia, man wi kana man wi koni dhiang’, cemo mi mogo, man kwend nyingubolo, man wie nying ulok m’uthwo, ku pigulok, man mo, man koni dhiang’, ku rombe dupa: kum anyong’a ni i Israel.