Read Alur 2 Lemkei 35 Bible Online

2 Lemkei 35 - Alur bible

2 Lemkei 35

¹Man Yosia kwiro kadhukuwijo ni Yehova i Yerusalem: man githumo kadhukuwijo i ceng’ apar wi ang’wende mi dwi ma kwong’ane.

²E eketho julam i tic maka migi, man ejukogi i timotim mi ot pa Yehova.

³Man ewacu ni Julawi m’uponjo Israel ceke, ma gi leng’ ni Yehova kumae, Wuketh sanduk ma leng’ i ot ma Suleman ma wod Daudi m’ubimo mir Israel ugomo; ter bibedo wi gokwu kendo ngo. Kawono wutim ni Yehova Mungu mu, man dhanu pare Israel;

⁴man wuyikru giwu calku udi pa wegwu ku kur mu, calku lembagora pa Daudi m’ubimo mir Israel, man calku lembagora pa Suleman ma wode.

⁵Man wucung i kamaleng’ calku pok mi udi pa wego mir utumegwu ma nyithindho mi dhanu, man wek makapiny mi ot mi wego mi Julawi ubed nuti iwu kubeng’wu kubeng’wu.

⁶Man wuthum kadhukuwijo, man wudwokru giwu leng’, e wuyik mi utumegwu, kara wutim calku lembe pa Yehova ma ku dhu Musa.

⁷E Yosia mio kum udul rombe, ni nyithindho mi dhanu, nyithi rombe ku nyithi diegi, gin ceke mi lam mi kadhukuwijo, ni dhanu ceke ma ginuti, ni wel rubanga pier adek, man thwoni dhiang’ rubanga adek: maeni en e mi piny p’ubimo.

⁸Man judongomawijo pare gimio girathiera ma ku berocwiny ni dhanu, man ni julam, man ni Julawi. Hilkia man Zekaria ku Yeiel, ma gi jubim mi ot pa Mungu, gimio lim ma thindho rubanga ario ku dak abusiel, man koni dhiang’ dak adek ni julam ni lam mi kadhukuwijo.

⁹Konania bende, ku Cemaya man Nethanel, ma utumin mire, man Hacabia ku Yeiel man Yozabad, ma gi judongo mi Julawi gimio lim ma thindho rubanga abic, ku koni dhiang’ dak abic, ni Julawi mi lam mi kadhukuwijo.

¹⁰Kum kumeno juyiko timotim, man Julawi gicungo kakagi, man Julawi ku kur migi, calku lembang’ola p’ubimo.

¹¹E githumo kadhukuwijo, man julam gikiro rimo ma gijolo kud i cing’gi, e Julawi githumogi.

¹²E gikabu lam m’awang’a, kara gimigi calku pok mi udi pa wego mi nyithindho mi dhanu, kara githier ni Yehova, calu egore i kitabu pa Musa. E gitimo kumeno ku koni dhiang’.

¹³E givulo kadhukuwijo i mac calku lembapoka: man lam ma leng’ gitedo i agulu, man i ajiku, man i aole, e giterogi pio ba nyithindho mi dhanu ceke.

¹⁴E yo ku ng’eye giyiko igi gigi, man mi julam, kum julam ma wot Harun gini i tic mi lamu lam m’awang’a ku mio cil ku diewor: ka kumeno Julawi giyiko igi gigi, man mi julam ma wot Harun.

¹⁵Man juwer ma wot Asaf gini kakagi, calku lembang’ola pa Daudi, man Asaf, ku Heman, man Yeduthun, ma jaeulembe p’ubimo; man jukurdhugola gini dhugang’ kubang’e kubang’e: can weko timotim migi negogi ngo; kum uturneggi ma Julawi giyiko igi.

¹⁶Kum kumeno timotim ceke pa Yehova yikre ceng’ nica, mi kwiro kadhukuwijo, man mi thiero lam m’awang’a wi pemblam pa Yehova, calku lembang’ola p’ubimo ma Yosia.

¹⁷Man nyithindho mir Israel ma nuti gikwiro kadhukuwijo i nindo maeca, man agba mi kwen ma thobi mbe i ie ceng’ abiro.

¹⁸Man kadhukuwijo ma calu maeni mbe ma jukwiro i kind Israel ugambre i ceng’ pa Samwil ma jabila; kadok ubimo moko mir Israel de gikwiro wadi kadhukuwijo ma calu Yosia kwiro ngo, man julam, ku Julawi, ku Yuda ceke man Israel ma ginuti, ku dhanu m’ubedo i Yerusalem.

¹⁹I rundi apar wi aborane mi camuker pa Yosia jukwiro kadhuwijo maeni.

²⁰Yo ng’ei maeni ceke, kinde ma Yosia yiko hekalu, Neko m’ubimo mi Misiri idho malu kara ekied kum Karkemic dhu kulo Frati: e Yosia wok i kume.

²¹Ento eoro jukwenda i bang’e, m’uwacu kumae, Wabedo ku lembang’o wakudi, in i ubimo mi Yuda? Abino i kumi ngo i ceng’ maeni, ento i kum ot ma ali ni i kindwa wakugi; e Mungu ng’olo ira ya atim pio: gwokri ni Mungu, ma ni karacelo kuda, kara kud enyothi.

²²Ento Yosia loko wang’e ngo i bang’e, ento epale gire, kara ekied kude, man ewinjo lembe pa Neko ngo m’uai dhu Mungu, man ebino kara ekied i poga mi Megido.

²³Man weg atum gikilo yo bang’ ubimo ma Yosia; e ubimo wacu ni jutic pare kumae, Wukaba cen; kum jukila gbe.

²⁴Kum kumeno jutic pare gitere cen kud i magali, man gikethe i magali mir arionde m’ebedo ko, e gikele i Yerusalem; e etho, man juyike i odliel pa kwaru pare. Man Yuda ceke ku Yerusalem giywagu Yosia.

²⁵Man Yeremia ywagu Yosia: man weg wer ma co ku weg wer ma nyir giyero pi Yosia i lemywak migi cil i ceng’ ma tin; man gitimogi ni lembapoka i Israel: man, nen, gigore i lemywakne.

²⁶Nie dong’ tic pa Yosia, ku tic ma ber m’etimo, calku lembe m’ugore i cik pa Yehova,

²⁷man tic pare, ma kwong’ane ku ma cenne, nen, gigore i kitabu mir ubimo mir Israel ku Yuda.