Read Alur I Lemkei 29 Bible Online

I Lemkei 29 - Alur bible

I Lemkei 29

¹Man Daudi m’ubimo wacu ni cokri ceke kumae, Suleman ma woda, ma Mungu goyo wie en e kende, fodi en e aradu man e tek ungo, man tic en e dit; kum ot ma tekne en e mi dhanu ngo, ento pa Yehova Mungu.

²Nie ayiko ku tegona ceke pi ot pa Mungu para mola ma kwar mi jamb mola ma kwar, man mola ma tar mi jamb mola ma tar, man mola mi jamb mola, man nyunyu mi jamb nyunyu, man yen mi jamb yen; kidi m’athobi, man kidi ma jubing’iko, kidi ma jung’iko, man mi kit piny ma kwonde tung’ tung’, man kidi ma pire tek ma kwonde tung’ tung’ ceke, ku kidi ma tek hai mi gom dupa.

³Mange ke, kum aketho mer para wi ot pa Mungu para, kum nwang’u abedo ku piny m’akana ma para gira mi mola ma kwar man mi mola ma tar, amie mi ot pa Mungu para, umedo ceke m’ayiko mi ot ma leng’,

⁴ma en e talanto mi mola ma kwar rubanga adek, mi mola ma kwar mir Ofir, man talanto rubanga abiro mi mola ma tar ma julenyo ku mac, ma jubimwono ko kor udi;

⁵mi mola ma kwar pi jamb mola ma kwar, man mi mola ma tar pi jamb mola ma tar, man mi tic ceke ma kwonde tung’ tung’ ma jubitimo ku cing’ jubodho. Ng’a m’ulund uwodhre ku berocwinye kara emire gire i ceng’ maeni ni Yehova?

⁶Judongomawijo mi udi pa wego, man judongomawijo mi suru mir Israel man jego mi rubanga man mi dak, karacelo ku jubim ma wi tic p’ubimo, gilund githiero ku berocwinygi:

⁷man gimio pi timotim mi ot pa Mungu kum mola ma kwar talanto rubanga abic man sente rubanga apar, man mi mola ma tar talanto rubanga apar, man mi mola talanto rubanga apar wi abora, mi nyunyu ke talanto rubanga dak.

⁸Man ju ma gi weg kidi ma pire tek gimiogi ni piny m’akana mi ot pa Yehova, ma the cing’ Yehiel ma Jagerconi.

⁹Anyong’a lund unego dhanu, kum githiero ku berocwinygi, kum kud adundegi ma cu githiero ku berocwinygi ni Yehova: man Daudi m’ubimo bende anyong’a nege kud anyong’a ma dit.

¹⁰Kum kumeno Daudi mio mugisa ni Yehova i wang’ cokri ceke: e Daudi wacu kumae, Mugisa bed iri, E Yehova, Mungu mir Israel ma wegwa, mi rondo ku rondo.

¹¹E Yehova, dit, man tego, man yung, man aloci, ku dwong’ en e peri: kum gin ceke ma ni i polo ku ma ni i ng’om en e peri; ker en e peri, E Yehova, man judodi calu wie wi gin ceke.

¹²Lonyo ku yung uai i beng’i, man ibimo wi gin ceke; man i cingi tego man tek ginuti; man dwoko dit ni i cingi, man mio tego ni dhanu ceke.

¹³Ka kumeno kawono, Mungu mwa, wafoi, man wapaku nyingi mi dwong’.

¹⁴Ento an a ng’a, man dhanu para en e ang’o, ma nia wacopo thiero ku wagi berocwiny ma kumeni? kum gin ceke ai i beng’i, man wamio iri kum gin ma peri giri.

¹⁵Kum wan wa welo i weng’i, man umondo, calu wegwa ceke bedo: ceng’ mwa ma wi ng’om en e calu tipo, man genogen mi bedo mbe.

¹⁶E Yehova Mungu mwa, piny maeni ceke ma wayiko kara ugom ot iri pi nyingi ma leng’ uai kud i cingi, man ceke en e peri giri.

¹⁷Ang’eyo bende, Mungu para, nia iponjo adunde, man anyong’a negi i bedopwe. An gira, i bedopwe mir adundena athiero ku beroewinya gin maeni ceke: man kawono aneno kud anyong’a dhanu peri, ma ginuti keni, githiero iri ku berocwiny.

¹⁸E Yehova, Mungu pa Ibrahim, pa Isak, man pa Israel, ma wegwa, gwok maeni mi nja pi lembapora mi pidoie mir adunde dhanu peri, man yik adundegi i beng’i;

¹⁹man mi ni Suleman, ma woda adunde ma cu, kara ewor lembang’ola peri, ku lembatuca peri, man cik peri, man kara etim gin maeni ceke, man egom ot ma ber, m’ayiko piny pire.

²⁰Man Daudi wacu ni cokri ceke kumae, Kawono wumi mugisa ni Yehova Mungu mu. Man cokri ceke gimio mugisa ni Yehova, Mungu pa kwarugi, man gikulo wigi e girwo ni Yehova, man ubimo.

²¹Man gilamu lam ni Yehova, man githiero lam m’awang’a ni Yehova, urwone yo ng’ei ceng’ maeni, en e thwoni dhiang’ rubanga acel, man nyogi rombe rubanga acel, ku nyithi rombe rubanga acel, karacelo ku lam m’amadha migi, man lam dupa mir Israel ceke,

²²man gicamu gimadhu de i wang’ Yehova i ceng’ maeca ku mutoro ma dit. E giketho Suleman ma wod Daudi ni ubimo wang’ arionde, man giwire ni Yehova kara ebed jaditmawijo, man Zadok kara ebed jalam.

²³Suleman ulund ujany wi komker pa Yehova calu ubimo i ka pa Daudi ma won, man lembe bedo miero ire; e Israel ceke giwore.

²⁴Man judongomawijo ceke, ku dhanu ma tek, man wot ubimo ma Daudi ceke bende, gimondo gigi ni Suleman m’ubimo.

²⁵E Yehova dodo Suleman apila i wang’ Israel ceke, man emio ire dwong’ mi ker ma sagu mir ubimo moko m’ular ubedo ire i Israel.

²⁶Nie Daudi ma wod Yese camu ker wi Israel ceke.

²⁷Man nindo m’ecamu ie ker wi Israel en e rundi pier ang’wen; ecamu ker rundi abiro i Hebron, man rundi pier adek wi adek ecamu ker i Yerusalem.

²⁸Man etho i tio ma ber, m’epong’ ku ceng’, ku lonyo, man yung: man Suleman ma wode camu ker kakare.

²⁹Nie tic pa Daudi m’ubimo, ma kwong’ane man ma cenne gigore i lemkei pa Samwil ma jaeulembe, man i lemkei pa Nathan ma jabila, man i lemkei pa Gad ma jaeulembe,

³⁰ku camu ker pare ceke man tek pare, man nindo m’ukadhu i wie, man wi Israel, man wi ker ceke m’i ng’om.