Read Alur I Lemkei 19 Bible Online

I Lemkei 19 - Alur bible

I Lemkei 19

¹Man etimbre yo ng’ei maeni, nia Nahac m’ubimo mi nyithindho mir Amon utho, e wode camu ker kakare.

²Man Daudi wacu kumae, Abinyutho bero ni Hanun ma wod Nahac, kum won unyutho bero ira. Kum kumeno Daudi oro jukwenda kara gijuke pi won. Man jutic pa Daudi giwok i ng’om mi nyithindho mir Amon ba Hanun, kara gijuke.

³Ento judongomawijo mi nyithindho mir Amon giwacu ni Hanun kumae, Iwacu nyo Daudi yungo wuru, kum eoro jujuk i beng’i? jutic pare gibino i beng’i kara giyeny, man ging’iel, man gilib ng’om ungo?

⁴Kum kumeno Hanun ugamu jutic pa Daudi, man elielo kumgi, ethumo kendi migi de pu i diere, cil i adhiggi, e eorogi gicidho.

⁵E jumoko gilund gicidho, man giyero ni Daudi maram jutimo ko kum dhanune. Man eoro jucijurombo kugi; kum lewic umaku dhanune dit. Man ubimo wacu kumae Wudong’ i Yeriko cil ma tikwu biwobo ko, ka wubilund dwogo.

⁶Man ka nyithindho mir Amon gineno nia gidwokri gigi rac ni Daudi, Hanun ku nyithindho mir Amon gioro talanto mi mola ma tar rubanga acel kara gigam igi magali ku weg riuni ku i Mesopotamia, man ku i Aram-maka, man ku i Zoba.

⁷Kum kumeno gigamu igi ku sukulia magali rubanga pier adek wi ario, man ubimo mi Maka ku dhanu pare, m’ubino guro hema i wang’ Medeba. Man nyithindho mir Amon gicokri gigi karacelo ku i adhura migi, man gibino ba lwiny.

⁸Man ka Daudi winjo pire, eoro Yoab, kud udul ceke mi dhanu ma tek.

⁹E nyithindho mir Amon giwodhri, man githero lwiny i dhugang’ mir adhurane: man ju m’ubimo m’ubino gibedo karacelo i thim.

¹⁰Nie ka Yoab uneno nia juthero lwiny i kume i wang’e man i ng’eye, egoyo wi dhanu ma cu ceke mir Israel, man etherogi kum Jucami.

¹¹Man dong’ dhanu emio i cing’ Abicai m’umin mire; e githeri gigi kum nyithindho mir Amon.

¹²Man ewacu kumae, Tek Jucami gibedo tek ira m’usagu, ibilund kony a; ento tek nyithindho mir Amon gibedo tek m’usagu iri, abilund konyi.

¹³Bed ku tegocwiny ma ber, man dong’ wabed ger pi dhanu mwa, man pir adhura pa Mungu mwa: man Yehova tim gin m’ubedo ber ire.

¹⁴Kum kumeno Yoab ku dhanu ma gini kude gicoro ceng’ni wang’ Jucami ba lwiny; e giringo i wang’e.

¹⁵Man ka nyithindho mir Amon gineno nia Jucami ringo, gin bende giringo i wang’ Abicai m’umin mire, e gimondo i adhurane. Yoab ulund ubino Yerusalem.

¹⁶Man ka Jucami neno nia jugoyogi i wang’ Israel, gioro jukwenda, man gigamu Jucami ma gini loka Kulo, karacelo ku Cofak ma jego mir udul pa Hadarezer i wigi.

¹⁷E juyero ni Daudi; man ecoko Israel ceke karacelo, man ekadhu loka Yordan, e ewok i wigi, man ethero lwiny i kumgi. Kum kumeno ka Daudi thero lwiny i kum Jucami, gikiedo kude.

¹⁸E Jucami giringo i wang’ Israel; man Daudi nego kind Jucami weg magali rubanga abiro, ju ma ku tiendgi ke rubanga pier ang’wen, man enego Cofak ma jego mir udul.

¹⁹Man ka jutic pa Hadarezer uneno nia jugoyogi i wang’ Israel, gitimo kwiocwiny ku Daudi, man gitimo ire: kadok Jucami de giyio konyo nyithindho mir Amon kendo ngo.