Read Alur I Lemkei 22 Bible Online

I Lemkei 22 - Alur bible

I Lemkei 22

¹Daudi lund uwacu kumae, Maeni ot pa Yehova Mungu, man maeni en e pemblam mi lam m’awang’a mir Israel.

²E Daudi ng’olo ya jucok umondo ma ni i ng’om Israel karacelo; man eketho jubodhomikidi kara gikak kidi ma jugom ko ot pa Mungu.

³Man Daudi yiko nyunyu dupa mi musumali mi dhugola mi dhugang’, man mir ukol; man mola dupa ma kaporne mbe;

⁴man yenmusonge ma welgi mbe: kum Jusidoni ku dhanu m’i Turo gikelo yenmusonge dupa ni Daudi.

⁵E Daudi wacu kumae, Suleman ma woda en e aradu man e tek ungo, man ot ma jubigomo ni Yehova maku ebed ber hai, mi pak man mi yung i ng’om ceke ndri ndri: ka kumeno abiyiko piny m’akana pire. Kum kumeno Daudi yiko piny m’akana dupa ma fodi k’etho ngo.

⁶Elund elwong’o Suleman ma wode, man eng’olo ire ya egom ot pi Yehova, Mungu mir Israel.

⁷Man Daudi wacu ni Suleman ma wode kumae, An gira, nwang’u eni i adundena ya agom ot pi nying’ Yehova Mungu para.

⁸Ento lembe pa Yehova bino i bang’a, uwacu kumae, icwiro rimo dit, man itimo ali dit: ibigomo ot pi nyinga ngo, kum icwiro rimo dit wi ng’om i wang’a.

⁹Nen, jubinyolo nyathin ma nico iri, m’ebibedo dhanu mi mulonga; man abimio ire yom ni judegi pare ceke m’utieke gbur: kum nyinge bibedo Suleman, man abimio kwiocwiny man bedoyo ni Israel i ceng’ pare.

¹⁰Ebigomo ot pi nyinga; man ebibedo woda, man abibedo won; e abiketho komker mi ker pare wi Israel mi nja.

¹¹Kawono, woda, Yehova bed kudi; man lembe bed iri miero, man igom ot pa Yehova Mungu peri, calu eyero piri.

¹²Ndhu Yehova mi iri rieko ku ng’eyong’ec, man emi iri lembang’ola pir Israel; kara iwor cik pa Yehova Mungu peri.

¹³E lembe bilund bedo miero iri, tek ibiketho weng’i kum timo cik man lembapoka ma Yehova ng’olo ni Musa pir Israel: bed tek, man mi tegocwiny ma ber; lworo kud unegi, kadok cwinyi de kud ung’abre.

¹⁴Kawono, nen, i lembarida para ayiko piny mi ot pa Yehova talanto mi mola ma kwar rubanga dak acel, man talanto mi mola ma tar rubanga rubanga, man mi mola ku nyunyu ma kaporne mbe; kum esagre: yen ku kidi bende ayiko man icopo medo i kume.

¹⁵Mange ke jutic ginuti kudi dupa, jubodho mi yen man jubodho mi kidi, ku dhanu ceke ma gi riek i tic ma kwonde tung’ tung’ kubang’e kubang’e:

¹⁶mi mola ma kwar, man mi mola ma tar, man mi mola, man nyunyu, welgi mbe. Ai itim tic, man Yehova bed kudi.

¹⁷Daudi ng’olo ni judongomawijo ceke mir Israel bende ya gikony Suleman ma wode, ewacu kumae,

¹⁸Yehova Mungu mu ni kudu ngo? man emio iwu yom kun ku kun ungo? kum emio ju m’ubedo i ng’om i cinga; man ng’ombe mondo i wang’ Yehova, man i wang’ dhanu pare.

¹⁹Kawono wuketh adundewu man cwiny wu uyeny Yehova Mungu mu; ka kumeno wuai, man wugom kamaleng’ pa Yehova Mungu, kara wukel sanduk mi lembariba pa Yehova, man agulu ma leng’ pa Mungu, i ot ma jubigomo ni nying’ Yehova.