Read Alur 2 Lemkei 10 Bible Online

2 Lemkei 10 - Alur bible

2 Lemkei 10

¹Man Rehoboam ucidho i Cekem; kum Israel ceke gibino Cekem kara gikethe ni ubimo.

²Man etimbre, kinde ma Yeroboam ma wod Nebat uwinjo pire (kum eni i Misiri, ka m’eringo ie kud i vut ubimo ma Suleman), nia Yeroboam udwogo kud i Misiri.

³E gioro kwenda man gilwong’e; e Yeroboam kud Israel ceke gibino, man giweco giku Rehoboamgi, giwacu kumae,

⁴Wuru dwoko mberembere mwa pek: ka kumeno kawono dong’ iketh tic ma pek pa wuru, ku mberembere pare ma pek m’eketho i wiwa, udok yot moko, e wabitimo iri.

⁵E ewacu igi kumae, Wubin i bang’a kendo yo ng’ei ceng’ adek. E dhanu giai.

⁶Man Rehoboam m’ubimo uporo lembe ku dhanu m’uti, m’ucungo i wang’ Suleman ma won kinde m’ebedo kwo, ewacu kumae, Lembapora ma nedi ma wumio ira m’adwok ni dhanu maeni?

⁷E giyero ire, giwacu kumae, Tek itimo ber ba dhanu maeni, man inyayu mutoro i igi, man iyero lembe ma ber i bang’gi, gibilund bedo jutic peri mi nja.

⁸Ento eweko lembapora mi dhanu m’uti ma gimio ire, man giporo lembe gikud awobi ma gidongo gikugi, m’ucungo i wang’e.

⁹Man ewacu igi kumae, Lembapora ma nedi, ma wumio, kara wadwok lembe ni dhanu maeni, m’uyero ira, m’uwacu kumae, Dwok mberembere ma wuru ketho i wiwa yoti?

¹⁰Man awobi ma gidongo kugi giyero ire, giwacu kumae, Ibiwacu kumae ni dhanu m’uyero iri, m’uwacu kumae, Wuru dwoko mberembere mwa pek, ento dong’ idwoke yot moko iwa; ibiwacu igi kumae, Lweta ma cogo e dit ma sagu pier vwa.

¹¹Nie tek vwa ketho mberembere ma pek i wiwu, abimedo wi mberembere mu: vwa goyowu ku del, ento abigoyowu ku ith.

¹²Ka kumeno Yeroboam ku dhanu ceke gibino ba Rehoboam i ceng’ mir adege, calu ubimo ng’olo, m’ewacu kumae, Wubin i bang’a kendo i ceng’ mir adege.

¹³E ubimo loko lembe igi tek; man ubimo Rehoboam uweko lembapora mi dhanu m’uti,

¹⁴man eyero igi calu lembapora mir awobi, ewacu kumae, Vwa dwoko mberembere mu pek, ento abimedo wie: vwa goyowu ku del, ento abigoyowu ku ith.

¹⁵Kum kumeno ubimo winjo dwand dhanu ngo; kum Mungu ketho lembene timbre en, kara Yehova keth lembe pare cungi, m’eyero ku dhu Ahija ma Jaciloni ni Yeroboam ma wod Nebat.

¹⁶Man kinde ma Israel ceke neno nia ubimo winjo dwandgi ngo, dhanu dwoko lembe ni ubimo, giwacu kumae, Makapiny mwa ang’o ma ni ba Daudi? kadok aba de wabedo ko ngo ni kum wod Yese: ku ba dhanu ceke ba hema mu, E Israel: dong’ icung kum ot peri, Daudi. Kum kumeno Israel ceke dok ba hema migi.

¹⁷Ento pi nyithindho mir Israel m’ubedo i adhura mi Yuda, Rehoboam ucamu ker i wigi.

¹⁸Ubimo ma Rehoboam ulund uoro Hadoram, ma ni wi dhanu ma juketho kum tic mi olo; e nyithindho mir Israel ucanye ku kidi ketho etho. Man ubimo ma Rehoboam utimo pio kara eidh malu i magali pare, ering i Yerusalem.

¹⁹Kum kumeno Israel ujai ni ot pa Daudi cil i ceng’ ma tin.