Read Alur 2 Lemkei 22 Bible Online

2 Lemkei 22 - Alur bible

2 Lemkei 22

¹Man ju m’ubedo i Yerusalem giketho Ahazia ma wode ma cogo ni ubimo kakare; kum udul dhanu m’ubino giku Juarabi ba kagonjo ginego ju ma judongo ceke. Kum kumeno Ahazia ma wod Yehoram m’ubimo mi Yuda camu ker.

²Ahazia rundi pare pier ario wi ario kinde m’emaku camu ker; man ecamu ker rundi acel i Yerusalem: man nying’ min mire Athalia ma nyar Omri.

³En bende ewotho i yo mi juot pa Ahab; kum min mire en e japorlembe pare mi timo rac.

⁴E etimo gin ma rac i wang’ Yehova, calu juot pa Ahab utimo; kum gin gi juporlembe pare yo ng’ei tho pa won, ni nyoth pare.

⁵Ewotho bende calu lembapora migi, man gicidho giku Yehoram ma wod Ahab m’ubimo mir Israel kara gikied ku Hazael m’ubimo mi Cami i Ramoth-gilead: man Jucami tong’o lero kum Yoram.

⁶Man edwogo kara kume kei i Yezrel mi rem ma giketho i kume i Rama, kinde m’ekiedo ku Hazael m’ubimo mi Cami. Man Ahazia ma wod Yehoram m’ubimo mi Yuda loro piny kara enen Yehoram ma wod Ahab i Yezrel, kum kume lith.

⁷Nwang’u nyoth pa Ahazia ai ba Mungu, kum ecidho ba Yoram: kum kinde m’ebino, ewok woko giku Yehoram kum Yehu ma wod Nimci, ma Yehova wiro kara ekab juot pa Ahab.

⁸Man etimbre, kinde ma Yehu betimo pokolembe wi ot pa Ahab, nia enwang’u judongomawijo mi Yuda man wot utumin Ahazia, m’ubetimo ni Ahazia, e enegogi.

⁹Man eyenyo Ahazia, e gimake (nwang’u epondo i Samaria), man gikele ba Yehu, e ginege: man giyike, kum giwacu kumae, En e wod Yehocafat, m’uyenyo Yehova kud adundene ceke. Man ot pa Ahazia tego moko mbe ma giceri ko wi ker.

¹⁰Nie kinde ma Athalia ma min Ahazia neno nia wode tho, eai man enyotho kodhi mi ker ceke mi ot pa Yuda.

¹¹Ento Yehocabeath, ma nyar ubimo, emaku Yoac ma wod Ahazia, man ekwale ku kind wot ubimo ma junego, man ekethe giku japidi pare i kusika mi kavuto. Kum kumeno Yehocabeath, ma nyar ubimo ma Yehoram, ma dhaku pa Yehoiada ma jalam (kum en e nyamin Ahazia), ekane ni Athalia, kara kud enege.

¹²Man ebedo kugi aponda i ot pa Mungu rundi abusiel: e Athalia camu ker wi ng’om.