Read Alur 2 Lemkei 23 Bible Online

2 Lemkei 23 - Alur bible

2 Lemkei 23

¹Man i rundi mir abirone Yehoiada tegre gire, man egamu jego mi dak, ma gin Azaria ma wod Yeroham, man Icmael ma wod Yehohanan, man Azaria ma wod Obed, man Maseya ma wod Adaya, man Elicafat ma wod Zikri, i lembariba karacelo kude.

²Man gicidho i kind Yuda, e gicoko Julawi kud i adhura ceke mi Yuda, man wi udi pa wego mir Israel, e gibino Yerusalem.

³Man cokri ceke gitimo lembariba kud ubimo i ot pa Mungu. Man ewacu igi kumae, Nen, wod ubimo bicamu ker, calu Yehova yero pi wot Daudi.

⁴Maeni en e gin ma wubitimo: ng’etwu mir adege, m’umondo i ceng’ sabatu, mi julam man mi Julawi, bibedo jukur mi kamondo;

⁵man ng’etwu mir adege bibedo ba ot p’ubimo; man ng’etwu mir adege bibedo dhugang’ mi there: man dhanu ceke bibedo i lelagang’ mi ot pa Yehova.

⁶Ento kud wuyi ng’atu moko mond i ot pa Yehova, ndhu julam, man ju ma timo tim mi Julawi; gibimondo, kum gi leng’: ento dhanu ceke bikuro kur pa Yehova.

⁷Man Julawi bitieko ubimo gbur, ku ba dhanu ceke ng’atuman ku jambali pare i cinge; man ng’atu ma tek umondo i ot, wek junege: man wubed karacelo kud ubimo kinde m’emondo, man kinde m’ewok woko.

⁸Kum kumeno Julawi ku Yuda ceke gitimo calku gin ceke ma Yehoiada ma jalam ung’olo: man ku ba dhanu ceke ng’atuman ugamu dhanu pare, ju maeno ma gibimondo i ceng’ sabatu, giku ju ma gibicidho woko i ceng’ sabatu; kum Yehoiada ma jalam ulalu tic mi kamijo ngo.

⁹Man Yehoiada ma jalam umio tong’, ku thungu, man ban, ma naka p’ubimo ma Daudi, ma ni i ot pa Mungu ba jego mi dak.

¹⁰Man eketho dhanu ceke, ku ba dhanu ceke ng’atuman ku jambali i cinge, ugambre ng’et ot ma yor acwic cil kum ng’et ot ma yor acam, yo ba pemblam ku ot, ng’et ubimo gbur.

¹¹Gilund giwodho wod ubimo woko, man giketho jamkermiwic i wie, e gimio ire lembatuca, man gikethe ni ubimo: Yehoiada ku wote de giwire; man giwacu kumae, Ubimo bed kwo hai.

¹²Man kinde ma Athalia winjo woi mi dhanu m’uberingo m’ubepaku ubimo de, ebino ba dhanu i ot pa Yehova:

¹³e eneno, man, nen, ubimo cungo ba mbegi pare i kamondo, man jego kud agwara ni bang’ ubimone, man dhanu ceke m’i ng’om anyong’a negogi, e gikudho agwara; juwer bende gigoyo jambwer mi badwal, man gitelo wi wer mi pak. Athalia lund uyeco kendi pare, man ewacu kumae, Lembapora ma rac! lembapora ma rac!

¹⁴Man Yehoiada ma jalam uwodho jego mi dak woko ma juketho wi udul, man ewacu igi kumae, Wukabe woko i kind jukur; man ng’atu ma tek ulubo toke, wek junege ku palamularu: kum jalam uwacu kumae, Ku junege i ot pa Yehova.

¹⁵Kum kumeno ging’enyo yo ire; man ecidho ba kamondo mi dhugang’ mi riuni ba ot p’ubimo: e ginege keca.

¹⁶Man Yehoiada timo lembariba i kindgi en, ku dhanu ceke, man ubimo, nia gibed dhanu pa Yehova.

¹⁷Man dhanu ceke gicidho ba ot pa Bal, man girwombe piny, e gituro pemblam pare kud ayi gin m’acwia pare nziki nziki, man ginego Matan ma jalam pa Bal i wang’ pemblam.

¹⁸E Yehoiada ketho jego i ot pa Yehova the cing’ julam ma Julawi, ma Daudi poko i ot pa Yehova, kara uthier lam m’awang’a pa Yehova, calu egore i cik pa Musa, kud anyong’a man ku wer, calku lembang’ola pa Daudi.

¹⁹Man eketho jukur i dhugang’ mi ot pa Yehova, kara ng’atu moko m’ucido kum gin moko kud umondi.

²⁰Man egamu jego mi dak, man weg dwong’, ku jubim mi dhanu, man dhanu ceke mi ng’om, e ekelo ubimo kud i ot pa Yehova piny: man gimondo kud i dhugang’ ma malu ba ot p’ubimo, man giketho ubimo wi komker mi ker.

²¹Kum kumeno anyong’a nego dhanu ceke m’i ng’om, e adhura bedo ling’. Man Athalia ginego ku palamularu.