Read Alur 2 Lemkei 29 Bible Online

2 Lemkei 29 - Alur bible

2 Lemkei 29

¹Hezekia maku camu ker kinde ma rundi pare pier ario wi abic; man ecamu ker rundi pier ario wi abung’wen i Yerusalem: man nying’ min mire Abija, ma nya Zekaria.

²Man etimo gin m’atira i wang’ Yehova, calku gin ceke ma Daudi ma kwaru mire timo.

³I rundi ma kwong’ane mi camuker pare, i dwi mir acende, eyabu dhugola mi ot pa Yehova, man eyikogi.

⁴Man ekelo julam ku Julawi i ie, man ecokogi karacelo i ka ma lac yo nyangu,

⁵man ewacu igi kumae, Wuwinja, wu Julawi; kawono wudwokru giwu leng’, man wudwok ot pa Yehova leng’, ma Mungu pa kwaruwu, man wulab susu woko kud i kamaleng’.

⁶Kum kwaruwa dubo, man gitimo gin ma rac i wang’ Yehova Mungu mwa, man giweke, man giloko wang’gi woko ku ba kabedo pa Yehova e giloko ng’eigi.

⁷Man giciko dhugola mi pondot bende, ginego thala de, man giweko wang’u udok ma ng’wice ng’ar ku thiero lam m’awang’a i kamaleng’ ni Mungu mir Israel.

⁸Kum kumeno kwinyo pa Yehova ni wi Yuda ku wi Yerusalem, man emiogi kara juwoth kugi rr, kara gibed ni gin ma wang’u ijo, man jamcac, calu wuneno ku weng’wu.

⁹Kum, nen, kwaru mwa podho ku palamularu, man wotwa ku nyigwa ku mondwa gini i ng’eca pi maeni.

¹⁰Kawono eni i adundena ya atim lembariba ku Yehova, ma Mungu mir Israel, kara ng’ecwiny pare ma lake tek ulokre woko kud i bang’wa.

¹¹Wota, kud wubed wunawuna; kum Yehova goyo wiwu kara wucung i wang’e, kara wutim ire, man kara wubed jutim pare, man wuwang’ udok ma ng’wice ng’ar.

¹²Julawi gilund giai, en e Mahath, ma wod Amasai, man Yoel ma wod Azaria, mi wot Jukohathi; man mi wot Merari, Kic ma wod Abdi, man Azaria ma wod Yehalelel; man mi Jugerconi, Yoa ma wod Zima, man Aden ma wod Yoa;

¹³man mi wot Elizafan, Cimri man Yeiel; man mi wot Asaf, Zekaria ku Matania:

¹⁴man mi wot Heman, Yeiel ku Cimei; man mi wot Yeduthun, Cemaya kud Uziel.

¹⁵Man gicoko uturneggi, e gidwokri gigi leng’, man gimondo, calku lembang’ola p’ubimo ku lembe pa Yehova, kara gidwok ot pa Yehova leng’.

¹⁶Man julam gimondo i ng’et ot pa Yehova ma yor i ie, kara gidwoke leng’, e giwodho susu ceke woko ma ginwang’u i hekalu pa Yehova i lelagang’ mi ot pa Yehova. E Julawi gigame, gikabe woko gitere i kulo Kidron.

¹⁷Nie githeko dwokoleng’ i ceng’ mir acende mi dwi mir acende, e i ceng’ mir aborane mi dwije giwok kum pondot pa Yehova; man gidwoko ot pa Yehova leng’ i ceng’ abora: man i ceng’ apar wi abusiende mi dwi mir acende gidaru.

¹⁸Gilund gimondo ba Hezekia m’ubimo yor i odker, man giwacu kumae, Wadwoko ot pa Yehova ceke leng’, ku pemblam mi lam m’awang’a, karacelo kud agulune ceke, man mesa mi kwen m’anyutha, kud agulune ceke.

