Read Alur 2 Lemkei 32 Bible Online

2 Lemkei 32 - Alur bible

2 Lemkei 32

¹Yo ng’ei gin maeni, ku tic mandha maeni Senakerib m’ubimo mir Ascur ubino, man emondo i Yuda, e egonjo kum adhura ma tek, man ie pido ya evoigi ire gire.

²E kinde ma Hezekia neno nia Senakerib ubino, man nia ekeco ya ekied kum Yerusalem,

³eporo lembe ku judongomawijo pare ku dhanu ma tek pare nia gicul wang’ pi mi kulo ma gini yo woko ni adhura; e gikonye.

⁴Kum kumeno dhanu dupa gicokri karacelo, e giculo kulo ceke, man kulo m’uringo kud i die ng’om, giwacu kumae, Nedi ubimo mir Ascur ubino, man ginwang’ pi dupa?

⁵Man cwinye doko tek, e egomo gang’kidi ceke m’urwombre piny, man eting’e malu kum odkur, ku gang’kidi mucelo ma yo woko, man edwoko Milo ma ni i adhura pa Daudi tek, man etimo jamtho ku ban dupa.

⁶Man eketho jego mir ali wi dhanu, man ecokogi karacelo i bang’e i ka ma lac i dhugang’ mir adhura, e eyero igi lemjuk, ewacu kumae,

⁷Wubed tek man ku tegocwiny, lworo kud unegwu kadi cwinyu de kud ung’abre kum ubimo mir Ascur, kadi pir udul ceke ma gini kude; kum ma ni bang’wa dupa ma sagu m’i bang’e:

⁸karacelo kude bot mi ring’kum; ento karacelo kudwa Yehova Mungu kara ukonywa, man ukied lwiny mwa. E dhanu gijengri gigi kum lembe pa Hezekia m’ubimo mi Yuda.

⁹Yo ng’ei maeni Senakerib m’ubimo mir Ascur uoro jutic pare i Yerusalem (nwang’u eni i wang’ Lakic, ku tego pare ceke gikude), ba Hezekia m’ubimo mi Yuda, man ba Yuda ceke ma gini i Yerusalem, ewacu kumae,

¹⁰Senakerib m’ubimo mir Ascur uwacu kumae, Wujengru kum ang’o, ma nia wukai cwinywu i atiek mi Yerusalemi?

¹¹Hezekia piko lembe en i iwu ngo, kara jumiwu wutho ku ndru man ku rieupi, m’ewacu ko kumae, Yehova Mungu mwa bibodhowa kud i cing ubimo mir Ascuri?

¹²Hezekia maeni ukabu ka ma malu woko ngo ku pemblam pare, man eng’olo ni Yuda ku Yerusalem, ewacu kumae, Wubirwo i wang’ pemblam acel, man wubiwang’u udok ma ng’wice ng’ar i wie?

¹³Wung’eyo ngo gin ma waku wegwa watimo kum kodhidhanu ceke m’i ng’omi? Mungu mi thek m’i ng’om gicopo bodho ng’om migi kud i cinga?

¹⁴Ng’a ma ni i kind mungu ceke mi thek maeno ma wegwa nyotho kot, ma copo bodho dhanu pare kud i cinga, ma nia Mungu mu copo bodhowu kud i cinga?

¹⁵Ka kumeno kawono kud wuyi Hezekia bombwu, kadi epik lembe i iwu calu maeni kadok ayia de kud wuyie; kum mungu mi thek moko mbe kadi ker ma copo bodho dhanu pare kud i cinga, man kud i cing’ kwara: e ka mungu mu ke bibodhowu nenedi kud i cinga?

¹⁶E jutic pare giyero kendo m’usagu kum Yehova Mungu, man kum jatic pare ma Elezekia.

¹⁷Egoro waraga bende, m’ecayu ko Yehova, Mungu mir Israel, man kara eyer pire rac, ewacu kumae, Calu mungu mi thek m’i ng’om, ma gibodho dhanu migi ngo kud i cinga, e kumeno Mungu pa Hezekia de bibodho dhanu pare ngo kud i cinga.

¹⁸E gikok ku dwandgi ma tek ku dhu Juyahudi ba dhanu m’i Yerusalem ma gini wi gang’kidi, kara ginyai lworo i igi, man kara ging’ab cwiny gi; kara gimak adhurane.

¹⁹Man giyero pi Mungu mi Yerusalem, calu pi mungu mi kodhidhanu m’i ng’om, ma gi tic mi cing’ dhanu.

²⁰Man Hezekia m’ubimo, kud Isaya ma wod Amoz, girwo kum maeni, e giywak ba polo.

²¹E Yehova oro malaika, man ejigo wi dhanu ma tek ceke ma jurukara, ku jutelwic man jego, i kagonjo p’ubimo mir Ascur. Kum kumeno edok ku lewic mi wang’ i ng’om pare ma dhe. Man kan emondo i ot pa mungu pare, e ju ma giai kud i ie gire ginege keca ku palamularu.

²²Yehova bodho Hezekia kumeni ku ju m’ubedo i Yerusalem kud i cing’ Senakerib m’ubimo mir Ascur, man kud i cing’ jumange ceke, man etelo wigi kun ku kun.

²³E dhanu dupa kelo giramia ni Yehova i Yerusalem, man gin ma pire tek ni Hezekia m’ubimo mi Yuda; ketho nia ebedo dwong’ yo ng’ei maeni i wang’ thek ceke.

²⁴I ceng’ maeca Hezekia kume lith ceng’ni tho: e erwo ni Yehova; man eyero ire, e emio ire giranyutha.

²⁵Ento Hezekia timo kendo ngo calku kony m’utimbre ire; kum adundene tingre malu: ka kumeno kwinyo ni i wie, man wi Yuda ku Yerusalem.

²⁶Ento Hezekia jwigre gire kum kuhaya mir adundene, en ku dhanu m’ubedo i Yerusalem bende, ketho nia kwinyo pa Yehova bino i kumgi ngo i nindo pa Hezekia.

²⁷Man Hezekia bedo ku lonyo man yung dit apila: e eketho ire kakan mi mola ma tar, man mi mola ma kwar, ku pi kidi ma pire tek, man pi yath ma jwa jwa, man pi ban, man pir agulu ma ber ma kwonde tung’ tung’;

²⁸odkanpiny bende mi cam m’unyai man pigulok ma nyen ku mo; man dwol mi lim ceke ma kwonde tung’ tung’, man udul rombe i kakwac.

²⁹Mange ke eyiko ire adhura, man piny mir udul rombe ku dhok de dupa; kum Mungu mio ire piny ma dit apila.

³⁰Hezekia maeni bende culo kulo ma malu mi pi mi Gihon, man ekelogi atira piny i ng’et adhura pa Daudi yo reto. Man tic pa Hezekia ceke bedo miero.

³¹Ento i lembe mi jukwenda mi judongomawijo mi Babeli, m’uoro kwenda i bang’e kara gipenj pi gin ma wang’uijo m’utimbre i ng’om, Mungu weke, kara emul ie, kara eng’ei gin ceke ma ni i adundene.

³²Nie dong’ tic pa Hezekia, ku gin ma ber pare m’etimo, nen, gigore i ginmawokiwang’ pa Isaya ma jabila ma wod Amoz, i kitabu mir ubimo mi Yuda kud Israel.

³³E Hezekia nindo ku kwaru pare, man giyike i kaidho mi odliel mi wot Daudi: e Yuda ceke ku ju m’ubedo i Yerusalem giyunge i tho pare. Man Manase ma wode camu ker kakare.