Read Alur I Lemkei 14 Bible Online

I Lemkei 14 - Alur bible

I Lemkei 14

¹Man Hiram m’ubimo mi Turo oro jukwenda ba Daudi, ku yenmusonge, man jubodho mi kidi, ku jubodho mi yen, kara gigom ire ot.

²Man Daudi ng’eyo nia Yehova kethe ni ubimo wi Israel; kum ker pare judodo malu, ni kum dhanu pare ma Israel.

³E Daudi gamu mon mange i Yerusalem; man Daudi nyolo wote mange ku nyige de.

⁴Man maeni en e nying’ nyithindho m’ebedo ko i Yerusalem: Camua, man Cobab, man Nathan, man Suleman,

⁵man Ibhar, man Elicua, man Elpelet,

⁶man Noga, man Nefeg, man Yafia,

⁷man Elicama, man Beliada, man Elifelet.

⁸Man kinde ma Jufilisti giwinjo nia juwiro Daudi ni ubimo wi Israel ceke, Jufilisti ceke giidho malu niyenyo Daudi: man Daudi winjo pire, e ecidho woko i kumgi.

⁹Nie Jufilisti gibino giyaku piny de i poga mi Refaim.

¹⁰E Daudi penjo ba Mungu, ewacu kumae, Abicidho malu kum Jufilisti? man ibimiogi i cinga? man Yehova wacu ire kumae, Idh malu; kum abimiogi i cingi.

¹¹Kum kumeno giidho malu ba Bal-perazim, man Daudi goyogi keca; e Daudi wacu kumae, Mungu cori wi judegi para ku cinga, calu cori mi pi. Ka kumeno gilwong’o nying’ ka maeno Bal-perazim.

¹²E giweko Mungu m’acwia migi keca; e Daudi ng’olo lembe, man juwang’ugi ku mac.

¹³E Jufilisti gicidho ku yaku piny kendo i poga.

¹⁴E Daudi penjo kendo ba Mungu; man Mungu wacu ire kumae, Ibiidho malu i tokgi ngo: lokri woko kud i bang’gi, man ibin i wigi ku yo kum yen m’udinyo.

¹⁵Man ebitimbre, kan iwinjo badwal m’uwotho wi yen m’udinyo, nia i kinde maeca ibicidho woko ba lwiny; kum Mungu cidho i weng’i nigoyo udul mi Jufilisti.

¹⁶E Daudi timo calu Mungu ng’olo ire: man gigoyo udul mi Jufilisti ugambre Gibeon cil kum Gezer.

¹⁷Man pi Daudi yik i ng’om ceke; man Yehova kelo lworo pare wi thek ceke.