Read Alur I Lemkei 16 Bible Online

I Lemkei 16 - Alur bible

I Lemkei 16

¹E giroyo sanduk pa Mungu, man gikethe i die hema ma Daudi guro pire: e githiero lam m’awang’a ku lam mi kwiocwiny i wang’ Mungu.

²Man ka Daudi daru thiero lam m’awang’a ku lam mi kwiocwiny, emio mugisa ni dhanu i nying’ Yehova.

³Man epoko ni dhanu mir Israel kubang’gi kubang’gi, ni co ku mon bende, kubang’gi kubang’gi kwen m’ang’ina, man ku ring’o moko, man kwend nyingulok m’uthwo.

⁴Man eketho jumoko ma Julawi y a gitim tim i wang’ sanduk pa Yehova, man gipoi man gifoi man gipak Yehova, Mungu mir Israel:

⁵Asaf ma jadit, man m’ulube Zekaria, man Yeiel, man Cemiramoth, man Yehiel, man Matithia, man Eliab, man Benaya, man Obed-edom, man Yeiel, kud adungu man ku nanga; man Asaf kud umbukulumbu, m’uwinjre dit;

⁶man Benaya ku Yahaziel ma julam kud agwara thiri thiri, i wang’ sanduk mi lembariba pa Mungu.

⁷I ceng’ maeca Daudi lund utheko mio foc ni Yehova, ku cing Asaf ku utumin mire.

⁸E wufoi Yehova, wulwong’ nyinge; Wurwei pi tic pare i kind kodhidhanu.

⁹Wuwer ire, wuwer pak ire; Wuwec pi tic pare ceke mi musana.

¹⁰Wuyungru ku nyinge ma leng’; Dong’ anyong’a neg adunde ju m’uyenyo Yehova.

¹¹Wuyeny Yehova ku tego pare; Wuyeny wang’e awe.

¹²Wupoi pi tic pare mi musana m’etimo, Wang’uic pare, man lembapoka m’i dhoge,

¹³E wu kodhi mir Israel ma jatic pare, Wu nyithindho pa Yakobo, ju m’egoyo wigi.

¹⁴En e Yehova Mungu mwa; Lembapoka pare ni i ng’om ngung’.

¹⁵Wupoi pi lembariba pare ma nja, Lembe m’eng’olo ni dhanum’utuk rubanga,

¹⁶Lembariba m’etimo kud Ibrahim, Man kwong’ pare ni Isak,

¹⁷Man edwoke tek ni Yakobo ni cik, Ni Israel ni lembariba mi nja,

¹⁸Ewacu kumae, Abimio iri ng’om Kanan, En e makapiny mir aba mu;

¹⁹Kinde ma wu dhanu ma nok i wel mu, Eyo, nok dit, man wun umondo i ie;

²⁰Man gikadhu ku ba thek kun ku kun, Man ku ba ker acel ku ba dhanu mange.

²¹Eyio ngo ya ng’atu moko timgi rac; Eyo, ejuko ju m’ubimo i kumgi,

²²Ewacu kumae, Kud wumul jupara m’awiro, Man kud wutim rac kum jubila para.

²³Wuwer ni Yehova, ng’om ngung’; Wunyuth both pare ceng’ ku ceng’.

²⁴Wuyer pi dwong’ pare i kind thek, Tic pare mi musana i kind kothidhanu ceke.

²⁵Kum Yehova e dwong’, man maku jupake hai: Maku julwore bende ma sagu mungu ceke.

²⁶Kum mungu ceke mi kothidhanu gi mungu m’araga: Ento Yehova cwio polo.

²⁷Yung ku dwong’ gini i wang’e: Tego man mutoro gini i kakare.

²⁸Wumi dwong’ ni Yehova, wu wat kodhidhanu, Wumi dwong’ ku tego ni Yehova;

²⁹Wumi ni Yehova dwong’ m’uromo ku nyinge: Wukel lam, man wubin i wang’e; Wurwo ni Yehova ku bero mi leng’.

³⁰Kumwu miel i wang’e, ng’om ngung’: Ng’om bende cungo m’ecopo kabre woko ngo.

³¹Dong’ anyong’a neg polo, e dong’ ng’om ufoi; Man wek giwac i kind thek kumae, Yehova camu ker.

³²Wek nam uwoi, ku pong’ne de; Dong’ anyong’a neg podho, ku gin ceke m’i ie;

³³E yedhi mi luli bilund wero wer ni anyong’a ni Yehova; Kum ebino nipoko lembe m’i ng’om.

³⁴E wufoi Yehova; kum en e ber; Kum mer mi bero pare bedo nja.

³⁵Man wuwac kumae, Larwa, E Mungu mi both mwa, Man icokwa karacelo man ibibodhwa ni thek, Kara wafoi nyingi ma leng’, Man wasag i pak peri.

³⁶Mugisa ni Yehova, Mungu mir Israel, Ugambre nja cil nja. Man dhanu ceke giwacu kumae, Amen, man gipaku Yehova.

³⁷Kum kumeno eweko Asaf ku utumin mire keca, i wang’ sanduk mi lembariba pa Yehova, kara gitim i wang’ sandukne thiri thiri, calu tic m’umaku piny mi ceng’ ku ceng’ ubedo;

³⁸man Obed-edom ku uturneggi, pier abusiel wi abora; Obed-edom bende ma wod Yeduthun man Hosa kara gibed jukur dhugola;

³⁹man Zadok ma jalam, ku utumin mire ma julam, i wang’ hema pa Yehova i ka ma malu ma ni i Gibeon,

⁴⁰kara githier lam m’awang’a ni Yehova wi pemblam mi lam m’awang’a thiri thiri kugweno kud uthieno, calku maeno ceke m’ugore i cik pa Yehova, m’eng’olo ni Israel;

⁴¹man karacelo kugi Heman ku Yeduthun, ku ju m’udong’ ma jugoyo wigi, ma julwong’o ku nying’gi, kara gifoi Yehova, kum mer mi bero pare bedo mi nja;

⁴²man karacelo kugi Heman ku Yeduthun kud agwara man umbukulumbu pi ju ma biyeke ma tek, man ku jambwer pi wer pa Mungu; man wot Yeduthun gibed dhugang’.

⁴³Man dhanu ceke gidok man ba ot pare man ba ot pare: e Daudi dok kara emi mugisa ni ot pare.