Read Alur 2 Lemkei 34 Bible Online

2 Lemkei 34 - Alur bible

2 Lemkei 34

¹Yosia rundi pare abora kinde m’emaku camu ker; man ecamu ker rundi pier adek Wi acel i Yerusalem.

²E etimo gin m’atira i wang’ Yehova, man ewotho i yo pa Daudi ma kwaru mire, man elokre cen ungo yo ku cinge ma yor acwic kadi ma yor acam.

³Kum i rundi mir aborane mi camuker pare, kinde ma fodi en e aradu, emaku yenyo Mungu pa Daudi ma kwaru mire; man i rundi apar wi arionde emaku dwoko Yuda ku Yerusalem leng’ ni ka ma malu, ku mungu m’araga, man ayi gin m’apaya, kud ayi gin m’athiedha.

⁴Man girwombo pemblam mi Balim piny i vute; man etong’o ayi gin m’acwia mi ceng’ ma ni malu wi maeno piny; man mungu m’araga, kud ayi gin m’apaya man ayi gin m’athiedha, eturo nziki nziki, man edwokogi ni utur, e ecoye wi liel mi ju ma lamu lam igi.

⁵Man ewang’u cogo julam wi pemblam migi, e edwoko Yuda ku Yerusalem leng’.

⁶Man etimo kumeca i adhura pa Manase ku Efraim ku Simeon, cil kum Naftali, i gin migi m’upodho i ng’ete gbur.

⁷Man eturo pemblam piny, man eodo mungu m’araga kud ayi gin m’apaya de ni utur, e etong’o ayi gin m’acwia mi ceng’ ceke piny i ng’om Israel, man edok Yerusalem.

⁸Nie i rundi apar wi aborane mi camuker pare, kinde m’edwoko ng’om ku ot de leng’, eoro Cafan ma wod Azalia, man Maseya ma jabim mir adhura, ku Yoa ma wod Yoahaz ma jagor lemkei, kara uyik ot pa Yehova Mungu pare.

⁹Man gibino ba Hilkia ma jalam ma dit, e gimio sente ma jukelo i ot pa Mungu, ma Julawi, ma jugwok kamondo, ucoko kud i cing’ Manase kud Efraim, man ku ba dong Israel ceke, man ku ba Yuda ceke ku Benyamin, man ku ba dhanu ceke m’ubedo i Yerusalem.

¹⁰E gimie i cing’ jutic ma gini wi tic mi ot pa Yehova; man jutic ma timo i ot pa Yehova gimie kara ucul wang’ot man uyike:

¹¹gimie ni jubodho mi bau man ni jugom, kara ging’ieu kidi m’apaya, ku yen mi ribopiny, man kara utim riu mi udi m’ubimo mi Yuda nyotho.

¹²E dhanu timo tic mandha: man juwiticne gi eni, Yahath man Obadia, ma Julawi, mi wot Merari; man Zekaria ku Meculam, mi wot Jukohathi, kara udhul ticne; man jumange ma kind Julawi, ceke ma gi riek ku jambwer mi badwal.

¹³Man gini wi juyeiter, man gidhulo tic mi dhanu ceke m’utimo tic mi timotim ma kwonde tung’ tung’ kubang’e kubang’e: man mi Julawi jugorcik, ku jego, man jukurdhugola ginuti.

¹⁴Man kinde ma gikelo sente woko ma jukelo i ot pa Yehova, Hilkia ma jalam unwang’u kitabu mi cik pa Yehova m’umire ni kum Musa.

¹⁵E Hilkia loko lembe man ewacu ni Cafan ma jagorcik kumae, Anwang’u kitabu mi Cik i ot pa Yehova. Man Hilkia mio kitabune ba Cafan.

¹⁶E Cafan utero kitabune bang’ ubimo, man ke edwoko lembe bang’ ubimo, ewacu kumae, Gin ceke ma juketho i cing’ jutic peri, gibetimo.

¹⁷Man gikonjo sente woko ma junwang’u i ot pa Yehova, man gimie i cing’ juwitic, man i cing’ jutic.

