Read Alur I Lemkei 27 Bible Online

I Lemkei 27 - Alur bible

I Lemkei 27

¹Nie nyithindho mir Israel calku wel migi, wi udi pa wego man jego mi rubanga man mi dak, man jukal migi m’utimo ni ubimo, i lembe moko mi kur m’umondo m’uwok de dwi ku dwi ceke mi rundi, mi kur ceke kubang’e kubang’e en e rubanga pier ario wi ang’wen.

²Wi kur ma kwong’ane mi dwi ma kwong’ane en e Yarcobeam ma wod Zabdiel: man i kur pare dhanu rubanga pier ario wi ang’wen.

³Man en e mi nyithindho pa Perez, ma jadit mi jego ceke mir udul i dwi ma kwong’ane.

⁴Man wi kur mi dwi mir arionde en e Dodai ma Jaahohi, ku kur pare; man Mikloth ma jabim: man i kur pare dhanu rubanga pier ario wi ang’wen.

⁵Jego mir adege mir udul mi dwi mir adege en e Benaya, ma wod Yehoida ma jalam, e jadit: man i kur pare dhanu rubanga pier ario wi ang’wen.

⁶Maeni Benaya maeno, ma en e dhanu ma tek ma kind pier adek, man en e wi pier adekne: man mi kur pare en e Amizabad ma wode.

⁷Jego mir ang’wende mi dwi mir ang’wende en e Asahel m’umin Yoab, man Zebadia ma wode yo ng’eye: man i kur pare dhanu rubanga pier ario wi ang’wen.

⁸E jego mir abije mi dwi mir abije en e Camhuth ma Jaizrahi: man i kur pare dhanu rubanga pier ario wi ang’wen.

⁹Jego mir abusiende mi dwi mir abusiende en e Ira ma wod Ikec ma Jatekohi: man i kur pare rubanga pier ario wi ang’wen.

¹⁰Jego mir abirone mi dwi mir abirone en e Helez ma Japeloni, mi nyithindho pa Efraim: man i kur pare rubanga pier ario wi ang’wen.

¹¹Jego mir aborane mi dwi mir aborane en e Sibekai ma Jahucathi, mi Juzerahi: man i kur pare dhanu rubanga pier ario wi ang’wen.

¹²Jego mir abung’wende mi dwi mir abung’wende en e Abiezer ma Jaanathothi, mi Jubenyamini: man i kur pare dhanu rubanga pier ario wi ang’wen.

¹³Jego mir apaje mi dwi mir apaje en e Maharai ma Janetofathi, mi Juzerahi: man i kur pare dhanu rubanga pier ario wi ang’wen.

¹⁴Jego mir apar wi acende mi dwi apar wi acende en e Benaya ma Japirathoni, mi nyithindho pa Efraim: man i kur pare dhanu rubanga pier ario wi ang’wen.

¹⁵Jego mir apar wi arionde mi dwi apar wi arionde en e Heldai ma Janetofathi, pa Othniel; man i kur pare dhanu rubanga pier ario wi ang’wen.

¹⁶Mange ke wi suru pa Israel gi eni: mi Jurubeni en e Eliezer ma wod Zikri ma jabim: mi Jusimeoni, Cefatia ma wod Maka:

¹⁷mi Lawi, Hacabia ma wod Kemuel: mi Harun, Zadok;

¹⁸mi Yuda, Elihu, en e ng’atu acel ma kind utumeg Daudi: mi Isakar, Omri ma wod Mikael:

¹⁹mi Zebulun, Icmaya ma wod Obadia: mi Naftali, Yeremoth ma wod Azriel:

²⁰mi nyithindho pa Efraim, Hoceya ma wod Azazia: mi ng’et suru pa Manase, Yoel ma wod Pedaya:

²¹mi ng’et suru pa Manase i Gilead, Ido ma wod Zekaria: mi Benyamin, Yaasiel ma wod Abner:

²²mi Dan, Azarel ma wod Yeroham. Maeni gi jego mi suru mir Israel.

²³Ento Daudi gamu wel mi joni ngo ma rundi migi pier ario ku ma fodi de, kum Yehova wacu nia ebimedo Israel calu cero m’i polo.

²⁴Yoab ma wod Zeruia maku kwanu, ento edaru ngo; man kwinyo wok wi Israel kum maeni; kadi welgi de juketho ngo i wel mi lemkei pa Daudi m’ubimo.

²⁵Man wi piny m’akana p’ubimo en e Azmaveth ma wod Adiel: man wi piny m’akana i podho, i adhura, man i pacu, man i udi ma tek, en e Yonathan ma wod Uzia:

²⁶man wi ju m’utimo tic mi podho m’ufuro ng’om en e Ezri ma wod Kelub:

²⁷man wi podho mir ulok en e Cimei ma Jaramathi: man wi medri mi podho mir ulok mi otkan pigulok en e Zabdi ma Jacifmi:

²⁸man wi yendulam kud uyelo ma gini i poga en e Bal-hanan ma Jagederi: man wi otkan mi mo en e Yoac:

²⁹man wi udul lim m’ucamu i Caron en e Citrai ma Jacaroni: man wi udul lim ma gini i poga en e Cafat ma wod Adlai:

³⁰man wi ngamia en e Obil ma Jaicmaeli: man wi kana en e Yedeya ma Jameronothi: man wi udul rombe en e Yaziz ma Jahagri.

³¹Maeni ceke gi jubim mi piny pa Daudi m’ubimo.

³²Yonathan bende ma neru Daudi, en e japorlembe, en e dhanu mi ng’eyong’ec, man en e jagorcik: man Yehiel ma wod Hakmoni eni karacelo ku wot ubimo:

³³man Ahithofel en e japorlembe p’ubimo: man Hucai ma Jaarki en e jarimb ubimo:

³⁴man yo ng’ei Ahithofel en e Yehoiada ma wod Benaya, man Abiathar: man jego mir udul p’ubimo en e Yoab.