Read Alur 2 Lemkei 12 Bible Online

2 Lemkei 12 - Alur bible

2 Lemkei 12

¹Man etimbre, kinde ma ker pa Rehoboam ucungo, man e tek, nia eweko cik pa Yehova, kud Israel ceke gikugi.

²Man etimbre i rundi mir abije p’ubimo ma Rehoboam, nia Cicak m’ubimo mi Misiri idho malu kum Yerusalem, kum gidubo ni Yehova,

³ebino ku magali dak apar wi ario, ku weg riuni rubanga pier abusiel. E dhanu ma gibino kugi kud i Misiri welgi mbe: gi Julubi, ku Jusuki, man Jukuci.

⁴Man emaku adhura ma tek ma pa Yuda man ebino Yerusalem.

⁵Nie Cemaya ma jabila bino ba Rehoboam, man ba judongomawijo mi Yuda, m’ucokri karacelo i Yerusalem ni kum Cicak, e ewacu igi kumae, Yehova wacu kumae, Wuweka, ka kumeno an bende awekowu i cing’ Cicak.

⁶E judongomawijo mir Israel kud ubimo de gilund gijwigri gigi; man giwacu kumae, Yehova en e pwe.

⁷Man kinde ma Yehova neno nia gijwigri gigi, lembe pa Yehova bino ba Cemaya, m’uwacu kumae, Gijwigri gigi: abinyothogi ngo; ento abimio igi both moko, man kwinyo para bikonjre woko wi Yerusalem ungo ku cing’ Cicak.

⁸Ento gibibedo jutic pare, kara ging’ei tic para ku tic mi ker mi ng’om.

⁹Kum kumeno Cicak m’ubimo mi Misiri bino malu kum Yerusalem, man eyaku piny m’akana kud i ot pa Yehova, ku piny m’akana mi ot p’ubimo; ekabu ceke woko: ekabu ban mi mola ma kwar ma Suleman utimo bende.

¹⁰E ubimo ma Rehoboam utimo ban mi mola kakagi, man ekethogi i cing’ jego mi jukur, ma gwoko dhugola mi ot p’ubimo.

¹¹Man ebedo kumeno, nia, kan ubimo mondo i ot pa Yehova, jakur ubino man eyeyogi, e edwokogi kendo i kusika mi kur.

¹²E kinde m’ejwigre gire, kwinyo pa Yehova lokre kud i bang’e, kara kud unyothe kot: man kendo i Yuda junwang’u gin moko ma ber.

¹³Kum kumeno ubimo ma Rehoboam utegre gire i Yerusalem, man ecamu ker: kum Rehoboam rundi pare pier ang’wen wi acel kinde m’emaku camu ker, man ecamu ker rundi apar wi abiro i Yerusalem, adhura ma Yehova goyo wie kud i suru ceke mir Israel, kara eketh nyinge keca: man nying’ min mire Nama ma Nyaamoni.

¹⁴Man etimo gin ma rac, kum eketho adundene ngo kara eyeny Yehova.

¹⁵Nie tic pa Rehoboam, ma kwong’ane ku ma cenne, gigore i lemkei pa Cemaya ma jabila man pa Ido ma jaeulembe, calku kura mi thekwaru ngo? Man ali ni i kind Rehoboam ku Yeroboam thiri thiri.

¹⁶Man Rehoboam unindo ku kwaru pare, man juyike i adhura pa Daudi: man Abija ma wode camu ker kakare.