Read Alur 2 Lemkei 2 Bible Online

2 Lemkei 2 - Alur bible

2 Lemkei 2

¹Nie Suleman ukeco ya egom ot pi nying’ Yehova, man ot mi ker pare.

²Man Suleman ukwanu dhanu rubanga pier abiro uyei ter, man dhanu rubanga pier abora ma gi jupaipiny i kind gudi, man dhanu rubanga adek ku dak abusiel kara ubed i wigi.

³E Suleman uoro kwenda ba Huram m’ubimo mi Turo, ewacu kumae, Calu itimo ni Daudi ma vwa, man ioro musonge i bang’e kara ugom ire ot m’ebed i ie, itim kumeca i bang’a bende.

⁴Nen, ani ceng’ni gomo ot pi nying’ Yehova Mungu para, kara athiere ire, man awang’ udok ma ng’wice ng’ar ma lim lim i wang’e, man mi kwen m’anyutha ma thiri thiri, man mi lam m’awang’a ma kugweno kud uthieno, i ceng’ sabatu, man i dwi ma por, man i agba ma juketho pa Yehova Mungu mwa. Maeni en e lembapoka mi nja ni Israel.

⁵Man ot m’agomo e dit; kum Mungu mwa e dit ma sagu mungu ceke.

⁶Ento ng’a ma copo gomo ire ot, kum polo man polo mi polo copo rome ngo? e ka an ke a ng’a, ma nia agom ire ot, ndhu kara awang’ udok ma ng’wice ng’ar i wang’e?

⁷Ka kumeno kawono or ira ng’atu ma jabodho mi timo ku mola ma kwar, man ku mola ma tar, man ku mola, man ku nyunyu, man ku gin m’uluga, man ku gin ma kwar ngbo, man ku gin m’ulweku, man m’ung’eyo ng’iko girang’ika ma kwonde tung’ tung’, kara ubed karacelo ku jubodho ma gini kuda i Yuda man i Yerusalem, ma Daudi ma vwa ketho.

⁸Or ira yendmusonge, ku yendsipre, man yendbongu, kud i Lebanon; kum ang’eyo nia jutic peri ging’eyo maram jung’olo ko yen i Lebanon. Man, nen, jutic para bibedo karacelo ku jutic peri,

⁹en e kara giyik ira yen dupa; kum ot m’ani ceng’ni gomo bibedo dit man ma wang’uijo.

¹⁰Man, nen, abimio nganu m’afoda mukero rubanga pier ario ni jutic peri ma gi jupaiyen, man nganu ma tung’ de mukero rubanga pier ario, man ajiku mi pigulok rubanga pier ario, man ajiku mo rubanga pier ario.

¹¹Huram m’ubimo mi Turo lund uloko lembe i lembagora, m’eoro ni Suleman kumae, Kum Yehova maru dhanu pare, ekethi ni ubimo i wigi.

¹²Huram uwacu kendo kumae, Mugisa bed ni Yehova, Mungu mir Israel, m’ucwio polo ku ng’om, m’emio nyathin ma nico ma riek ni Daudi m’ubimo, m’e riu man won ng’eyong’ec, ma bigomo ot ni Yehova, man ot mi ker pare.

¹³Man kawono aoro ng’atu ma jabodho, ma en e won ng’eyong’ec, pa Huram ma vwa,

¹⁴ma wod dhaku mi nyig Dan; man won mire dhanu mi Turo, ma jabodho mi timo ku mola ma kwar, man ku mola ma tar, ku mola, ku nyunyu, ku kidi, man ku yen, ku gin m’uluga, ku gin m’ulweku, man ku bongu ma nwang’ ma ber, man ku gin ma kwar ngbo, mi ng’iko girang’ika ma kwonde tung’ tung’ bende, man mi poro piny mi rieko; kara juketh kaka ire karacelo ku dhanu peri ma jubodho, man karacelo ku dhanu ma jubodho ma pa rwoth para ma Daudi ma wuru.

¹⁵Nie ka kumeno nganu ku nganu ma tung’, ku mo man pigulok, ma rwoth para yero pire, wek eor ni jutic pare:

¹⁶man wabitong’o yen kud i Lebanon, calu ma cande binegi; e wabikele i beng’i i Yopa ku wi yen m’ariba ma wotho ku wi pi; man ibitere malu i Yerusalem.

¹⁷Man Suleman ukwanu umondo ceke ma gini i ng’om Israel, calku kwan ma Daudi ma won ukwanu kogi; man junwang’u gitundo rubanga dak acel ku pier abic man rubanga adek ku dak abusiel.

¹⁸Man eketho kindgi rubanga pier abiro uyei ter, man rubanga pier abora ma gi jupaipiny i kind gudi, man juwigi rubanga adek ku dak abusiel kara uketh dhanu i tic.