Read Alur 2 Lemkei 27 Bible Online

2 Lemkei 27 - Alur bible

2 Lemkei 27

¹Yotham rundi pare pier ario wi abic kinde m’emaku camu ker; man ecamu ker rundi apar wi abusiel i Yerusalem; man nying’ min mire Yeruca ma nya Zadok.

²Man etimo gin m’atira i wang’ Yehova, calku gin ceke ma won ma Uzia timo: ento emondo ngo i hekalu pa Yehova. Man dhanu gitimo nyothri asu.

³Egoyo dhugang’ ma yo malu mi ot pa Yehova, man egomo dit wi gang’kidi mir Ofel.

⁴Man kendo egomo adhura i ng’om gudi mi Yuda, man egomo ot ma tek ku odkur i luli.

⁵Man ekiedp kud ubimo mi nyithindho mir Amon bende, man esagugi. Man nyithindho mir Amon gimio ire talanto mi mola ma tar dak acel rundi nica, man mukero mi nganu rubanga apar, ku nganu ma tung’ de rubanga apar. Nyithindho mir Amon gimio kumeno ire, i rundi mir arionde bende, man i adege.

⁶Kum kumeno Yotham udoko tek, kum eketho yo pare i wang’ Yehova Mungu pare.

⁷Nie dong’ tic pa Yotham, kud ali pare ceke, man yo pare, nen, gigore i kitabu mir ubimo mir Israel ku Yuda.

⁸Rundi pare pier ario wi abic kinde m’emaku camu ker, man ecamu ker rundi apar wi abusiel i Yerusalem.

⁹Man Yotham unindo ku kwaru pare, e giyike i adhura pa Daudi: man Ahaz ma wode camu ker kakare.