Read Alur I Lemkei 28 Bible Online

I Lemkei 28 - Alur bible

I Lemkei 28

¹Man Daudi coko judongomawijo ceke mir Israel, judongomawijo mi suru, man jego mir udul m’utimo ni ubimo ku ba kur ku ba kur, man jego mi rubanga, ku jego mi dak, man jubim wi piny ceke ku lim p’ubimo man mi wote, karacelo ku jukal, man dhanu ma tek, cil dhanu ceke ma tek ma ratego, i Yerusalem.

²Daudi m’ubimo lund ucungo wi tiende, man ewacu kumae, Wuwinja, utumira, man dhanu para: an gira, nwang’u eni i adundena ya agom ot mi yom ni sanduk mi lembariba pa Yehova, man mi kom mi tiend Mungu mwa; e adaru yiko jamgom.

³Ento Mungu wacu ira kumae, Ibigomo ot pi nyinga ngo, kum in i dhanu mir ali, man icwiro rimo.

⁴Ento Yehova, Mungu mir Israel, egoyo wia kud i ot ceke pa vwa kara abed ubimo wi Israel mi nja: kum egoyo wi Yuda ya ebed jaditmawijo; man i ot pa Yuda, ot pa vwa; man i kind wot vwa mutoro nege i kuma nia eketha ni ubimo wi Israel ceke;

⁵man i kind wota ceke (kum Yehova mio ira wot dupa), egoyo wi Suleman ma woda ya ujany wi komker mi ker pa Yehova wi Israel.

⁶Man ewacu ira kumae, Suleman ma wodi, ebigomo ot para ma lelagang’ para; kum agoyo wie nia ebed woda, e abibedo won.

⁷Man, abiketho ker pare cungo mi nja, tek emoko kum timo lembang’ola para man lembapoka para, calu i ceng’ ma tin.

⁸Ka kumeno kawono, i wang’ Israel ceke, ma udul pa Yehova, man i ith Mungu mwa, dong’ iwor man iyeny lembang’ola ceke pa Yehova Mungu mu; kara wumwony ng’om maeni ma ber; man wuweke ni aba ni nyithindho mu yo ng’eiwu mi nja.

⁹Man in, Suleman ma woda, dong’ ing’ei Mungu pa wuru, man itim ire kud adundeni ma cu man ku pidoic ma yot; kum Yehova yenyo i adunde ceke, man eng’eyo porolembe ceke mi pidoic. Tek iyenye, ebinwangre iri; ento tek iweke, ebibei woko mi nja.

¹⁰Bed ku weng’i kawono; kum Yehova goyo wii kara igom ot mi kamaleng’: bed tek, man itime.

¹¹Daudi lund umio ayi mi pondot mi hekalu ni Suleman ma wode, man mi udine, man mi kakanpinyne, man mi kusika ma malune, man mi kusika ma yor i iene, man mi ka kabedomikisa;

¹²man ayi gin ceke m’ebedo ko ni kum Tipo, pi lelagang’ mi ot pa Yehova, man mi kusika ceke mi ng’ete gbur, mi kakanpiny mi ot pa Mungu, man mi kakanpiny mi gin ma juthiero;

¹³mi kur bende mi julam man mi Julawi, man mi tic ceke mi timotim mi ot pa Yehova, man mir agulu ceke mi timotim i ot pa Yehova;

¹⁴mi mola ma kwar m’apora ku jampor pir agulu mi mola ma kwar, pir agulu ceke ma kwonde tung’ tung’ mi timotim; mi mola ma tar m’apora ku jampor, pir agulu ceke ma kwonde tung’ tung’ mi timotim;

¹⁵mi thethala mi mola ma kwar bende m’apora, ku jampor man mi thalane de, mi mola ma kwar m’apora ku jampor mi thethala kubang’e kubang’e man mi thalane de; man mi thethala mi mola ma tar, mola ma tar ma juporo ku jampor mi thethala kubang’e kubang’e man mi thalane de, calku timotim mi thethala kubang’e kubang’e;

¹⁶man mola ma kwar m’apora ku jampor pi mesa mi kwen m’anyutha, mi mesa kubang’e kubang’e; man mola ma tar mi mesa mi mola ma tar;

¹⁷man gol mi ring’o, ku tabu, man kikombe, mi mola ma kwar ma leng’; man mi tabu mi mola ma kwar m’apora ku jampor, mi tabu kubang’e kubang’e; man mi tabu mi mola ma tar m’apora ku jampor mi tabu kubang’e kubang’e;

¹⁸man mi pemblam mir udok ma ng’wice ng’ar mola ma kwar ma julenyo ku mac m’apora ku jampor; man mola ma kwar mir ayi magali, ma en e kerubi, m’uyaru bombgi, man uumo sanduk mi lembariba pa Yehova.

¹⁹Maeni ceke, Daudi wacu, juketho ang’eyo i lembagora kud i cing’ Yehova, cil tic maeni ceke mir ayi maeni.

²⁰Man Daudi wacu ni Suleman ma wode kumae, Bed tek man ku tegocwiny ma ber, man itime: kud ilwor, kadi cwinyi de kud ung’abre; kum Yehova Mungu, en e Mungu para, eni kudi; ebirem iri ngo, kadi akuna de ebikuni ngo, cil ma tic ceke mi timotim mi ot pa Yehova bithum ko.

²¹Man, nen, kur mi julam man Julawi ginuti, mi timotim ceke mi ot pa Mungu: man ibibedo karacelo ku dhanu kubang’gi kubang’gi ma cwiny gi ber ma jubodho de, pi tic ceke ma kwonde tung’ tung’: man jego bende ku dhanu ceke gibibedo the lembang’ola peri kr.