Read Alur 2 Lemkei 20 Bible Online

2 Lemkei 20 - Alur bible

2 Lemkei 20

¹Man etimbre yo ng’ei maeni, nia nyithindho mi Moab, man nyithindho mir Amon, man karacelo kugi Juamoni moko, gibino kum Yehocafat ba lwiny.

²Jumoko gilund gibino giyero ni Yehocafat, giwacu kumae, Udul ma dit ubino i kumi m’uai i Cami ma loka nam; man, nen, gini i Hazazon-tamar (ma en e En-gedi).

³E lworo maku Yehocafat, man ekethre gire kum yenyo Yehova; man eng’olo ya juwek cam i Yuda ceke mba mba.

⁴E Yuda cokri gigi karacelo, kara giyeny kony ba Yehova: gibino niyenyo Yehova kud i adhura ceke mi Yuda.

⁵Man Yehocafat ucungo i cokri mi Yuda ku Yerusalem i ot pa Yehova, i wang’ lelagang’ ma nyen;

⁶man ewacu kumae, E Yehova, Mungu pa kwaruwa, in i Mungu m’i polo ngo? man in i jabim wi ker ceke mi thek ungo? man tego ku tek de ni i cingi, ketho nia ng’atu moko mbe ma copo goyo kore i weng’i.

⁷E Mungu mwa, iriemo ju m’ubedo i ng’om maeni ngo i wang’ dhanu peri ma Israel, man imie ni kodhi Ibrahim ma jarimbi mi nja?

⁸E gibedo i ie, man gigomo iri kamaleng’ i ie pi nyingi, giwacu kumae,

⁹Tek lem ma rac ubino i wiwa, palamularu, kadi lembapoka, kadi thong’om, kadi ndru, wabicungo i wang’ot maeni, man i weng’i (kum nyingi ni i ot maeni), man wabiywak i beng’i i can mwa, man ibiwinjo ibibodho de.

¹⁰Man kawono, nen, nyithindho mir Amon ku Moab man got Seir, m’iyio ngo nia Israel gimond i ie, kinde ma giai kud i ng’om Misiri, ento gilokri cen i kindgi, man ginyotho gi ngo;

¹¹nen, maram giculo ko iwa, nia gibin gibaiwa woko kud i aba peri, m’imio iwa ya wabed kudo.

¹²E Mungu mwa, ibipoko lembe igi ngo? kum tego mwa mbe ni udul maeni m’ubino i kumwa; kadok gin ma watim de wang’eyo ngo: ento wang’wa ni yor i beng’i.

¹³E Yuda ceke cungo i wang’ Yehova, ku nyithindho migi ma thindho, ku mon migi, man nyithindhgi.

¹⁴Tipo pa Yehova lund ubino wi Yahaziel ma wod Zekaria, ma wod Benaya, ma wod Yeiel, ma wod Matania, ma Jalawi, mi wot Asaf, i die cokri;

¹⁵man ewacu kumae, Wuwinji, Yuda ceke, man wu ju m’ubedo i Yerusalem, man in i ubimo ma Yehocafat: Yehova wacu iwu kumae, Lworo kud unegwu, kadok cwinywu de kud ung’abre kum udul maeni ma dit; kum lwiny en e mu ngo, ento pa Mungu.

¹⁶Urwo wulor piny i kumgi: nen, giidho malu kud i kaidho pa Ziz; e wubinwang’ugi i kajik mi poga, i wang’ langa pa Yeruel.

¹⁷Can kiedo i lwiny maeni binegowu ngo: wuther giwu, wucung ling’, man wunen both pa Yehova ma ni kudwu, E Yuda ku Yerusalem; lworo kud unegwu: kadi cwinywu de kud ung’abre: urwo wucidh i kumgi; kum Yehova ni kudwu.

¹⁸Man Yehocafat ukulo wang’e i ng’om; man Yuda ceke ku ju m’ubedo i Yerusalem gipodho piny i wang’ Yehova, ma giberwo ni Yehova.

