Read Alur 2 Lemkei 19 Bible Online

2 Lemkei 19 - Alur bible

2 Lemkei 19

¹Man Yehocafat m’ubimo mi Yuda udok ba ot pare i Yerusalem ku kwiocwiny.

²Man Yehu ma wod Hanani ma jaeulembe wok woko kara eromb kude, man ewacu ni ubimo ma Yehocafat kumae, Emaku piny nia ikony judubo, man imar ju m’udagu Yehova? kum gin maeni kwinyo m’uai i wang’ Yehova ni i wii.

³Ento junwang’u gin ma ber i ii, kum ikabu mungu m’araga woko kud i ng’om man iketho adundeni kara iyeny Mungu.

⁴Man Yehocafat ubedo i Yerusalem: man ecidho woko kendo i kind dhanu ugambre Ber-ceba cil kum ng’om gudi pa Efraim, man edwokogi kendo ba Yehova, Mungu pa kwaru migi.

⁵Man eketho jupoklembe i ng’om mba mba i adhura ceke ma tek mi Yuda, adhura kud adhura,

⁶man ewacu ni jupoklembene kumae, Wupar pi gin ma wutimo: kum wupoko lembe pi dhanu ngo, ento pi Yehova; man eni kudu i pokolembene.

⁷Ka kumeno kawono wek lworo pa Yehova bed i wiwu; wuketh cwinywu i kume man wutime: kum dubo mbe ku Yehova Mungu mwa, kadi dhanu de bedo tung’ tung’ ungo i wang’e, kadi gamu jamblembe de.

⁸Mange ke Yehocafat uketho Julawi man julam, ku kind wi udi pa wego mir Israel, pi lembapoka pa Yehova, man pi titi. Man gidok i Yerusalem.

⁹Man eng’olo igi, ewacu kumae, Wubitimo kumeno i lworo pa Yehova, mandha, man kud adunde ma cu.

¹⁰Man kinde ma tek lembe moko biwok i beng’i ku bang’ umegwu m’ubedo i adhura migi, i kind rimo ku rimo, i kind cik ku lembang’ola, cik man lembapoka, wubitwong’ogi, kara dubo kud ubed i wigi yo ba Yehova, man uketh kwinyo wok i wiwu man wi umegwu: wutim maeni, man lembe bibedo umbe i wiwu.

¹¹Man, nen, Amaria ma jalam ma dit ni i wiwu i lembe ceke pa Yehova; man Zebadia ma wod Icmael, ma jabim mi ot pa Yuda, i lembe ceke p’ubimo: Julawi bende bibedo jego i weng’wu. Wutim ku tegocwiny, man Yehova bed ku weg bero.