Read Alur 2 Lemkei 24 Bible Online

2 Lemkei 24 - Alur bible

2 Lemkei 24

¹Yoac rundi pare abiro kinde m’emaku camu ker; man ecamu ker rundi pier ang’wen i Yerusalem: man nying’ min mire Zibia, ma Ber-ceba.

²Man Yoac utimo gin m’atira i wang’ Yehova i nindo ceke pa Yehoiada ma jalam.

³Man Yehoiada gamu ire mon ario; e enyolo nyithindho ma co ku nyithindho ma nyir.

⁴Man etimbre yo ng’ei maeni, nia i Yoac upido pi yiko ot pa Yehova.

⁵Man ecoko julam ku Julawi karacelo, man ewacu igi kumae, Wucidh woko bang’ adhura mi Yuda, man wujok sente bang’ Israel ceke mi yiko ot pa Mungu mu ku ba rundi ku ba rundi; man wutim lembene pio. Ento Julawi gitimo pio ngo.

⁶Man ubimo lwong’o Yehoiada ma jadit, man ewacu ire kumae, Nedi ikwero ketho Julawi ukel ajok pa Musa ma jatic pa Yehova, man mi cokri mir Israel, kud i Yuda man kud i Yerusalem, mi hema mi lembatuca?

⁷Kum wot Athalia ma dhaku ma rac, gituro ot pa Mungu; man gin ceke ma juthiero pi ot pa Yehova bende gimio ni Balim.

⁸Kum kumeno ubimo ng’olo, man giguro sanduk, e gikethe woko yo dhugang’ mi ot pa Yehova.

⁹E gitimo lembang’ola ucidh i Yuda ku Yerusalem, y a gikel ajok pi Yehova ma Musa ma jatic pa Mungu ketho wi Israel i langa.

¹⁰Man anyong’a nego judongomawijo ceke ku dhanu ceke, e gikelo, man gibolo i sandukne, maram gidare ko.

¹¹Man ebedo kumeno, nia, kinde ma tek jukelo sandukne ba jego mir ubimo ku cing’ Julawi, e ka gineno nia sente bedo dit, jagorcik p’ubimo ku jego pa jalam ma dit gibino man gikonjo sentene, man giting’o sanduk, e gidwoke kakare kendo. Gitimo kumeca ceng’ ku ceng’, man gicoko sente dit hai.

¹²Man ubimo ku Yehoiada gimie ba wadi ju m’utimo tic mi timotim mi ot pa Yehova; man gigamu jubodho mir ulobo ku jubodho mi bau ku sukulia kara uyik ot pa Yehova, man wadi ju ma timo nyunyu ku mola bende kara uyik ot pa Yehova.

¹³Kum kumeno juticne gitimo, e tic mi yiko becikucidho i cing’gi, man giketho ot pa Mungu cungo calu m’umaku piny, e gidwoke tek.

¹⁴E kinde ma gidare, gikelo dong’ sente i wang’ ubimo ku Yehoiada, ma jutimo kudo agulu mi ot pa Yehova, en e agulu mi timotim man mi thiero, man lupau, kud agulu mi mola ma kwar man mola ma tar. Man githiero lam m’awang’a i ot pa Yehova thiri thiri i nindo ceke pa Yehoiada.

¹⁵Ento Yehoiada ti man epong’ ku ceng’, e etho; rundi pare dak acel ku pier adek kinde m’etho.

¹⁶E giyike i adhura pa Daudi i kind ubimo, kum etimo ber i kind Israel, man yo ba Mungu ku ot pare.

¹⁷Nie yo ng’ei tho pa Yehoiada judongomawijo mi Yuda gibino, man girwo ni ubimo. Ubimone lund uwinjo dwandgi.

¹⁸E giweko ot pa Yehova, ma Mungu pa kwaru migi, man gitimo ni mungu m’araga kud ayi gin m’acwia: e kwinyo bino wi Yuda ku Yerusalem pi dubo migi maeni.

¹⁹Ento eoro jubila i bang’gi, kara ukelgi kendo ba Yehova; man gituco lembe i kumgi: ento gikwero winjo.

²⁰Man Tipo pa Mungu bino wi Zekaria ma wod Yehoiada ma jalam; e ecungo malu wi dhanu, man ewacu igi kumae, Mungu wacu kumae, Nedi wukadhu ku wi lembang’ola pa Yehova, ketho lembe mu copo bedo miero ngo? kum wuweko Yehova, en bende ewekowu.

²¹E giporo lembe i kume, man gicanye ku kidi ni kum lembang’ola p’ubimo i lelagang’ mi ot pa Yehova.

²²Kum kumeno Yoac m’ubimo poi ungo kum bero ma Yehoiada ma won utimo ire, ento enego wode. Man kinde m’etho, ewacu kumae, Yehova nen i wie, man epenje.

²³Man etimbre i kajik mi rundi maeni, nia njuru asikari mi Jucami gibino i kume: e gibino ba Yuda ku Yerusalem man ginyotho judongomawijo ceke mi dhanu kud i kind dhanu, e gioro ayeki migi ceke bang’ ubimo mi Dameski.

²⁴Kum njuru asikari mi Jucami bino kud udul dhanu ma nyanok; man Yehova mio udul ma dit apila i cing’gi, kum giweko Yehova, ma Mungu pa kwaru migi. Kum kumeno gitimo lembapoka wi Yoac.

²⁵Man kinde ma giai i bang’e (kum giweke ma kume lith dit), jutic pare ma dhe giporo lembe i kume kum rimb wot Yehoiada ma jalam, e ginege wi kavuto pare, man etho; e giyike i adhura pa Daudi, ento giyike ngo i odliel mir ubimo.

²⁶E maeni gi ju m’uporo lembe i kume: Zabad ma wod Cimeath ma Nyaramoni, man Yehozabad ma wod Cimrith ma Nyamoabi.

²⁷Nie pi wote, ku dit mi ter ma juketho i wie, ku gomo ot pa Mungu nyen, nen, gigore i lemkei mi kitabu mir ubimo. Man Amazia ma wode camu ker kakare.