Read Alur 2 Lemkei 16 Bible Online

2 Lemkei 16 - Alur bible

2 Lemkei 16

¹I rundi pier adek wi abusiende mi camuker pa Asa, Baca m’ubimo mir Israel uidho malu kum Yuda, man egomo Rama, kara kud eyi ng’atu moko wok woko kadi umond ba Asa m’ubimo mi Yuda.

²Asa lund uwodho mola ma tar ku mola ma kwar woko kud i kind piny m’akana mi ot pa Yehova man mi ot p’ubimo, man eore ba Ben-hadad m’ubimo mi Cami, m’ubedo i Dameski, ewacu kumae,

³Lembariba ni i kindwa wakudi, calu ebedo i kind vwa giku wuru: nen, aoro mola ma tar ku mola ma kwar iri; cidhi, tur lembariba peri ma wuku Baca m’ubimo mir Israel, kara eai kud i kuma.

⁴Man Ben-hadad uwinjo dwand ubimo ma Asa, man eoro jego mi njuru asikari pare kum adhura mir Israel; e gigoyo Ijon, man Dan, man Abel-maim, kud adhura mi kakanpiny ceke mi Naftali.

⁵Man etimbre, kinde ma Baca winjo pire, nia eweko gomo Rama, man eweko tic pare jik.

⁶Asa m’ubimo lund ugamu Yuda ceke; man giyeyo kidi mi Rama woko, ku yen de, ma Baca gomo kudo; e egomo Geba ku Mizpa kudo.

⁷Man i nindo maeca Hanani ma jaeulembe ubino ba Asa m’ubimo mi Yuda, man ewacu ire kumae, Kum igeno ubimo mi Cami, man igeno Yehova Mungu peri ngo, ka kumeno udul mir ubimo mi Cami uboth kud i cingi.

⁸Jukuci man Julubi gin udul m’apila ngo, ku magali man weg riuni dit apila? ento, kum igeno Yehova, emiogi i cingi.

⁹Kum wang’ Yehova ringo kun ku kun i ng’om ngung’ ma mba mba, kara enyuthre gire tek ni ju ma adundegi bedo ndhu cu yor i bang’e. I maeni itimo kasegu; kum ugambre kawono ibibedo kud ali.

¹⁰Kwinyo lund unego Asa kum jaeulembene, man ekethe i otkol; kum kwinyo nege i kume kum gin maeni. Man Asa timo dhanu moko rac i nindo nica.

¹¹Man, nen, tic pa Asa, ma kwong’ane ku ma cenne, nen, gigore i kitabu mir ubimo mi Yuda kud Israel.

¹²Man i rundi pier adek wi abung’wende mi camuker pare tho wok i tiend Asa; tho pare dit apila: ento i tho pare eyenyo Yehova ngo ento ba jukeikum.

¹³Man Asa nindo ku kwaru pare, man etho i rundi pier ang’wen wi acende mi camuker pare.

¹⁴Man giyike i odliel pare gire, m’eroko ire gire i adhura pa Daudi, e gipiele wi kavuto ma jupong’o ku ng’wic gin ma ng’ar man yath ma jwa jwa ma kwonde tung’ tung’ ma jubodho yiko: e gitimo wang’u ma dit apila ire.