Read Alur 2 Lemkei 26 Bible Online

2 Lemkei 26 - Alur bible

2 Lemkei 26

¹E dhanu ceke mi Yuda gigamu Uzia, ma rundi pare apar wi abusiel, man gikethe ni ubimo ka won ma Amazia.

²Egomo Eloth, man edwoke ni Yuda, yo ng’ei vuto p’ubimo ma ku kwaru pare.

³Uzia rundi pare apar wi abusiel kinde m’emaku camu ker; man ecamu ker rundi pier abic wi ario i Yerusalem: man nying’ min mire Yekilia, ma Yerusalem.

⁴Man etimo gin m’atira i wang’ Yehova, calku gin ceke ma won ma Amazia timo.

⁵E ekethre gire ya eyeny Mungu i ceng’ pa Zekaria, m’ebedo ku ng’eyong’ec i ginmawokiwang’ pa Mungu: man i nindo m’eyenyo ie Yehova ceke, Mungu ketho lembe pare bedo miero.

⁶E ewok woko man etimo ali kum Jufilisti, man erwombo gang’kidi mi Gath piny, ku gang’kidi mi Yabne, man gang’kidi mir Acdod; e egomo adhura i ng’om mi Acdod, man i kind Jufilisti.

⁷Man Mungu konye kum Jufilisti, man kum Juarabi m’ubedo i Gur-bal, man Jumeuni.

⁸E Juamoni gimio ajok ni Uzia: man nyinge yik mba mba cil i kamondo mi Misiri: kum edoko tek apila.

⁹Mange ke Uzia gomo odkur i Yerusalem i dhugang’ mi gui, man i dhugang’ mi poga, man i ka ma gang’kidi gom i ie, man edwokogi tek.

¹⁰Man egomo odkur i langa, man etong’o pi m’atong’a dupa, kum ebedo ku lim dupa; i kinya bende, man i pambu: man ebedo ku jutipodho ku juyikulok wi gudi man i pothi ma cek hai; kum emaru fur.

¹¹Mange ke Uzia bedo ku njuru asikari mi dhanu mir ali, ma wok woko i ali kud udul, calu wel mi kwan migi ma Yeiel ma jagorcik ku Maseya ma jego timo, the cing’ Hanania, ma jego acel mir ubimo.

¹²Wel dho mi wi udi pa wego, en e mi dhanu ma tek ma jurukara, en e rubanga ario ku dak abusiel.

¹³Man njuru asikari ni the cing’gi, rubanga dak adek kud abiro ku dak abic, m’utimo ali ku tego ma dit kara ukony ubimo kum jadegi.

¹⁴Man Uzia yiko igi, en e ni udul ceke, ban, ku tong’, ku jambwic, kud asi ma tek, man atum, ku kidi mi jungbe.

¹⁵Man etimo atum ma dit i Yerusalem, ma dhanu ma jurieko gitimo, kara gibed wi odkur ma wi odkur mi gui, ma jukilo ko athero ku kidi ma dit. Man nyinge yik bor mba mba; kum jukonye apila, cil m’edoko ko tek.

¹⁶Ento kinde m’edoko tek, adundene tingre malu, ketho nia etimo rac, man edubo ni Yehova Mungu pare; kum emondo i hekalu pa Yehova kara ewang’ udok ma ng’wice ng’ar wi pemblam mir udok ma ng’wice ng’ar.

¹⁷Man Azaria ma jalam umondo i toke, ku julam pa Yehova pier abora gikugi, ma gi dhanu ma gi jurukara:

¹⁸man gijai ni Uzia m’ubimo, e giwacu ire kumae, En e tic peri ngo, Uzia, ma nia iwang’ udok ma ng’wice ng’ar ni Yehova, ento mi julam ma wot Harun, ma juthierogi kara giwang’ udok ma ng’wice ngar; ai woko kud i kamaleng’; kum idubo; kadok yung de bibedo mbe iri ku ba Yehova Mungu.

¹⁹Kwinyo lund umaku Uzia; man ebedo ku gin ma juwang’u kudo udok ma ng’wice ng’ar i cinge kara ewang’ udok ma ng’wice ng’ame; e kinde ma kwinyo make kum julam, joi upodho ternyime i wang’ julam i ot pa Yehova, i ng’et pemblam mir udok ma ng’wice ng’ar.

²⁰Man Azaria ma jalam ma dit, ku julam ceke, gineno bang’e, man, nen, joi ni i ternyime, e gicwale woko pio ku keca; eyo, en gire etimo pio bende kara eci woko, kum Yehova goye.

²¹Man Uzia m’ubimo e won joi cil i ceng’ mi tho pare, man ebedo i ot ma kende, m’e won joi; kum jukabe woko kud i ot pa Yehova: man Yotham ma wode ni wi ot p’ubimo, m’epoko ko lembe ni dhanu m’i ng’om.

²²Nie dong’ tic p’Uzia, ma kwong’ane ku ma cenne, Isaya ma jabila, ma wod Amoz, ugoro.

²³Kum kumeno Uzia nindo ku kwaru pare; e giyike ku kwaru pare i podho mi yik ma piny p’ubimo; kum giwacu kumae, En e won joi: man Yotham ma wode camu ker kakare.