Read Alur 2 Lemkei 28 Bible Online

2 Lemkei 28 - Alur bible

2 Lemkei 28

¹Ahaz rundi pare pier ario kinde m’emaku camu ker; man ecamu ker rundi apar wi abusiel i Yerusalem: man etimo gin m’atira ngo i wang’ Yehova, calu Daudi ma kwaru mire;

²ento ewotho i yo p’ubimo mir Israel, man etimo ayi gin m’acwia m’athiedha bende ni Balim.

³Man ke ewang’u udok ma ng’wice ng’ar i poga pa wod Hinon, man ewang’u nyithindho pare i mac, calku ginmajudagu mi thek ma Yehova bayu woko i wang’ nyithindho mir Israel.

⁴Man elamu lam man ewang’u udok ma ng’wice ng’ar i ka ma malu, man wi ungulu gudi, man the yen ceke m’uluk kubang’e kubang’e.

⁵Kum kumeno Yehova Mungu pare mie i cing ubimo mi Cami; e gigoye, man giyaku udul ma dit ma pare ni ng’eca, e gikelogi i Dameski. Man jumie bende i cing ubimo mir Israel, m’ugoye ku nek ma dit.

⁶Kum Peka ma wod Remalia nego dhanu rubanga dak acel ku pier ario i Yuda i ceng’ acel, gin ceke gi dhanu ma jurukara; kum giweko Yehova, ma Mungu pa kwaru migi.

⁷Man Zikri, ng’atu ma tek mir Efraim, enego Maseya ma wod ubimo, man Azrikam ma jabim mi ot, kud Elkana m’ulubo ubimo.

⁸Man nyithindho mir Israel giyaku kind utumeggi rubanga dak ario ni ng’eca, mon, ku nyithindho ma co, ku nyithindho ma nyir, man giyaku ayeki bende dit i bang’gi, man grkelo ayekine i Samaria.

⁹Ento jabila pa Yehova ni keca, ma nyinge Oded: man ewok woko kara eromb kud udul m’ubino Samaria, e ewacu igi kumae, Nen, kum Yehova, ma Mungu pa kwaruwu, kwinyo nege kum Yuda, emiogi i cingwu, e wunegogi ku kwinyo ma tundo malu i polo.

¹⁰Man kawono wukeco ya wugwok nyithindho mi Yuda ku Yerusalem iwu ni ng’eca ma co ku ma mon: ento dubo ma mu giwu nuti ngo kum Yehova Mungu mu?

¹¹Ka kumeno kawono wuwinja, man wudwok ng’eca, ma wumaku ni ng’eca ma utumegwu; kum kwinyo ma lake kec pa Yehova ni i wiwu.

¹²Wi nyithindho pa Efraim moko, en e Azaria ma wod Yohanan, man Berekia ma wod Mecilemoth, man Yehizkia ma wod Calum, man Amasa ma wod Hadlai, gilund gicungo malu kum ju m’uai bang’ ali,

¹³man giwacu igi kumae, Wubimondo ku ng’eca keni ngo: kum wukeco gin ma bikelo dubo i wiwa kum Yehova, kara wumed kum dubo mwa man kum kier mwa; kum kier mwa dit, man kwinyo ma lake tek ni wi Israel.

¹⁴Kum kumeno weg jamtho giweko ng’eca kud ayeki i wang’ judongomawijo ku cokri ceke.

¹⁵Man dhanu ma juwacu pigi ku nying’gi giai malu, e gigamu ng’ecane, man gironyo dhanu ceke m’ubedo muneru i kindgi ku jambayekine, man gimio igi kendi, ku wara, man gimio igi gicam gimadhi, giwirogi de, man giketho ju ma ng’ic m’i kindgi ceke wi kana, e gikelogi i Yeriko, ma adhura mi thith, ba utumeggi: e gilund gidok Samaria.

¹⁶I nindo nica ubimo ma Ahaz uoro kwenda bang’ ubimo mir Ascur ukonye.

¹⁷Kum Juedomi bino kendo man gigoyo Yuda, man giyaku dhanu ni ng’eca.

¹⁸Jufilisti bende giyaku adhura mi poga, man ma yor ariwa ma piny ni Yuda, man gimaku Beth-cemec, ku Aijalon, man Gederoth, ku Soko karacelo ku pacune de, man Timna ku pacune de, man Gimzo bende ku pacune de: e gibedo keca.

¹⁹Kum Yehova kelo Yuda piny kum Ahaz m’ubimo mir Israel; kum etimo lemblewic, man edubo dit kum Yehova.

²⁰Man Tilgath-pilneser m’ubimo mir Ascur ubino i bang’e, man eng’abu cwinye, ento emio ire tego ngo.

²¹Kum Ahaz ugamu makapiny kud i ot pa Yehova, man kud i ot p’ubimo man mi judongomawijo, e emie ni ubimo mir Ascur: ento ekonye ngo.

²²Man i nindo mi can pare edubo kendo asu ni Yehova, en e ubimo maeni ma Ahaz.

²³Kum elamu lam ni mungu mi Dameski, m’ugoye; man ewacu kumae, Kum mungu mir ubimo mi Cami konyogi, ka kumeno abilamu lam igi, kara gikonya. Ento gibedo mi nyoth ire, man pi Israel ceke.

²⁴Man Ahaz ucoko agulu m’i ot pa Mungu karacelo, ethumo i agulu mi ot pa Mungu nziki nziki, man eciko dhugola mi ot pa Yehova; man etimo ire pemblam i gui ceke mi Yerusalem kubang’e kubang’e.

²⁵Man etimo ka ma malu i adhura ceke mi Yuda kubang’e kubang’e mi wang’u udok ma ng’wice ng’ar ni mungu mange, e enyayu ng’ecwiny i Yehova, ma Mungu pa kwaru pare.

²⁶Nie dong’ tic pare, ku yo pare ceke, ma kwong’ane ku ma cenne, nen, gigore i kitabu mir ubimo mi Yuda man Israel.

²⁷E Ahaz unindo ku kwaru pare, man giyike i adhura, en e i Yerusalem; kum gikele i odliel p’ubimo mir Israel ungo: man Hezekia ma wode camu ker kakare.