Read Alur 2 Lemkei 25 Bible Online

2 Lemkei 25 - Alur bible

2 Lemkei 25

¹Amazia rundi pare pier ario wi abic kinde m’emaku camu ker; man ecamu ker rundi pier ario wi abung’wen i Yerusalem: man nying’ min mire Yehoadan, ma Yerusalem.

²Man etimo gin m’atira i wang’ Yehova, ento kud adunde ma ndhu cu ngo.

³Nie etimbre, kinde ma ker ucungo i kume, nia enego jutic pare m’unego ubimo ma won.

⁴Ento nyithindho migi re enego gi ngo, ento etimo calku lembe m’ugore i cik i kitabu pa Musa, calu Yehova ng’olo, m’ewacu kumae, Wego bitho ngo pi nyithindho, kadok nyithindho de bitho ngo pi wego; ento ku ba dhanu ceke ng’atuman bitho pi dubo pare gire.

⁵Mange ke Amazia coko Yuda karacelo, man ekethogi calku udi pa weggi, the cing’ jego mi rubanga ku jego mi dak, en e Yuda ceke ku Benyamin: man ekwanugi ugambre kum rundi pier ario ku ma sagu, man enwang’ugi dhanu ma jugoyo wigi rubanga dak adek, ma copo cidho woko i ali, ma copo ting’o tong’ ku ban.

⁶Man egamu dhanu ma tek ma jurukara ku i Israel bende rubanga dak acel ku sukulia mi talanto mi mola ma tar dak acel.

⁷Ento dhanu pa Mungu bino i bang’e, m’ewacu kumae, E ubimo, kud iyi njuru asikari mir Israel ucidh kudi; kum Yehova ni kud Israel ungo, the lembene, ku nyithindho pa Efraim ceke.

⁸Ento tek ibicidho, tim ku kero, bed tek mi lwiny: Mungu bibei piny i wang’ jadegi; kum tego pa Mungu nuti mi kony, man mi bayu piny.

⁹Man Amazia wacu ni dhanu pa Mungu kumae, Ento wabitimo ang’o kum talanto dak acel m’amio ni njuru asikari mir Israeli? Man dhanu pa Mungu loko lembe kumae, Yehova copo mio iri ma sagu maeni dit.

¹⁰Amazia lund ukoyogi, thelembene, njuru asikari ma nwang’u bebino i bang’e kud i Efraim, kara gidok thugi kendo: kum kumeno ng’ecwiny migi opo dit kum Yuda, man gidok thugi ku ng’ecwiny mi kwinyo.

¹¹E cwiny Amazia doko tek, man etelo wi dhanu pare, e ecidho i Poga mi Kadu, man egoyo nyithindho mi Seir rubanga apar.

¹²Man rubanga apar mange nyithindho mi Yuda yakugi ma kwo, man gkerogi malu wi cana, e gibologi piny ku wi canane, ketho nia gitur nziki nziki ceke.

¹³Ento dhanu mi njuru asikari ma Amazia ketho gidok, ma nia ku gicidh kugi i lwiny, gipodho wi adhura mi Yuda, ugambre Samaria cil kum Beth-horon, man gigoyogi rubanga adek, e giyaku ayeki dit.

¹⁴Nie etimbre, yo ng’ei ai ma Amazia ai ko ba nek mi Juedomi, nia ekelo mungu mi nyithindho mi Seir, man ekethogi malu gibed mungu pare, man erum gire i wang’gi, ewang’u udok ma ng’wice ng’ar de igi.

¹⁵Kum kumeno ng’ecwiny pa Yehova opo kum Amazia, man eoro jabila i bang’e, m’uwacu ire kumae, Nedi iyenyo tok mungu mi dhanu, m’ubodho dhanu migi ngo kud i cingi?

¹⁶Man etimbre, kinde m’eweco kude, nia ubimo wacu ire kumae, Wakethi kind juporlembe p’ubimo? bed ling’; iyenyo jugoi nedi? Jabilane lund uling’, man ewacu kumae, Ang’eyo nia Mungu keco nia enyothi, kum itimo maeni, man iwinjo lembapora para ngo.

¹⁷Amazia m’ubimo mi Yuda lund ujolo lembapora, man eoro kwenda ba Yoac, ma wod Yehoahaz ma wod Yehu, m’ubimo mir Israel, ewacu kumae, Bin, wek wanendra ku wang’wa.

¹⁸Man Yoac m’ubimo mir Israel uoro kwenda ba Amazia m’ubimo mi Yuda, ewacu kumae, Ucok ma ni i Lebanon uoro kwenda ba musonge ma ni i Lebanon, ewacu kumae, Mi nyeri ni woda ni dhaku: e yedi m’i thim ma ni i Lebanon ukadhu, man enyono ucokne.

¹⁹Iwacu kumae, Nen igoyo Edom; e adundeni ting’i malu ketho iluli: kawono bed thu; nedi iketho ruvwa uwok i kumi, ketho ipodhi, en e in, ku Yuda karacelo kudi?

²⁰Ento Amazia kwero winjo; kum eai ba Mungu, kara emigi i cing’ judegi migi, kum giyenyo tok mungu mir Edom.

²¹Kum kumeno Yoac m’ubimo mir Israel uidho malu; man en ku Amazia m’ubimo mi Yuda ginendri ku wang’gi i Beth-cemec, ma piny pa Yuda.

²²Man jusagu Yuda i wang’ Israel; e giringo ku ba dhanu ceke ng’atuman ba hema pare.

²³Man Yoac m’ubimo mir Israel umaku Amazia m’ubimo mi Yuda, ma wod Yoac ma wod Yehoahaz, i Beth-cemec, man ekele i Yerusalem, man erwombo gang’kidi m’i Yerusalem piny de ugambre i dhugang’ mir Efraim cil kum dhugang’ mi gui, bot dak ang’wen.

²⁴Man eyaku mola ma kwar ceke ku mola ma tar, kud agulu ceke ma junwang’u i ot pa Mungu karacelo kud Obed-edom, man piny m’akana mi ot p’ubimo, ku ju ma mukwatu bende, man edok i Samaria.

²⁵Man Amazia ma wod Yoac m’ubimo mi Yuda ucamu ng’om yo ng’ei tho pa Yoac ma wod Yehoahaz m’ubimo mir Israel rundi apar wi abic.

²⁶Nie dong’ tic pa Amazia, ma kwong’ane ku ma cenne de, nen, gigore ngo i kitabu mir ubimo mi Yuda kud Israel?

²⁷Nie ugambre i nindo ma Amazia ulokre cen ku ba lubo Yehova gitimo lembapora i kume i Yerusalem; man eringo Lakic, ento gioro kwenda i toke i Lakic, e ginege kuca.

²⁸Man gikele ku wi riuni, e giyike karacelo ku kwaru pare i adhura mi Yuda.