Read Alur I Lemkei 17 Bible Online

I Lemkei 17 - Alur bible

I Lemkei 17

¹Man etimbre, kinde ma Daudi bedo i ot pare, nia Daudi wacu ni Nathan ma jabila kumae, Nen, abedo i ot mi musonge, ento sanduk mi lembariba pa Yehova bedo the kusikabongu.

²E Nathan uwacu ni Daudi kumae, Tim ceke ma ni i adundeni; kum Mungu ni kudi.

³E etimbre i diewor nica, nia lembe pa Yehova bino ba Nathan, uwacu kumae,

⁴Cidh iwac ni Daudi ma jatic para kumae, Yehova wacu kumae, Ibigomo ira ot m’abed i ie ngo:

⁵kum fodi abedo i ot ungo ugambre i ceng’ m’akelo ie Israel malu, cil i ceng’ maeni, ento akadhu ku ba hema ku ba hema, man ku ba kabedo ku ba kabedo.

⁶I ka ceke m’awotho i ie kud Israel ceke, ayero lembe acel ku jupoklembe moko mir Israel, m’ang’olo ko ya gibed jukwac mi dhanu para, m’awacu kumae, Nedi wugomo ira ot ungo mi musonge?

⁷Ka kumeno kawono ibiwacu kumeni ni jatic para Daudi, Yehova mir udul uwacu kumae, Agemi kud i kwac mi rombe, m’ibelubo rombe, kara ibed jatelwic mi dhanu para Israel:

⁸man wabedo wakudi ka ceke ma tek icidho i ie, man athumo judegi peri ceke woko i weng’i; man abitimo iri nying’, calu nying’ mi ju ma dwong’ ma ni i ng’om.

⁹Man abiketho kaka pi dhanu para Israel, e abipidhogi, kara gibed i ka migi ma dhe, man kara ku judakgi kendo; kadok nyithindho mi dubo de gibinyothogi kendo ngo, calu ma kwong’a,

¹⁰man ugambre i ceng’ m’ang’olo jupoklembe ubed wi dhanu para Israel; man abiketho judegi peri ceke umond iri. Mange ke ayero iri nia Yehova bigomo iri ot.

¹¹Man ebitimbre, ka ceng’ peri timbre kakare nia ibicidho nibedo karacelo ku kwaru miri, nia abiketho kodhini yo ng’ei, ma bibedo kind woti; man abiketho ker pare cungo.

¹²Ebigomo ira ot, man abiketho komker pare cungo mi nja.

¹³Abibedo won, man ebibedo woda: e abikabu mer mi bero para woko kud i bang’e ngo, calu akabe ku ba ng’atu m’ular uwok iri;

¹⁴ento abiketho ebedo i ot para man i ker para mi nja; man komker pare bicungo mi nja.

¹⁵Calku lembe maeni ceke, man calku ginmawokiwang’ maeni ceke, e Nathan uyero ni Daudi kumeca.

¹⁶Daudi m’ubimo ulund umondo, man ebedo i wang’ Yehova; e ewacu kumae, An a ng’a, E Yehova Mungu, man ot para en e ang’o, ma nia ikela bor kumeni?

¹⁷Man maeni en e gin ma nok i weng’i, E Mungu; ento iyero pi ot pa jatic peri pi nindo ma dit ma bibino, man inena calu bedo pa ng’atu ma dwong’, E Yehova Mungu.

¹⁸Ang’o mange ma fodi Daudi copo wacu iri pi yung m’itimo ni jatic peri? kum ing’eyo jatic peri.

¹⁹E Yehova, ni kum jatic peri, man calkud adundeni giri, itimo dwong’ maeni ceke, kara iketh gin ma dwong’ maeni ceke ng’eire.

²⁰E Yehova, ng’atu moko mbe ma calu in, kadok Mungu moko m’umedo in de mbe, calku gin ceke ma wawinjo ku ithwa.

²¹Man thek ma kani ma ni i ng’om ma calu dhanu peri Israel, ma Mungu cidho kara ewargi ire gire ni dhanu, kara iketh iri nying’ ku gin ma dit ma nyayu ndiri de, ku riem m’iriemo ko thek woko kud i wang’ dhanu peri, m’iwaru kud i ng’om Misiri?

²²Kum dhanu peri Israel idwoko ni dhanu peri mi nja; man in, Yehova, idoko Mungu migi.

²³Man kawono, E Yehova, wek lembe m’iyero pi jatic peri, man pi ot pare, ucung mi nja, man itim calu iyero.

²⁴Man wek nyingi cungi man ebed dwong’ mi nja, m’iwacu ko kumae, Yehova mir udul en e Mungu mir Israel, en e Mungu ni Israel: man ot pa Daudi ma jatic peri ucungo i weng’i.

²⁵Kum in, E Mungu para, inyutho ni jatic peri nia ibigomo ire ot: ka kumeno jatic peri nwang’e i adundene nia erwo i weng’i.

²⁶Man kawono, E Yehova, in i Mungu, man ing’olo gin maeni ma ber ni jatic peri:

²⁷man kawono enyayu mutoro ii ya imi mugisa kum ot pa jatic peri, kara ebed mi nja i weng’i: kum in, E Yehova, imio mugisa, man mugisa bedo i wie mi nja.