¹⁹Mange ke agulu ceke, m’ubimo ma Ahaz ubayu woko i camuker pare kinde m’edubo, wayiko man wadwokogi leng’; man, nen, gini i wang’ pemblam pa Yehova.

²⁰Hezekia m’ubimo lund uai pir kugweno, man ecoko judongomawijo mir adhura, man eidho malu ba ot pa Yehova.

²¹E gikelo thwoni dhiang’ abiro, ku nyogi rombe abiro, man nyithi rombe abiro, ku nyogi diegi abiro, ni lam mi dubo pi ker man pi kamaleng’ man pi Yuda. Man eng’olo ni julam ma wot Harun ya githiergi wi pemblam pa Yehova.

²²Kum kumeno ginego thwoni dhiang’, man julam gijolo rimbgi, e gikire wi pemblam: man ginego nyogi rombe, man gikiro rimbgi wi pemblam: e ginego nyithi rombe bende, man gikiro rimbgi wi pemblam.

²³E gikelo nyogi diegi ceng’ni mi lam mi dubo i wang’ ubimo ku cokri; e giketho cing’gi i kumgi:

²⁴e julam ginegogi, man gitimo lam mi dubo ku rimbgi wi pemblam, kara utim adunya pir Israel ceke; kum ubimo ng’olo nia lam m’awang’a ku lam mi dubo jutim pir Israel ceke.

²⁵Man eketho Julawi i ot pa Yehova kud umbukulumbu, man kud adungu, man ku nanga, calku lembang’ola pa Daudi, man pa Gad ma jaeulembe p’ubimo, ku Nathan ma jabila; kum lembang’ola en e pa Yehova ni kum jubila pare.

²⁶Man Julawi gicungo ku jambwer pa Daudi, man julam kud agwara.

²⁷Man Hezekia ng’olo ya juthier lam m’awang’a wi pemblam. E kinde ma lam m’awang’a thekre, wer pa Yehova bende thekre, kud agwara, karacelo ku jamb wer pa Daudi m’ubimo mir Israel.

²⁸E cokri ceke girwo, man juwer giwero, man jukudhagwara gikudho, maeni ceke bedo asu cil ma lam m’awang’a thum ko.

²⁹Man kinde ma gidaru thiero, ubimo ku dhanu ceke ma gini kude gikulo wigi gigi man girwo.

³⁰Mange ke Hezekia m’ubimo ku judongomawijo ging’olo ni Julawi y a giwer pak ni Yehova ku lembe pa Daudi, man pa Asaf ma jaeulembe. E giwero pak ku mutoro, man gikulo wigi e girwo.

³¹Hezekia lund uloko lembe man ewacu kumae, Kawono wudaru thieru giwu ni Yehova, wubin ceng’ni man wukel lam ku girathiera mi foc i ot pa Yehova, Man cokri gikelo lam ku girathiera mi foc; e ju ma adundegi ting’ogi gikelo lam m’awang’a.

³²Man wel mi lam m’awang’a ma cokri kelo en e thwoni dhiang’ pier abiro, man nyogi rombe dak acel, ku nyithi rombe dak ario: maeni ceke en e ni lam m’awang’a ni Yehova.

³³Man gin ma juthiero gi koni dhiang’ dak abusiel ku rombe rubanga adek.

³⁴Ento julam gi nok hai, ketho nia gicopo thumo i lam m’awang’a ceke ngo: kum kumeno uturneggi ma Julawi gikonyogi, cil ma tic uthum ko, man maram julam gidwokri ko gigi leng’; kum Julawi gibedo atira i adundegi ma sagu julam ku dwokri gigi leng’.

³⁵Man lam m’awang’a bende bedo dit hai, ku mo mi lam mi kwiocwiny, ku lam m’amadha pi lam m’awang’a kubang’e kubang’e. Kum kumeno juketho timotim mi ot pa Yehova kakare.

³⁶E anyong’a nego Hezekia, ku dhanu ceke, kum gin ma Mungu yiko ni dhanu: kum ginduni timbre pio pio.