¹⁸Man Cafan ma jagorcik uyero ni ubimo, ewacu kumae, Hilkia ma jalam umio ira kitabu. E Cafan usomo i ie i wang’ ubimo.

¹⁹Man etimbre, kinde m’ubimo winjo lembe mi cik, nia eyeco kendi pare.

²⁰E ubimo ng’olo ni Hilkia, kud Ahikam ma wod Cafan, man Abdon ma wod Mika, ku Cafan ma jagorcik, man Asaya ma jatic p’ubimo, ewacu kumae,

²¹Wucidhi, wupenj ba Yehova ira, man pi ju m’udong’ i Israel man i Yuda, pi lembe mi kitabu ma junwang’u; kum kwinyo pa Yehova ukonjre i wiwa dit, kum kwaruwa woro lembe pa Yehova ngo, kara gitim calku gin ceke m’ugore i kitabu maeni.

²²Kum kumeno Hilkia, ku ju m’ubimo ng’olo igi, gicidho ba Hulda ma jabila ma dhaku, ma ci Calum ma wod Tokhath, ma wod Hasra, ma jagwok kendi (nwang’u ebedo i Yerusalem i ng’ete mir arionde); man giyero ire lembe ma kumeno.

²³E ewacu igi kumae, Yehova, Mungu mir Israel, uwacu kumae: Wuyer ni dhanu m’uorowu i bang’a kumae,

²⁴Yehova wacu kumae, Nen, abikelo lem ma rac wi ka maeni, man wi ju m’ubedo kakeni, en e kwong’ ceke m’ugore i kitabu ma gisomo i wang’ ubimo mi Yuda.

²⁵Kum giweka, man gi wang’u udok ma ng’wice ng’ar ni mungu mange, kara ginyai ng’ecwiny i ia ku tic ceke m’i cing’gi; ka kumeno kwinyo para konjre woko wi ka maeni, man ebinegre ngo.

²⁶Ento ni ubimo mi Yuda, m’uorowu kara wupenj ba Yehova re, wubiwacu ire kumae, Yehova, Mungu mir Israel, uwacu kumae: Pi lembe m’iwinjo,

²⁷kum adundeni bedo yom, man ijwigri giri i wang’ Mungu, kinde m’iwinjo lembe pare ma kum ka maeni, man kum dhanu m’ubedo kakeni, man ijwigri giri i wang’a, iyeco kendi peri de, man iywak i wang’a; an bende awinji, Yehova wacu.

²⁸Nen, abicoki ba kwaru peri, man jubicoki ba liel peri ku kwiocwiny, kadok weng’i de bineno lem ma rac m’abikelo wi ka maeni ceke ngo, man wi ju m’ubedo kakeni. E gidwoko lembe bang’ ubimo.

²⁹Ubimo lund uoro kwenda man ecoko judongo ceke mi Yuda ku Yerusalem karacelo.

³⁰E ubimo idho malu ba ot pa Yehova, ku dhanu ceke mi Yuda man ju m’ubedo i Yerusalem, ku julam, man Julawi, ku dhanu ceke, ma dongo ku ma thindho de: e esomo lembe ceke mi kitabu mi lembariba ma junwang’u i ot pa Yehova i ithgi.

³¹E ubimo cungo i kakare, man etimo lembariba i wang’ Yehova, kara ewoth i tok Yehova, man ewor lembang’ola pare, ku lembatuca pare, ku cik pare, kud adundene ceke, man ku ng’eyong’ec pare ceke, kara etim lembe mi lembariba m’ugore i kitabu maeni.

³²Man eketho dhanu ceke m’unwangre i Yerusalem ku Benyamin ucung i kume. Man dhanu m’ubedo i Yerusalem gitimo calku lembariba pa Mungu, Mungu pa kwaru migi.

³³Man Yosia kabu ginmajudagu ceke woko kud i ng’om ceke ma piny mi nyithindho mir Israel, man eketho dhanu ceke mir Israel ma junwang’u gitim, gitim ndhu ni Yehova Mungu migi. I nindo pare ceke giweko lubo Yehova, Mungu pa kwarugi, ngo.