Read Alur I Lemkei 21 Bible Online

I Lemkei 21 - Alur bible

I Lemkei 21

¹Man Jok ucungo wi Israel, man eting’o cwiny Daudi ya ekwan Israel.

²Man Daudi wacu ni Yoab man ni judongomawijo mi dhanu kumae, Wucidh, wukwan Israel ugambre Ber-ceba cil kum Dan: man wudwok lembene ira, kara ang’ei welgi.

³E Yoab uwacu kumae, Dong’ Yehova med dhanu pare bang’ dak i wel migi: ento, rwoth para m’ubimo, gin ceke gi jutic pa rwoth para ngo? nedi rwoth para penjo gin maeni? nedi ebibedo ni lembaduba wi Israeli?

⁴Ento lembe p’ubimo bedo tek kum Yoab. Kum kumeno Yoab uai, man ecidho ndri ndri i kind Israel ceke, man edwogo Yerusalem.

⁵Man Yoab uwodho wel mi kwan mi dhanu ni Daudi. Man gin ceke mir Israel gi dhanu rubanga rubanga man dak rubanga ma wodho palamularu: man Yuda gi dhanu rubanga dak ang’wen ku pier abiro ma wodho palamularu.

⁶Ento Lawi ku Benyamin ekwanu i kindgi ngo; kum lembe p’ubimo en e ginmajudagu ni Yoab.

⁷Man gin maeni bedo rac i wang’ Mungu: ka kumeno egoyo Israel.

⁸Man Daudi wacu ni Mungu kumae, Adubo dit, kum atimo gin maeni: ento kawono, akwei, cor dubo pa jatic peri cen; kum atimo kasegu dit.

⁹Man Yehova yero ni Gad, ma jaeulembe pa Daudi, ewacu kumae,

¹⁰Cidh iyer ni Daudi, iwac kumae, Yehova wacu kumae, Anyutho iri lembe adek: foi acel m’i kindgi, kara atime i kumi.

¹¹Kum kumeno Gad ubino ba Daudi, man ewacu ire kumae, Yehova wacu kumae, Ifoi m’iyenyo:

¹²kadi ndru mi rundi adek; kadi dwi adek ma jugoi ie i wang’ judegini, kinde ma palamularu mi judegini urubi; kadok ceng’ adek ma palamularu pa Yehova, ma en e thong’om m’i ng’om, man malaika pa Yehova m’unyoth i kieu mir Israel ceke ndri ndri. Ka kumeno kawono pid pi lembaloka ma nedi m’abidwoko ba ng’atu m’uora.

¹³E Daudi wacu ni Gad kumae, Ani i lembe ma tek hai: akwei, wek apodh i cing’ Yehova; kum kisa pare dit hai: man kud apodh i cing’ dhanu.

¹⁴Kum kumeno Yehova oro thong’om wi Israel; man ju m’upodho mir Israel gi dhanu rubanga pier abiro.

¹⁵Man Mungu oro malaika ba Yerusalem kara enyothe: e kinde m’eyenyo nyothe, Yehova neno, man elokre kum lembene ma rac, man ewacu ni malaika mi nyothone kumae, Eromo; kawono wek cingi bedi. Man malaika pa Yehova cungo ng’et lelacam pa Oman ma Jayebusi.

¹⁶E Daudi ting’o wang’e malu, man eneno malaika pa Yehova cungo i kind ng’om ku polo, m’ebedo ku palamularu m’arieya i cinge wi Yerusalem. Daudi ku judongo, ma gironyo gonia, gilund gipodho arieba wang’gi.

¹⁷E Daudi wacu ni Mungu kumae, En e an ungo m’ung’olo ya jukwan dhanu? en e an m’adubo man akier dit; ento rombe maeni, gitimo ang’o? akwei, E Yehova Mungu para, wek cingi bed i wia, man wi ot pa vwa; ento wi dhanu peri ngo, ma nia jusendgi.

¹⁸Malaika pa Yehova lund ung’olo ni Gad ya ewac ni Daudi nia Daudi idh malu, man egur pemblam ni Yehova wi lelacam pa Oman ma Jayebusi.

¹⁹Man Daudi idho malu calu Gad uwacu, m’eyero i nying’ Yehova.

²⁰Man Oman ulokre, e eneno malaika; man wote ang’wen ma gini kude gipondo. Nwang’u Oman ubefodo nganu.

²¹Man ka Daudi bino ba Oman, Oman uneno man eneno Daudi, e eai woko ku wi lelacam, man erum ni Daudi ma wang’e ni ng’om.

²²E Daudi lund uwacu ni Oman kumae, Mi ira kaka mi lelacam maeni, kara agur pemblam ni Yehova i wie: ibimie ira pi welpiny ma bo, kara thong’omne ng’ol ni dhanu.

²³E Oman uwacu ni Daudi kumae, Game iri, man wek rwoth para m’ubimo tim gin m’ubedo ber i wang’e: nen, amio iri koni dhiang’ ni lam m’awang’a, man jambfodo ni yende, man nganu ni lam mi mogo; amie ceke.

²⁴Man ubimo ma Daudi wacu ni Oman kumae, Ungo; ento abing’iewe andha ku welpiny ma bo: kum abigamu maeni ma peri ni Yehova ngo, kadok thiero lam m’awang’a de m’umbe welpiny.

²⁵Kum kumeno Daudi mio cekel mi mola ma kwar dak abusiel m’eporo ku jampor ni Oman mi kaka maeni.

²⁶Man Daudi guro pemblam keca ni Yehova, man ethiero lam m’awang’a ku lam mi kwiocwiny, man elwong’o Yehova; e eloko lembe ire kud i polo ku mac wi pemblam mi lam m’awang’a.

²⁷Man Yehova ng’olo ni malaika; e eroyo palamularu pare kendo i ukorone.

²⁸I nindo maeca ka Daudi neno nia Yehova loko ire lembe wi lelacam pa Oman ma Jayebusi, e elamu lam keca.

²⁹Kum hema pa Yehova, ma Musa timo i langa, ku pemblam mi lam m’awang’a, i nindo maeca gini i ka ma malu i Gibeon.

³⁰Ento Daudi copo cidho i wang’e ngo kara epenj ba Mungu; kum lworo nege kum palamularu pa malaika pa Yehova.