Read Alur 2 Lemkei 13 Bible Online

2 Lemkei 13 - Alur bible

2 Lemkei 13

¹I rundi apar wi aborane p’ubimo ma Yeroboam, Abija maku camu ker wi Yuda.

²Ecamu ker i Yerusalem rundi adek: man nying’ min mire Mikaya ma nyar Uriel ma Gibeya. Man ali ni i kind Abija ku Yeroboam.

³Man Abija thero lwiny ku njuru asikari mi dhanu mir ali ma jurukara, en e dhanu ma jugoyo wigi rubanga dak ang’wen: man Yeroboam githero lwiny i kume ku dhanu ma jugoyo wigi rubanga dak abora ma gi dhanu ma tek ma jurukara de.

⁴Man Abija cungo wi got Zemaraim, ma ni i ng’om gudi pa Efraim, man ewacu kumae, Koiwinja, E Yeroboam kud Israel ceke:

⁵E ber ungo nia wung’ei nia Yehova, Mungu mir Israel, mio ker wi Israel ni Daudi mi nja, en e ire man ni wote ku lembariba mi kadu?

⁶Ento Yeroboam ma wod Nebat, ma jatic pa Suleman ma wod Daudi, uwodhre, man ejai ni rwoth pare.

⁷Man jucoko dhanu ma kitgi mbe i bang’e, dhanu ma rac, ma gitegri gigi kum Rehoboam ma wod Suleman kinde ma Rehoboam ubedo aradu man cwinye tek ungo, man ecopo cere ngo igi.

⁸Man kawono iwu pido nia wujai ni ker pa Yehova i cing’ wot Daudi; e wun udul ma dit, man nyithi dhiang’ mi mola ma kwar ni kudu ma Yeroboam utimo iwu ni mungu.

⁹Wun wuriemo julam pa Yehova woko ngo, ma wot Haran, ku Julawi, man wutimo julam iwu calu kura kodhidhanu m’i ng’om mange? ketho nia ng’atu ma tek ubino kara ethiere gire ku thwon dhiang’ m’aradu ku nyogi rombe abiro ng’atuno copo bedo jalam mi gin ma gi mungu ngo.

¹⁰Ento wan, Yehova en e Mungu mwa, man waweke ngo; e wabedo ku julam m’ubetimo ni Yehova, ma wot Harun, man Julawi i tic migi:

¹¹man giwang’u lam m’awang’a kud udok ma ng’wice ng’ar ni Yehova ku ba kugweno man ku bang’ uthieno: kwen m’anyutha bende giketho kakare wi mesa ma leng’; man thethala mi mola ma kwar ku thalane de, kara uliel ku bang’ uthieno ceke: kum waworo lembang’ola pa Yehova Mungu mwa; ento wun wuweke.

¹²Man, nen, Mungu ni kudwa i wiwa, man julam pare kud agwara mir atwong’a kara uywak mir atwong’a i kumwu. E nyithindho mir Israel, kud wukied kum Yehova, Mungu pa kwaruwu; kum lembe mu bibedo miero ngo.

¹³Ento Yeroboam uketho adhi bino i ng’eigi: kum kumeno gini i wang’ Yuda, man adhi ni i ng’eigi.

¹⁴E kinde ma Yuda neno yor i ng’eigi, nen, lwiny ni i wang’gi man i ng’eigi; man giywak ba Yehova e julam gikudho agwara.

¹⁵E dhanu mi Yuda gilund gikok: e ka dhanu mi Yuda gikok, etimbre, nia Mungu goyo Yeroboam kud Israel ceke i wang’ Abija ku Yuda.

¹⁶E nyithindho mir Israel giringo i wang’ Yuda; man Mungu miogi i cing’gi.

¹⁷E Abija ku dhanu pare ginegogi ku nek ma dit: kum kumeno dhanu mir Israel ma jugoyo wigi rubanga dak abic gipodho piny ma junego.

¹⁸Juvoyo nyithindho mir Israel i nindo maeca kumeni, man nyithindho mi Yuda gisagu, kum gigeno Yehova, Mungu pa kwaru migi.

¹⁹Man Abija lubo tok Yeroboam, man emaku adhura kud i bang’e, en e Beth-el, ku pacune de, man Yecana ku pacune de, man Efron ku pacune de.

²⁰Kadi Yeroboam de nwang’u tego kendo ngo i ceng’ pa Abija: e Yehova goye, man etho.

²¹Ento Abija doko tek, man egamu ire mon apar wi ang’wen, enyolo wote de pier ario wi ario, nyige ke apar wi abusiel.

²²Man dong’ tic pa Abija, ku yo pare, ku lembayera pare, gigore i lemkei pa jabila ma Ido.