Read Alur 2 Lemkei 31 Bible Online

2 Lemkei 31 - Alur bible

2 Lemkei 31

¹Nie kinde ma maeni ceke thum, I Israel ceke ma ginuti giwok woko bang’ adhura mi Yuda, man gituro mbegi nziki nziki, man gitong’o mungu m’araga piny, gituro ka ma malu de piny ku pemblam kud i Yuda ceke man Benyamin, i Efraim bende man Manase, cil ma ginyotho kogi ceke. Nyithindho mir Israel ceke gilund gidok ku ba dhanu ceke ng’atuman ba piny pare, i adhura migi ma dhe.

²Man Hezekia ketho tic maka mi julam ku Julawi calku maka migi, ku ba dhanu ceke calku timotim pare, julam ku Julawi bende, pi lam m’awang’a man pi lam mi kwiocwiny, kara gitim, man gimi foc, man kara gipak pak i dhugang’ mi gonjo pa Yehova.

³Eketho makapiny p’ubimo bende kum piny pare ni lam m’awang’a, thelembene, mi lam m’awang’a ma kugweno kud uthieno, man lam m’awang’a mi ceng’ sabatu, mi dwi m’upor de, man mir agba ma juketho, calu egore i cik pa Yehova.

⁴Man ke eng’olo ni dhanu m’ubedo i Yerusalem ya gimi makapiny mi julam ku Julawi, kara gimiri gigi ba cik pa Yehova.

⁵Man kinde ma lembang’olane wok woko, nyithindho mir Israel gimio mwoka cam dit apua, pigulok ma nyen, ku mo, man kic, man mi gin ceke m’ucek i podho; man gikelo apaj gin ceke ma dit hai i ie.

⁶Man nyithindho mir Israel ku Yuda, m’ubedo i adhura mi Yuda, gikelo apaje mi koni dhiang’ ku rombe bende i ie, kud apaj gin ma juthiero ni Yehova Mungu migi, e gikethogi ni ungu ungu.

⁷I dwi mir adege githeko ketho ther ungune, man gidarugi i dwi mir abirone.

⁸Man kinde ma Hezekia ku judongomawijo gibino man gineno ungune, gimio mugisa ni Yehova, ku dhanu pare Israel.

⁹Hezekia lund upenjo julam ku Julawi pir ungune.

¹⁰Man Azaria ma jalam ma dit, mi ot pa Zadok, uloko lembe ire man ewacu kumae, Ugambre ma dhanu theko kelo girathiera i ot pa Yehova, wacamu man eromowa, man waweko dupa: kum Yehova mio mugisa ni dhanu pare; e m’udong’ en e piny m’akana ma dit maeni.

¹¹Hezekia lund ung’olo ya juyik kusika i ot pa Yehova; e giyikogi;

¹²man gikelo girathiera kud apajpiny i ie ku gin ma juthiero cu. Man Konania ma Jalawi en e jabim i wigi, man Cimei m’umin mire en e mir arionde;

¹³man Yeiel, kud Azazia, man Nahath, kud Asahel, man Yerimoth, ku Yozabad, man Eliel, kud Ismakia, man Mahath, ku Benaya, gi junen the cing’ Konania man Cimei m’umin mire, ni kum goyowic pa Hezekia m’ubimo, man Azaria ma jabim mi ot pa Mungu.

¹⁴Man Kore ma wod Imna ma Jalawi, ma jakur mi dhugang’ ma yo nyangu, en e wi ajok ma ku berocwiny pa Mungu, kara epok girathiera pa Yehova, ku gin ma leng’ m’usagu.

¹⁵Man Aden, ku Miniamin, man Yecuwa, man Cemaya, kud Amaria, ku Cekania, gini the cinge, i adhura mi julam i tic migi ma ni i korgi, kara gimi ni utumeggi ku kur, ni ma dongo ku ma thindho bende:

¹⁶m’umedo ju ma jukwanu ku thekwaru mi dhanu ma co, ugambre kum rundi adek ku ma sagu, en e dhanu ceke m’umondo i ot pa Yehova kubang’gi kubang’gi, calu ma cande nuti ceng’ ku ceng’, mi timotim migi i tic maka migi calku kur migi;

¹⁷man ju ma jukwanugi ku thekwaru mi julam ku ba udi mi kwaru migi, man Julawi ugambre kum rundi pier ario ku ma sagu, i tic maka migi ku kur migi;

¹⁸man ju ma jukwanugi bende ku ba thekwaru mi nyithindho migi ceke ma thindho, ku mon migi, man wotgi, ku nyiggi, i cokri ceke: kum i tic maka migi ma ni i korgi gidwokri gigi leng’ i leng’.

¹⁹Mi wot Harun ma julam bende, ma gini i pothi mi ng’et adhura migi, i adhura kubang’e kubang’e, dhanu nuti ma juwacu pigi ku nying’gi, kara gimi makapiny ni dhanu ceke ma co ma kind julam, man ni dhanu ceke ma jukwanugi ku thekwaru i kind Julawi.

²⁰E Hezekia timo kumeno i Yuda ceke mba mba; man etimo gin ma ber m’atira man mandha i wang’ Yehova Mungu pare.

²¹Man ku ba tic ceke m’etheko i timotim mi ot pa Mungu, man i cik, man i lembang’ola, kara eyeny Mungu pare, etime kud adundene ceke, e lembe bedo miero.