Read Alur I Lemkei 13 Bible Online

I Lemkei 13 - Alur bible

I Lemkei 13

¹Man Daudi poro lembe karacelo ku jego mi rubanga man mi dak, man ku jutelwic kubang’gi kubang’gi.

²Man Daudi wacu ni cokri mir Israel ceke kumae, Tek ebedo ber iwu, man tek ebedo pa Yehova Mungu mwa, dong’ waoru kwenda mba mba i kaka ceke ba utumegwa m’udong’ i ng’om mir Israel ceke, ma julam ku Julawi gini i adhura migi m’ubedo ku ng’ete, kara gicokri gigi i bang’wa;

³man wek wagemu sanduk pa Mungu mwa kendo i bang’wa: kum wayenyo i bang’e ngo i nindo pa Saul.

⁴E udul ceke giwacu nia gibitimo kumeca; kum lembene bedo ber i wang’ dhanu ceke.

⁵Kum kumeno Daudi coko dhu Israel ceke karacelo, ugambre Cihor ma kulo mi Misiri cil kum kamondo mi Hamath, kara gikel sanduk pa Mungu kud i Kiriath-yearim.

⁶E Daudi idho malu, man Israel ceke, ba Bala, en e, ba Kiriathyearim, ma en e piny pa Yuda, kara gikel sanduk pa Mungu Yehova ku keca m’ubedo wi kerubi, ma julwong’e ku Nying’.

⁷E giyeyo sanduk pa Mungu wi magali ma nyen, man gikele woko kud i ot pa Abinadab: man Uza kud Ahio giketho magaline cidho.

⁸E Daudi kud Israel ceke gituko i wang’ Mungu ku tego migi ceke, cil ku wer, man ku nanga, man kud adungu, man kud usegu, man kud umbukulumbu, man kud agwara.

⁹E ka giwok kum lelacam pa Kidon, Uza rieyo cinge kara emak sandukne; kum koni dhiang’ ukier.

¹⁰E ng’ecwiny pa Yehova opo kum Uza, e egoye, kum eketho cinge kum sandukne; man etho keca i wang’ Mungu.

¹¹E can unego Daudi, kum Yehova nego Uza: man elwong’o ka maeno Perez-uza, cil i ceng’ maeni.

¹²E lworo nego Daudi i ceng’ maeca kum Mungu, ewacu kumae, Abigamu sanduk pa Mungu thuwa i bang’a nenedi?

¹³Kum kumeno Daudi dwoko sandukne i bang’e i adhura pa Daudi ngo, ento etere cen i ot pa Obed-edom ma Jagiti.

¹⁴E sanduk pa Mungu dong’ ku juot pa Obededom i ot pare dwi adek: man Yehova mio mugisa ni ot pa Obed-edom, man kum gin ceke m’ebedo ko.