Read Alur I Lemkei 26 Bible Online

I Lemkei 26 - Alur bible

I Lemkei 26

¹Ni kur mi jukurdhugola gi eni: mi Jukorahi, Mecelemia ma wod Kore, mi wot Asaf.

²Man Mecelemia wote nuti: Zekaria ma kayu, Yediayel mir arionde, man Zebadia mir adege, man Yathniel mir ang’wende.

³Elam mir abije, Yehohanan mir abusiende, Eliehoenai mir abirone.

⁴Man Obed-edom wote nuti: Cemaya ma kayu, Yehozabad mir arionde, Yohac mir adege, man Sakar mir ang’wende, man Nethanel mir abije,

⁵Amiel mir abusiende, Isakar mir abirone, Peulethai mir aborane; kum Mungu mio mugisa ire.

⁶Ni Cemaya ma wode bende junyolo wote, m’ubimo wi ot pa weggi; kum gi dhanu ma tek ma ratego.

⁷Wot Cemaya gi eni: Othni, man Refayel, man Obed, man Elzabad, ma utumin mire gi dhanu ma jukero, man Elihu, ku Semakia.

⁸Maeni ceke gi wot Obed-edom: gin ku wotgi man uturneggi, gi dhanu ma cu i tego mi timotim; gi dhanu pier abusiel wi ario pa Obed-edom.

⁹Man Mecelemia wote nuti man utumin, dhanu ma jukero, apar wi abora.

¹⁰Hosa bende, mi nyithindho pa Merari, wote nuti: Cimri ma jadit (kum kadok en e kayu ngo, ento won udwoke ni jadit),

¹¹Hilkia mir arionde, Tebalia mir adege, Zekaria mir ang’wende: wot ceke ku utumin Hosa gin apar wi adek.

¹²Kind jumaeni kur mi jukurdhugola nuti, cil mi dhanu ma dongo, ma tic migi nuti calu uturneggi, kara gitim i ot pa Yehova.

¹³E gigoyo gagi, ju ma thindho calu ju ma dongo, calku udi pa weggi, pi dhugang’ kubang’e kubang’e.

¹⁴Man gagi ma yo nyangu podho ba Celemia. Ma cen ni Zekaria ma wode, ma en e japorlembe ma riek, gigoyo gagi; e gagi pare wodhre yor ariwa ma malu.

¹⁵Ni Obed-edom yor ariwa ma piny; man ni wote otkanpiny.

¹⁶Ni Cupim man Hosa yo reto, ba dhugang’ mi Caleketh, kum yo m’utingre ma idho malu, kakur kum kakur.

¹⁷Yo nyangu Julawi abusiel nuti, yor ariwa ma malu juang’wen mi ceng’ ku ceng’, yor ariwa ma piny juang’wen mi ceng’ ku ceng’, man mi otkanpiny ario ario.

¹⁸Mi Parbar yo reto, kum yo m’utingre juang’wen, man juario kum Parbar.

¹⁹Maeni gi kur mi jukurdhugola; mi wot Jukorahi, man mi wot Merari.

²⁰Man mi Julawi, Ahija en e wi piny m’akana mi ot pa Mungu, man wi piny m’akana mi gin ma juthiero.

²¹Wot Ladan, ma wot Jugerconi ma gi pa Ladan, gi wi udi pa weggi ma pa Ladan ma Jagerconi: Yehieli.

²²Wot Yehieli gi eni: Zetham, man Yoel m’umin mire, wi piny m’akana mi ot pa Yehova.

²³Mi Juamrami, mi Juizhari, mi Juhebroni, mi Juuzieu:

²⁴man Cebuel ma wod Gercom, ma wod Musa, en e jabim wi piny m’akana.

²⁵Man utumin mire gi eni: mi Eliezer, Rehabia ma wode, man Yecaya ma wode, man Yoram ma wode, man Zikri ma wode, man Celomoth ma wode.

²⁶Celomoth maeni man utumin mire gini wi piny m’akana ceke mi gin ma juthiero, ma Daudi m’ubimo, ku wi udi pa wego, ma gi jego wi rubanga man dak, man jego mir udul, uthiero.

²⁷Kud i ayeki ma junwang’u i lwiny githiero kara uyik ot pa Yehova.

²⁸Man gin ceke ma Samwil ma jaeulembe, ku Saul ma wod Kic, man Abner ma wod Ner, ku Yoab ma wod Zeruia, uthiero, ng’atu ma tek uthiero gin moko, en e the cing’ Celomoth, man utumin mire.

²⁹Mi Juishari, Kenania man wote gi mi tic wi Israel ma woko, mi jego man jupoklembe.

³⁰Mi Juhebroni, Hacabia ku utumin mire, dhanu ma ratego, rubanga acel ku dak abiro, gibedo junen wi Israel loka Yordan yo reto, mi tic ceke pa Yehova, man mi tic p’ubimo.

³¹Mi Juhebroni, Yerija en e jadit, cil mi Juhebroni, calku dhanum’utuk migi ku ba udi pa wego. I rundi pier ang’wende mi camuker pa Daudi jubeyenyo joca, e junwang’u i kindgi dhanu ma tek ma ratego i Yazer mi Gilead.

³²Man utumin mire, dhanu ma ratego, gi rubanga ario man dak abiro, ma gi wi udi pa wego, m’ubimo ma Daudi dwoko ni junen wi Jurubeni, man Jugadi, man ng’et suru pa Manase, kum lembe ceke kubang’e kubang’e ma pi Mungu, man pi lembe mir ubimo.