¹⁹Man Julawi, mi nyithindho mi Jukohathi, man mi nyithindho mi Jukorahi, gicungo kara gipak Yehova, Mungu mir Israel, ku dwal ma tek apila.

²⁰E giai pir kugweno, man gicidho woko i langa mi Tekoa: e kinde ma gicidho woko, Yehocafat ucungo man ewacu kumae, Koiwinja, E Yuda, man wu ju m’ubedo i Yerusalem: wuyi Yehova Mungu mu, e wubicungo; wuyi jubila pare, e lembe mu bibedo miero.

²¹Man kinde m’egamu porolembe ku dhanu, eketho ju ma gibiwer ni Yehova, man ma bimio pak i bero mi leng’, ka gicidho woko i wang’ njuru asikari, man gibiwacu kumae, Wumi foc ni Yehova; kum mer mi bero pare bedo mi nja.

²²Man kinde ma gimaku wero wer ku paku pak, Yehova ketho weg adhi kum nyithindho mir Arnon, ku Moab, man got Seir, ma gibino kum Yuda; e jugoyogi.

²³Kum nyithindho mir Arnon ku Moab gicungo kum ju m’ubedo wi got Seir, kara gineg ginyothgi kot: man kinde ma gidaru nyotho ju m’ubedo wi Seir, ginyothri ku ba dhanu ku ba dhanu ng’atuman ku wadi.

²⁴Man kinde ma Yuda bino ba odkur mi langa, gineno wi udul; man, nen, gin avu m’upodho i ng’om, man moko mbe m’uboth.

²⁵Man kinde ma Yehocafat ku dhanu pare gibino kara gigam ayeki migi, ginwang’u lonyo ku kendi dit hai i kindgi, man jambruko ma pire tek, ma giwodho woko igi gigi, ma sagu ma gicopo yeyo: e gibedo ceng’ adek kum yaku ayeki, kum e dit hai.

²⁶Man i ceng’ mir ang’wende gicokri gigi i poga mi Beraka; kum gimio mugisa ni Yehova keca: ka kumeno julwong’o nying’ ka maeno Poga mi Beraka cil i ceng’ ma tin.

²⁷Gilund gidwogo, ku ba dhanu ceke mi Yuda ku Yerusalem, man Yehocafat i wang’gi, kara gidok kendo i Yerusalem ku mutoro; kum Yehova ketho anyong’a negogi kum judegi migi.

²⁸E gibino Yerusalem ku nanga man adungu kud agwara ba ot pa Yehova.

²⁹Man lworo pa Yehova ni wi ker ceke m’i ng’om, kinde ma giwinjo nia Yehova kiedo kum judegi mir Israel.

³⁰Kum kumeno ng’om pa Yehocafat ukwio; kum Mungu pare mio ire yom kun ku kun.

³¹Man Yehocafat ucamu ker wi Yuda: rundi pare pier adek wi abic kinde m’emaku camu ker; man ecamu ker rundi pier ario wi abic i Yerusalem: man nying’ min mire Azuba ma nya Cilhi.

³²Man ewotho i yo pa Asa ma won elokre cen de ngo kud i ie, m’etimo ko gin m’atira i wang’ Yehova.

³³Ento ka ma malu jukabu woko ngo: kadok dhanu de fodi giketho adundegi ngo kum Mungu pa kwaru migi.

³⁴Nie dong’ tic pa Yehocafat, ma kwong’ane ku ma cenne de, nen, gigore i lemkei pa Yehu ma wod Hanani, ma juketho i kitabu mir ubimo mir Israel.

³⁵Man yo ng’ei maeni Yehocafat m’ubimo mi Yuda ribre gire kud Ahazia m’ubimo mir Israel; m’udubo dit hai:

³⁶e eribre gire gikude kara gitim combo ucidh i Tarcic; man gitimo combone i Ezion-geber.

³⁷Eliezer ma wod Dodavahu ma Mareca lund uewo lembe kum Yehocafat, ewacu kumae, Kum iribri giri kud Ahazia, Yehova nyotho tic peri. E combo tur, ketho nia gicopo cidho Tarcic ungo.