Read Alur 2 Lemkei 21 Bible Online

2 Lemkei 21 - Alur bible

2 Lemkei 21

¹Man Yehocafat unindo ku kwaru pare, e juyike ku kwaru pare i adhura pa Daudi: man Yehoram ma wode camu ker kakare.

²Man utumin nuti, ma wot Yehocafat: gi eni, Azaria, man Yehiel, man Zekaria, man Azaria, man Mikael, man Cefatia; maeni ceke gi wot Yehocafat m’ubimo mir Israel.

³Man weggi mio igi giramia ma dit, mi mola ma tar, man mi mola ma kwar, man mi gin ma pire tek, karacelo kud adhura ma tek i Yuda: ento ker emio ni Yehoram, kum en e kayu.

⁴Nie kinde ma Yehoram uidho wi ker pa won, man etegre gire, enego utumin mire ceke ku palamularu, man kind judongomawijo mir Israel bende.

⁵Yehoram rundi pare pier adek wi ario kinde m’emaku camu ker; man ecamu ker rundi abora i Yerusalem.

⁶Man ewotho i yo p’ubimo mir Israel, calu juot pa Ahab utimo; kum ebedo ku nyar Ahab ni dhaku: man etimo gin ma rac i wang’ Yehova.

⁷Ento Yehova yenyo enyoth ot pa Daudi ngo, kum lembariba m’etimo ku Daudi, man calu eng’olo ya emi thala ire man ni nyithindhe mi nja.

⁸I nindo pare Edom ujai the cing’ Yuda, man giketho ubimo i wigi gigi.

⁹Yehoram ulund ukadhu lokaca ku jego pare, man magali pare ceke karacelo kude: man eai malu ku diewor, e egoyo Juedomi m’utieke gbur, ku jego mi magali.

¹⁰Kum kumeno Edom ujai ku the cing’ Yuda cil i ceng’ ma tin: Libna ulund ujai i nindo nica kud i the cinge, kum eweko Yehova, ma Mungu pa kwaru pare.

¹¹Mange ke etimo ka ma malu wi gudi mi Yuda, man eketho ju m’ubedo i Yerusalem gitim tarwang’, e ecung’o Yuda utim kumeca.

¹²E waraga wok i bang’e m’uai bang’ Elia ma jabila, m’uwacu kumae, Yehova, Mungu pa Daudi ma kwaru peri wacu kumae, Kum iwotho i yo pa Yehocafat ma wuru ngo, kadi i yo pa Asa m’ubimo mi Yuda de ngo,

¹³ento iwotho i yo mir ubimo mir Israel, man iketho Yuda ku ju m’ubedo i Yerusalem utim tarwang’, calu ot pa Ahab utimo, man inego utumeru mi ot pa wuru bende, ma gi ber ma sagu in giri:

¹⁴nen, Yehova bigoyo dhanu peri ku thong’om ma dit, man nyithindho peri, ku mon peri, ku piny peri ceke;

¹⁵man ibibedo ku tho ma dit ku tho mi cindii, cil ma cindii biole woko ni kum thoje, ceng’ ku ceng’.

¹⁶Man Yehova ting’o cwiny Jufilisti i kum Yehoram, man mi Juarabi ma gini i ng’et Jukuci:

¹⁷e giidho malu kum Yuda, man giyecri gimondo i ie, e giyaku piny ceke ma junwang’u i ot p’ubimo, ku wote bende, man mon pare; kum kumeno wote moko mbe m’udong’ ire, ndhu Yehoahaz, ma cogo pare.

¹⁸E yo ng’ei maeni ceke Yehova goye i cindie ku tho ma kei ungo.

¹⁹Man etimbre, ka nindo kadhu, nwang’u rundi ario thum, nia cindie oie woko ni kum tho pare, man etho ku tho ma rac. E dhanu pare timo wang’u ire ngo, calu wang’u pa kwaru pare.

²⁰Rundi pare pier adek wi ario kinde m’emaku camu ker, man ecamu ker i Yerusalem rundi abora: man eai ma juparu pire ngo; e juyike i adhura pa Daudi, ento i odliel p’ubimo ngo.