Read Alur 2 Lemkei 33 Bible Online

2 Lemkei 33 - Alur bible

2 Lemkei 33

¹Manase rundi pare apar wi ario kinde m’emaku camu ker; man ecamu ker rundi pier abic wi abic i Yerusalem.

²E etimo gin ma rac i wang’ Yehova, calu ginmajudagu mi thek ma Yehova bayu woko i wang’ nyithindho mir Israel.

³Kum egomo ka ma malu kendo ma Hezekia ma won uturo piny; man eguro pemblam ni Balim, e etimo mungu m’araga, man erwo ni udul m’i polo ceke, etimo igi de.

⁴Man egomo pemblam i ot pa Yehova, ma Yehova wacu pire kumae, Nyinga bibedo i Yerusalem mi nja.

⁵Man eguro pemblam ni udul m’i polo ceke i lelagang’ ario mi ot pa Yehova.

⁶Eketho nyithindho pare bende ukadh kud i mac i poga pa wod Hinom; man etimo lembe ku weg jogi, elamu bila de, man etimo ajoga, e etimo ku ju ma weg tipo, man ku weg ajoga: etimo dubo dit i wang’ Yehova, kara unyai ng’ecwiny i ie.

⁷Man eketho ayi gin m’acwia m’apaya mi mungu m’araga, m’etimo, i ot pa Mungu, ma Mungu wacu pire ni Daudi man ni Suleman ma wode kumae, Abiketho nyinga mi nja i ot maeni, man i Yerusalem, m’agoyo wie kud i suru ceke mir Israel:

⁸kadi abidaku tiend Israel kendo ngo kud i ng’om m’aketho pi kwaru mu, tek gibiketho ewinygi kum timo gin ceke m’ang’olo igi kende, en e cik ceke ku lembang’ola ku lembapoka m’umire ni kum Musa.

⁹Man Manase bidho Yuda ku dhanu m’ubedo i Yerusalem, ketho nia gitimo dubo ma sagu thek ma Yehova nyotho i wang’ nyithindho mir Israel.

¹⁰Man Yehova yero ni Manase, man ni dhanu pare; ento giparu pire ngo.

¹¹Kum kumeno Yehova kelo jego mir udul mir ubimo mir Ascur i wigi, m’umaku Manase ku nyoro, man etwie ku gwang’, e etere i Babeli.

¹²E kinde m’eni i can, ekwayu Yehova Mungu pare, man ejwigre gire dit i wang’ Mungu pa kwaru pare.

¹³E erwo i bang’e; e eyio ire, man ewinjo kwac pare, e edwoke kendo i Yerusalem i ker pare. Manase lund ung’eyo nia Yehova en e Mungu.

¹⁴Nie yo ng’ei maeni egomo gang’kidi ma yo woko ni adhura pa Daudi, ng’et Gihon ma yo reto, i poga, cil ba kamondo mi dhugang’ mi rec; man etieko kude Ofel gbur, e eting’e malu hai: man eketho jego ma jurukara i adhura ma tek ceke mi Yuda.

¹⁵Man ekabu woko mungu ma wirok, man mungu m’araga kud i ot pa Yehova, ku pemblam ceke m’eguro wi got mi ot pa Yehova, man i Yerusalem, e ebayugi woko kud i adhura.

¹⁶Man eguro pemblam pa Yehova, man ethiero lam ku lam mi kwiocwiny ku lam mi foc i wie, man eng’olo ni Yuda ya gitim ni Yehova, Mungu mir Israel.

¹⁷Ento dhanu gilamu lam asu i ka ma malu, ento ni Yehova Mungu migi kende.

¹⁸Nie dong’ tic pa Manase, ku rwo pare ma ni Mungu pare, ku lembe mi jueulembe m’uyero ire i nying’ Yehova, Mungu mir Israel, nen, gigore i kind tic mir ubimo mir Israel.

¹⁹Rwo pare bende, man maram Mungu yio ko ire, ku dubo pare ceke man kier pare, man ka m’egomo ie ka ma malu, m’eketho ko mungu m’araga kud ayi gin m’apaya, ma fok ejwigre gire ngo, nen, gigore i lemkei pa Hozai.

²⁰Kum kumeno Manase nindo ku kwaru pare, e giyike i ot pare ma dhe: man Amon ma wode camu ker kakare.

²¹Amon rundi pare pier ario wi ario kinde m’emaku camu ker; e ecamu ker rundi ario i Yerusalem.

²²E etimo gin ma rac i wang’ Yehova, calu Manase ma won utimo; man Amon ulamu lam ni ayi gin m’apaya ceke ma Manase ma won utimo, e etimo igi.

²³Man ejwigre gire ngo i wang’ Yehova, calu Manase ma won ujwigre gire; ento Amon maeni ucikusagu asaga ku dubo.

²⁴E jutic pare giporo lembe i kume, man ginege i ot pare ma dhe.

²⁵Ento dhanu m’i ng’om ginego dhanu ceke m’uporo lembe kum ubimo ma Amon: e dhanu m’i ng’om giketho Yosia ma wode ni ubimo kakare.