Read Alur I Lemkei 23 Bible Online

I Lemkei 23 - Alur bible

I Lemkei 23

¹Nie Daudi ti man nindo pare dupa; man eketho Suleman ma wode ni ubimo wi Israel.

²Man ecoko judongomawijo ceke mir Israel karacelo, giku julam man Julawi.

³Man jukwanu Julawi ugambre kum rundi pier adek man m’usagu: man welgi ku ba wie ku ba wie, co ku ba co, gi rubanga pier adek wi abora.

⁴Kind jumaeni, rubanga pier ario wi ang’wen tic migi en e neno tic mi ot pa Yehova; man rubanga abusiel gi jego ku jupoklembe;

⁵man rubanga ang’wen gi jukurdhugola; man rubanga ang’wen paku Yehova ku jambwer m’atimo, Daudi wacu, kara jupak kudo.

⁶Man Daudi pokogi i kur migi calku wot Lawi: gi Gercon, man Kohath, ku Merari.

⁷Mi Jugerconi gi eni: Ladan man Cimei.

⁸Man wot Ladan gi eni: Yehiel ma jadit, man Zetham, man Yoel, gin adek.

⁹Wot Cimei gi eni: Celomoth man Haziel, man, Haran, gin adek. Maeni gi judongo mi udi pa wego pa Ladan.

¹⁰Man wot Cimei gi eni: Yahath, man Zina, man Yeuc, man Beria. Juang’wen maeni gi wot Cimei.

¹¹Man Yahath en e Jadit, man Ziza en e mir arionde: ento Yeuc man Beria wotgi dupa ngo; ka kumeno gidoko ot pa wego i kwanu wel acel.

¹²Wot Kohath gi eni: Amram, man Izhar, man Hebron, man Uziel, gin ang’wen.

¹³Wot Amram gi eni: Harun man Musa; man jukoyo Harun, kara edwok gin ma leng’ m’usagu udok leng’, en ku wote, mi nja, kara wang’ udok ma ng’wice ng’ar i wang’ Yehova, kara etim ire, man kara emi mugisa i nyinge, mi nja.

¹⁴Ento pi Musa ma dhanu pa Mungu, julwong’o wote kind suru pa Lawi.

¹⁵Wot Musa gi eni: Gercom man Eliezer.

¹⁶Wot Gercom gi eni: Cebuel ma jadit.

¹⁷Man wot Eliezer gi eni: Rahabia ma jadit; man Eliezer wote mange mbe; ento wot Rehabia gi dupa.

¹⁸Wot Izhar gi eni: Celomith ma jadit.

¹⁹Wot Hebron gi eni: Yeria ma jadit, man Amaria mir arionde, man Yahaziel mir adege, man Yekameam mir ang’wende.

²⁰Wot Uziel gi eni: Mika ma jadit, man Iscia mir arionde.

²¹Wot Merari gi eni: Mali man Muci. Wot Mali gi eni: Eleazar man Kic.

²²Man Eleazar utho, man wote mbe, ento nyige kende: man utumeggi ma wot Kic ugamugi ni mon.

²³Wot Muci gi eni: Mali, man Eder, man Yeremoth, gin adek.

²⁴Maeni gi wot Lawi calku udi pa weggi, en e wi udi pa wego mi jumaeni ma jukwanu, i wel mi nying’ wic ku ba wic migi, m’utimo tic mi timotim mi ot pa Yehova, ugambre kum ma rundine pier ario man m’usagu.

²⁵Kum Daudi wacu kumae, Yehova, Mungu mir Israel, umio yom ni dhanu pare; man ebedo i Yerusalem mi nja:

²⁶man Julawi bende can yeyo hema binegogi ngo kud agulune ceke pi timotimne.

²⁷Kum ni kum lembe ma cen pa Daudi jukwanu wot Lawi, ugambre kum rundine pier ario ku ma sagu.

²⁸Kum tic migi en e kuro wot Harun kum timotim mi ot pa Yehova, i lelagang’, man i kusika, man i dwokrileng’ mi gin ma leng’ ceke, cil tic mi timotim mi ot pa Mungu;

²⁹mi kwen m’anyutha bende, man mi mogo ma yom pi girathiera mi mogo, kadok mi kwen m’apada ma thobi mbe i ie, kadi mi gin ma jutedo i atangla, kadi mi gin ma juyomo i pi, man mi mukero ku jambpor ceke ma kwonde tung’ tung’;

³⁰man kara gicung ku ba rupiny ku ba rupiny gifoi gipak Yehova, man kud uthieno kumeca;

³¹man kara githier lam m’awang’a ceke ni Yehova, i ceng’ sabatu, man i dwi m’upor, man i agba ma juketho, i wel calku lembapoka ma pigi, thiri thiri i wang’ Yehova:

³²man kara gigwok lembang’ola mi hema mi cokri, man lembang’ola mi kamaleng’, man lembang’ola mi wot Harun ma utumeggi, pi timotim mi ot pa Yehova.