Read Alur I Lemkei 15 Bible Online

I Lemkei 15 - Alur bible

I Lemkei 15

¹E Daudi gomo ire udi i adhura pa Daudi; man eyiko kaka mi sanduk pa Mungu, man eguro hema pire.

²Daudi lund uwacu kumae, Maku jumoko kud uyei sanduk pa Mungu ndhu Julawi: kum Yehova goyo wigi ya giyei sanduk pa Mungu, man gitim ire nja.

³Man Daudi coko Israel ceke Yerusalem, kara gikel sanduk pa Yehova malu i kakare, m’eyiko pire.

⁴E Daudi coko wot Harun karacelo, man Julawi:

⁵mi wot Kohath, Uriel ma jadit, man utumin mire dak acel ku pier ario;

⁶mi wot Merari, Asaya ma jadit, man utumin mire dak ario ku pier ario;

⁷mi wot Gercom, Yoel ma jadit, man utumin mire dak acel ku pier adek;

⁸mi wot Elizafan, Cemaya ma jadit, man utumin mire dak ario;

⁹mi wot Hebron, Eliel ma jadit, man utumin mire pier abora;

¹⁰mi wot Uziel, Aminadab ma jadit, man utumin mire dak acel kud apar wi ario.

¹¹Man Daudi lwong’o Zadok man Abiathar ma julam, man Julawi, man Uriel, man Asaya, man Yoel, man Cemaya, man Eliel, man Aminadab,

¹²man ewacu igi kumae, Wun wu wi udi pa wego mi Julawi: wudwokru giwu leng’, wun ku utumegwu bende, kara wukel sanduk pa Yehova, Mungu mir Israel malu, ba ka m’ayiko ire.

¹³Kum kukwong’a kum wuyeye ngo, Yehova Mungu mwa core i wiwa, kum wayenye ngo calku lembapoka.

¹⁴Kum kumeno julam man Julawi gidwokri gigi leng’ kara gikel sanduk pa Yehova, Mungu mir Israel, malu.

¹⁵Man nyithindho mi Julawi giyeyo sanduk pa Mungu wi gokgi ku yen m’i kume, calu Musa ng’olo calku lembe pa Yehova.

¹⁶E Daudi yero ba jadit mi Julawi ya giketh utumeggi ma juwer, ku jambadwal, kud adungu, man nanga, man umbukulumbu, m’ubewinjre dit m’uting’o dwal malu de ku mutoro.

¹⁷Kum kumeno Julawi giketho Heman ma wod Yoel; man mi utumin mire, Asaf ma wod Berekia; man mi wot Merari utumeggi, Ethan ma wod Kucaya;

¹⁸man karacelo kugi utumeggi mi wel mir arionde, Zekaria, man Ben, man Yaziel, man Cemiramoth, man Yehiel, man Uni, man Eliab, man Benaya, man Maseya, man Matithia, man Elifelehu, man Mikneya, man Obed-edom, man Yeyel, ma jukur dhugola.

¹⁹Kum kumeno juketho juwer, Heman, man Asaf, man Ethan, kud umbukulumbu mi mola kara giyeke ma tek;

²⁰man Zekaria, man Aziel, man Cemiramoth, man Yehiel, man Uni, man Eliab, man Maseya, man Benaya, kud adungu ma ku dhu Alamoth;

²¹man Matithia, man Elifelehu, man Mikneya, man Obed-edom, man Yeiel, man Azazia, gi weg nanga ma ku dhu Ceminith, kara gicake.

²²Man Kenania, ma jadit mi Julawi, eni wi wer: eponjo ku wer, kum e riek.

²³Man Berekia ku Elkana gi jukur dhugola mi sanduk.

²⁴Man Cebania, man Yocafat, man Nethanel, man Amasai, man Zekaria, man Benaya, man Eliezer, ma julam, gikudho agwara wang’ sanduk pa Mungu; man Obed-edom ku Yehia gi jukur dhugola mi sanduk.

²⁵Kum kumeno Daudi, man judongo mir Israel, man jego ma wi rubanga, gicidho nigamu sanduk mi lembariba pa Yehova kud i ot pa Obed-edom ku mutoro gikele malu.

²⁶Man etimbre, ka Mungu konyo Julawi m’uyeyo sanduk mi lembariba pa Yehova, nia gilamu thwoni dhiang’ abiro man nyogi rombe abiro.

²⁷Man Daudi ronjre ku kanzu mi bongu ma nwang’ ma ber, man Julawi ceke m’uyeyo sandukne, ku juwer, man Kenania ma jadit mi wer karacelo ku juwer: man Daudi bedo kud ugoke mi bongu ma nwang’ i kume.

²⁸E kumeno Israel ceke kelo sanduk mi lembariba pa Yehova malu ku muzira, man ku badwal mir agwara, man kud agwara ma tung’, man kud umbukulumbu m’uwinjre dit, kud adungu man nanga.

²⁹Man etimbre, kinde ma sanduk mi lembariba pa Yehova bino bang’ adhura pa Daudi, nia Mikal ma nya Saul uneno woko ku wang’ot, man eneno ubimo ma Daudi bemiel man ebetuko; e ecaye ku yor i adundene.