Read Alur 2 Lemkei 30 Bible Online

2 Lemkei 30 - Alur bible

2 Lemkei 30

¹Man Hezekia oro kwenda bang’ Israel ku Yuda ceke, man egoro waraga bende ni Efraim ku Manase, nia maku gibin ba ot pa Yehova i Yerusalem, kara gikwir kadhukuwijo ni Yehova, Mungu mir Israel.

²Kum ubimo poro lembe, ku judongomawijo pare, ku cokri ceke i Yerusalem, nia gikwir kadhukuwijo i dwi mir arionde.

³Kum gicopo kwire i nindo maeca ngo, kum wel julam ma gidwokri gigi leng’ uromo ngo, kadok dhanu de gicokri gigi ngo karacelo i Yerusalem.

⁴E ginduni bedo atira i wang’ ubimo ku mi cokri ceke.

⁵Kum kumeno ging’olo cik ya gior kwenda i kind Israel ceke mba mba ugambre Ber-ceba cil kum Dan, nia gibin kara gikwir kadhukuwijo ni Yehova, Mungu mir Israel, i Yerusalem: kum fodi gikwire ngo kud udul ma dit calu jugoro.

⁶Kum kumeno jukwenda gicidho ku waraga m’uai bang’ ubimo ku judongomawijo pare i kind Israel ceke mba mba ku Yuda, man calku lembang’ola p’ubimo, m’uwacu kumae, Wu nyithindho mir Israel, wulokru kendo ba Yehova, Mungu pa Ibrahim, kud Isak, man Israel, kara elokre ba dong’ kindwu m’uboth kud i cing ubimo mir Ascur.

⁷Man kud wubed calu kwaru mu, man calu utumegwu, m’udubo ni Yehova, Mungu pa kwaru migi, ketho emiogi ni nyoth, calu wuneno.

⁸Kawono kud wubed ma ng’utwu cikre, calu kwaruwu bedo; ento wumond giwu ni Yehova, man wumond i kamaleng’ pare, m’edwoke leng’ mi nja, man wutim ni Yehova Mungu mu, kara ng’ecwiny pare ma lake tek ulokre woko kud i beng’wu.

⁹Kum tek wulokru kendo ba Yehova, utumegwu ku nyithindho mu binwang’u ngisi i wang’ ju m’uterogi ni ng’eca, e gibidwogo kendo i ng’om maeni: kum Yehova Mungu mu e won bero man e won kisa, man ebiloko wang’e kud i beng’wu ngo, tek wudwogo i bang’e.

¹⁰Kum kumeno jukwenda gikadhu ku bang’ adhura ku bang’ adhura kud i ng’om Efraim ku Manase, cil kum Zebulun: ento ging’ierogi gicayu kogi, man giporo bang’gi.

¹¹Ento dhanu moko mir Acer ku Manase man mi Zebulun gijwigri gigi, man gibino Yerusalem.

¹²Cing’ Mungu bende bino wi Yuda m’umio igi adunde acel, kara gitim lembang’ola p’ubimo man mi judongomawijo ku lembe pa Yehova.

¹³Man dhanu ma dit gicokri kuca i Yerusalem kara gikwir agba mi kwen ma thobi mbe i ie i dwi mir arionde, cokri ma dit apila.

¹⁴E giai malu, man gikabu pemblam ma ni i Yerusalem woko ku pemblam ceke mir udok ma ng’wice ng’ar gikabu woko, man gibayugi i kulo Kidron.

¹⁵Gilund githumo kadhukuwijo i ceng’ apar wi ang’wende mi dwi mir arionde: man julam ku Julawi lewic unegogi, e gidwokri gigi leng’, man gikelo lam m’awang’a i ot pa Yehova.

¹⁶E gicungo i kakagi calu kura gi, calku cik pa Musa ma dhanu pa Mungu: julam gikiro rimo ma gijolo i cing’ Julawi.

¹⁷Kum dhanu dupa nuti i cokri ma gidwokri gigi leng’ ungo: ka kumeno tic mi thumo kadhukuwijo mi dhanu kubang’gi kubang’gi ma gi leng’ ungo ni wi Julawi, kara udwokgi leng’ ni Yehova.

¹⁸Kum udul mi dhanu, en e dhanu dupa mir Efraim ku Manase, man Isakar ku Zebulun, fodi gidwokri gigi leng’ ungo, ento gicamu kadhukuwijo tung’ ku m’egoro. Kum Hezekia rwo pigi, ewacu kumae, Yehova ma ber uwek lembe mi dhanu kubang’gi kubang’gi

¹⁹m’uketho adundene kara uyeny Mungu, Yehova, Mungu pa kwaru pare, kadok judwoke leng’ ungo calku dwokrileng’ mi kamaleng’.

²⁰E Yehova winjo dwand Hezekia, man ecangu dhanu.

²¹Man nyithindho mir Israel ma ginuti Yerusalem gikwiro agba mi kwen ma thobi mbe i ie ceng’ abiro, kud anyong’a ma dit; man Julawi ku julam gipaku Yehova ceng’ ku ceng’, ma gibepaku ku jambwer ma tek ni Yehova.

²²E Hezekia yero lemjuk ni Julawi ceke ma gibedo ku ng’eyong’ec ma ber i timotim pa Yehova. Kum kumeno gicamu i agba ceke mi ceng’ abiro, ma gibethiero lam mi kwiocwiny, ma gibetuco de ni Yehova, Mungu pa kwaru migi.

²³Man cokri ceke giporo lembe mi kwiro ceng’ abiro mange; e gikwiro ceng’ abiro mange ku mutoro.

²⁴Kum Hezekia m’ubimo mi Yuda mio thwoni dhiang’ rubanga acel man rombe rubanga abiro ni cokri ni lam; man judongomawijo gimio thwoni dhiang’ rubanga acel ku rombe rubanga apar ni cokri: man wel julam ma dit gidwokri gigi leng’.

²⁵E cokri ceke mi Yuda, giku julam man Julawi, ku cokri ceke m’uai kud i Israel, kud umondo m’uai i ng’om Israel, man m’ubedo i Yuda, anyong’a negogi.

²⁶Kum kumeno mutoro ma dit ni i Yerusalem; kum yo ng’ei nindo pa Suleman ma wod Daudi m’ubimo mir Israel ma calu maeni mbe i Yerusalem.

²⁷Julam ku Julawi gilund giai malu man gimio mugisa ni dhanu; e dwandgi winjre, man rwo migi bino malu ba kabedo pare ma leng’, en e i polo.