Read Alur 2 Lemkei 18 Bible Online

2 Lemkei 18 - Alur bible

2 Lemkei 18

¹Nie Yehocafat ubedo ku lonyo ku yung dit hai; man giribri gikud Ahab.

²Man yo ng’ei rundi moko eloro piny bang’ Ahab i Samaria. Man Ahab unego rombe ku koni dhiang’ ire dit apila, man ni dhanu ma gini kude, man ebidhe kara giidh malu gikude ba Ramoth-gilead.

³Man Ahab m’ubimo mir Israel uwacu ni Yehocafat m’ubimo mi Yuda kumae, Wabicidho wakudi i Ramoth-gileadi? E eloko lembe ire kumae, Abedo calu in, man dhanu para calu dhanu peri; e wabibedo wakudi i ali.

⁴Man Yehocafat uwacu ni ubimo mir Israel kumae, Akwei, ilar ipenj lembe ba Yehova.

⁵E ubimo mir Israel ulund ucoko jubila karacelo, dhanu dak ang’wen, man ewacu igi kumae, Wabicidho Ramoth-gilead ba lwiny, kadi abidong’i? Man giwacu kumae, Idh malu; kum Mungu bimie i cing ubimo.

⁶Ento Yehocafat uwacu kumae, Jabila mange pa Yehova mbekeni, ma wapenj lembe i bang’e?

⁷Man ubimo mir Israel uwacu ni Yehocafat kumae, Fodi ng’atu acel nuti ma wacopo penjo Yehova ni kume: ento adage; kum fodi eewo lembe ber pira ngo, ento ma rac kwa: en e Mikaya ma wod Imla. Man Yehocafat uwacu kumae, Ubimo kud uwac kumeno.

⁸Ubimo mir Israel ulund ulwong’o jego, man ewacu kumae, Kei Mikaya ma wod Imla pio.

⁹Nie ubimo mir Israel man Yehocafat m’ubimo mi Yuda gibedo wi komker migi man wi pare man wi pare, aronya ku kendi migi mi ker, man gibedo i ka ma thwolo mi kamonao mi dhugang’ mi Samaria; man jubila ceke gibeewo i wang’gi.

¹⁰Man Zedekia ma wod Kenana timo ire tung mi nyunyu man ewacu kumae, Yehova wacu kumae, Ku maeni ibicwalu Jucami, cil ma githum ko.

¹¹Man jubila ceke giewo kumeca, giwacu kumae, Idh malu ba Ramoth-gilead, man lembe peri bed miero; kum Yehova bimie i cing ubimo.

¹²Man jakwenda m’ucidho nilwong’o Mikaya yero ire, ewacu kumae, Nen, lembe mi jubila uyere ber ni ubimo ku dhok acel: ka kumeno wek lembe peri, akwei, ubed calu pa ng’atu acel m’i kindgi, man iyer ber.

¹³Man Mikaya wacu kumae, Calu Yehova bedo kwo, gin ma Mungu para wacu, abiyero maeca.

¹⁴E kinde m’ebino bang’ ubimo, ubimo wacu ire kumae, Mikaya, wabicidho Ramoth-gilead ba lwiny, kadi wabidong’i? Man ewacu kumae, Wuidhi, man lembe bed miero; e jubimiogi i cingwu.

¹⁵Man ubimo wacu ire kumae, Abikwong’i wang’ adi nia kud iyer ira gin moko ndhu lemandha ku nying’ Yehova?

¹⁶Man ewacu kumae, Aneno Israel ceke kethre wi gudi calu rombe ma jakwacgi mbe: e Yehova wacu kumae, Maeni jadit migi mbe; wek gidok ku ba dhanu ceke ng’atuman ba ot pare ku kwiocwiny.

¹⁷Man ubimo mir Israel uwacu ni Yehocafat kumae, Ayero iri ngo nia ebiewo lembe ma ber ungo pira, ento raci?

¹⁸E Mikaya wacu kumae, Ka kumeno wuwinj lembe pa Yehova: Aneno Yehova bedo malu wi komker pare, man udul m’i polo ceke cungo yo ku cinge ma yor acwic man ma yor acam.

¹⁹Man Yehova wacu kumae, Ng’a ma bibidho Ahab m’ubimo mir Israel, kara eidh malu epodh de i Ramoth-gileadi? man ng’atu acel uyero ewacu calu kumae, mange ke wacu calu kumae.

²⁰Man tipo moko wok woko, man ecungo i wang’ Yehova, e ewacu kumae, Abibidhe. Man Yehova wacu ire kumae, Kud ang’o?

²¹Man ewacu kumae, Abiwok woko, man abibedo tipo mi ndra i dhu jubila pare ceke. Man ewacu kumae, Ibibidhe, man ibisagu bende: cidhi, man itim kumeno.

²²Ka kumeno kawono, nen, Yehova ketho tipo mi ndra i dhu jubila peri maeni; man Yehova yero lembe ma rac piri.

²³Zedekia ma wod Kenana lund ucoro ceng’ni, man epadu Mikaya i limbe, man ewacu kumae, Tipo pa Yehova cidho yo kani m’eai ko i bang’a kara ewec i beng’i?

²⁴Man Mikaya wacu kumae, Nen, ibineno i ceng’ maeca, kinde m’ibimondo i kusika ma yor i ie kara ipondi.

²⁵E ubimo mir Israel uwacu kumae, Wumak Mikaya, man wutere cen bang’ Amon ma jabim mir adhura, man ba Yoac ma wod ubimo:

²⁶man wuwac kumae, Ubimo wacu kumae, Wuketh jal maeni i otkol, man wumi ire kwen mi masendi ku pi mi masendi, cil m’adwogo ko ku kwiocwiny.

²⁷Man Mikaya wacu kumae, Tek idwogo ku kwiocwiny ca, nwang’u Yehova yero kuda ngo. Man ewacu kumae, Wuwinji, wu kodhidhanu, wun ceke.

²⁸Kum kumeno ubimo mir Israel ku Yehocafat m’ubimo mi Yuda giidho malu ba Ramoth-gilead.

²⁹E ubimo mir Israel uwacu ni Yehocafat kumae, Abipala gira, man abicidho i lwiny; ento irony kendi mi ker peri. Kum kumeno ubimo mir Israel upale gire; man gicidho i lwiny.

³⁰Nwang’u ubimo mi Cami ung’olo ni jego mi magali pare, ewacu kumae, Kud wukied ku dhanu ma thindho kadi ma dongo, ndhu kud ubimo mir Israel kende.

³¹Man etimbre, kinde ma jego mi magali neno Yehocafat, nia giwacu kumae, En e ubimo mir Israel. Ka kumeno gilokri kara gikied i kume: ento Yehocafat ukok, man Yehova konye; e Mungu ketho giai kud i kume.

³²Man etimbre, kinde ma jego mi magali neno nia en e ubimo mir Israel ungo, nia gilokri cen kum lubo ng’eye.

³³E ng’atu moko dwanyu atum pare swa, man ekilo ubimo mir Israel kud i kind jamtho: kum kumeno ewacu ni jalek magali kumae, Lok cingi, man itera woko kud i udul; kum jukila ku lero ma dit.

³⁴Man lwiny ucikudhetho i ceng’ maeca: ento ubimo mir Israel ujengre gire malu i magali kum Jucami cil uthieno; man ceng’ni i mwony mi ceng’ etho.