Read Alur 2 Lemkei 11 Bible Online

2 Lemkei 11 - Alur bible

2 Lemkei 11

¹Man kinde ma Rehoboam ubino Yerusalem, ecoko ot pa Yuda ku Benyamin, dhanu ma jugoyo wigi rubanga dak acel ku pier abora, ma gi weg ali, kara gikied kum Israel, kara gidwok ker kendo ba Rehoboam.

²Ento lembe pa Yehova bino ba Cemaya ma dhanu pa Mungu, m’uwacu kumae,

³Yer ni Rehoboam ma wod Suleman, m’ubimo mi Yuda, man ni Israel ceke i Yuda man i Benyamin, wac kumae,

⁴Yehova wacu kumae, Kud wuidh malu, kadi kud wukied ku utumegwu: ku ba dhanu ceke ng’atuman udok i ot pare; kum gin maeni ai i bang’a. Kum kumeno giwinjo lembe pa Yehova, man gidwogo ku ba cidho kum Yeroboam.

⁵Man Rehoboam ubedo i Yerusalem, man egomo adhura mi gwok i Yuda.

⁶Egomo Beth-lehem, man Etam, ku Tekoa,

⁷man Beth-zur, man Soko, man Adulam,

⁸man Gath, man Mareca, man Zif,

⁹man Adoraim, man Lakic, man Azeka,

¹⁰man Zora, man Aijalon, man Hebron, ma ni i Yuda kud i Benyamin, adhura ma tek.

¹¹Man edwoko ka ma tek tek, man eketho jego i igi, ku cemo m’akana, ku mo man pigulok.

¹²Man eketho ban ku tong’ i adhura kubang’e kubang’e, e edwokogi tek apila. Man Yuda ku Benyamin gi piny pare.

¹³Man julam ku Julawi ma gini i Israel ceke gibino i bang’e kud i kieu migi ceke.

¹⁴Kum Julawi giweko ng’et adhura migi ku piny migi, man gibino Yuda ku Yerusalem: kum Yeroboam ku wote giriemogi woko, kara ku gitim tic ma pa jalam ni Yehova;

¹⁵man eketho julam ire mi ka ma malu, man mi nyogi diegi, man ni nyithi dhiang’ m’etimo.

¹⁶Man yo ng’eigi, kud i kind suru ceke mir Israel, wadi ju m’uketho adundegi kum lubo Yehova, Mungu mir Israel, gibino Yerusalem kara gilam lam ni Yehova, ma Mungu pa kwaru migi.

¹⁷Kum kumeno gidwoko ker pa Yuda tek, man gidwoko Rehoboam ma wod Suleman tek, rundi adek; kum giwotho rundi adek i yo pa Daudi ku Suleman.

¹⁸Man Rehoboam ugamu ire dhaku, Mahalath ma nya Yerimoth ma wod Daudi, man mi Abihail ma nyar Eliab ma wod Yese;

¹⁹e enyolo ire nyithindho ma co: gi Yeuc, man Cemaria, man Zaham.

²⁰Man yo ng’eye egamu Maka ma nyar Absalom; man enyolo ire Abija, kud Atai, man Ziza, ku Celomith.

²¹Man Rehoboam umaru Maka ma nyar Absalom ma sagu mon pare ceke ku mon pare m’araga (kum egamu mon apar wi abora ku mon m’araga pier abusiel, man enyolo wote pier ario wi abora ku nyige pier abusiel).

²²Man Rehoboam ugoyo wi Abija ma wod Maka ubed jadit, en e jatelwic i kind utumin mire; kum ie pido ya ekethe ni ubimo.

²³E etimo ku rieko, man elalu wote ceke i kind ng’om mi Yuda ku Benyamin mba mba, ku bang’ adhura ceke ma tek: man emio igi cemo dupa. Man eyenyo igi mon dupa.